Ezekiyele
4 “Kutani wena, Wena n’wana wa munhu, teka xitina, u xi veka emahlweni ka wena, ehenhla ka xona u kovotla muti wa Yerusalema.+ 2 U fanele u wu rhendzela,+ u aka rirhangu ro wu sirhelela,+ u yimisa rirhangu ro anama eka wona,+ u dzima ni mixaxa eka wona naswona u wu sivelela hi swo gemba makhumbi ematlhelo.+ 3 Loko ku ri wena, teka pani ra nsimbi, u ri veka ri va khumbi ra nsimbi exikarhi ka wena ni muti, xikandza xa mina xi fanele xi lwa na wona, wu ta rhendzeriwa, kutani u fanele u wu rhendzela. I xikombiso eka yindlu ya Israyele.+
4 “Loko ku ri wena, etlela hi rivambu ra ximatsi, u veka xihoxo xa yindlu ya Israyele ehenhla ka rona.+ Emasikwini lawa u nga ta etlela ehenhla ka rona ha wona, u ta rhwala xihoxo xa vona. 5 Kutani mina ndzi ta ku nyika malembe ya xihoxo+ xa vona ma va nhlayo ya masiku ya 390,+ u ta rhwala xihoxo xa yindlu ya Israyele. 6 U fanele u ma heta.
“Kutani ra vumbirhi u fanele u etlela hi rivambu ra xinene, u ta rhwala xihoxo xa yindlu ya Yuda ku ringana masiku ya 40.+ Siku rin’we ri yimela lembe rin’we, siku rin’we ri yimela lembe rin’we, hi leswi ndzi ku nyikeke swona.+ 7 Kutani u ta kongomisa xikandza xa wena eku rhendzeriweni ka Yerusalema,+ voko ra wena ri pfulekile, naswona u fanele u profeta ku lwa na yena.
8 “Waswivo! Ndzi ta veka tintambhu+ ehenhla ka wena leswaku u nga hundzuluki eka tlhelo rin’wana u ya eka tlhelo rin’wana, kukondza u heta masiku ya ku rhendzela ka wena.
9 “Loko ku ri wena, teka koroni+ ni maxalana ni tinyawa+ ni swinyawana+ ni mahila ni koroni yo tshwuka,+ u fanele u swi chela eka xibya xin’we, u tiendlela xinkwa ha swona, ku ringana nhlayo ya masiku lawa u etlelaka ha wona hi rivambu; u ta xi dya masiku ya 390.+ 10 Kutani swakudya leswi u nga ta swi dya swi ta ya hi ntiko—tixekele ta 20 hi siku.+ U ta dya swona nkarhi ni nkarhi.
11 “Mati u ta ma nwa hi ku ya hi mpimo ntsena, mpimo wa vutsevu wa hini. U ta nwa wona nkarhi ni nkarhi.
12 “U ta xi dya kukota xinkwa xa maxalana;+ kutani xona, u ta xi baka hi vulongo+ bya thyaka ra vanhu ematihlweni ya vona.” 13 Kutani Yehovha a ya emahlweni a ku: “Hi ndlela leyi vana va Israyele va ta dya xinkwa xa vona xi nga tenganga+ exikarhi ka matiko lawa ndzi nga ta va hangalasela eka wona.”+
14 Ndzi ya emahlweni ndzi ku: “Oho, Wena Yehovha, Hosi leyi Lawulaka! Waswivo! Moya-xiviri wa mina a wu nyamisiwanga;+ ku sukela evuntshweni bya mina a ndzi si tshama ndzi dya ntsumbu kumbe xiharhi lexi handzuriweke,+ ku ta fikela sweswi, naswona enon’wini wa mina a ku si tshama ku nghena nyama leyi nyameke.”+
15 Hikwalaho a ku eka mina: “Waswivo, ndzi ku nyike vulongo bya tihomu ematshan’weni ya vulongo bya vanhu, u ta endla xinkwa xa wena ha byona.” 16 A ya emahlweni a ku eka mina: “N’wana wa munhu, waswivo, ndzi tshova tinhonga leti swinkwa leswi vumbekeke ku fana ni swingwavila swi tlhomiweke eka tona,+ eYerusalema, va ta dya xinkwa hi ku ya hi ntiko wa kona ni hi ku vilela,+ naswona va ta nwa mati hi ku ya hi mpimo ni hi ku chava,+ 17 hi xikongomelo xa leswaku va pfumala xinkwa ni mati, nileswaku va langutana hi ku hlamala, va bola hi xihoxo xa vona.+