Zakariya
13 “Esikwini rero+ ku ta va ni xihlovo+ lexi nga ta pfuleriwa yindlu ya Davhida ni vaaki va Yerusalema hikwalaho ka xidyoho+ ni hikwalaho ka nchumu lowu nyenyetsaka.+
2 “Kutani esikwini rero,” ku vula Yehovha wa mavuthu, “ndzi ta susa mavito ya swifaniso swa hava etikweni,+ a ma nge he tsundzukiwi; naswona vaprofeta+ swin’we ni moya wa thyaka ndzi ta swi endla swi hundza etikweni.+ 3 Loko ko tshuka ku va ni munhu la tlhelaka a profeta, tata wakwe ni mana wakwe lava va n’wi velekeke, va fanele va n’wi byela va ku, ‘A wu nge hanyi, hikuva u vulavule mavunwa hi vito ra Yehovha.’ Kutani tata wakwe ni mana wakwe lava va n’wi velekeke, va fanele va n’wi tlhava hikwalaho ka ku profeta ka yena.+
4 “Kutani esikwini rero vaprofeta va ta khomiwa hi tingana,+ un’wana ni un’wana hi xivono xakwe loko a profeta; a va nge yi ambali nguvu ya ximfumo ya voya+ hi xikongomelo xa vuxisi. 5 Kunene u ta vula a ku, ‘A ndzi muprofeta. Ndzi munhu la rimaka misava, hikuva ndzi kumiwe hi munhu wa la misaveni ku sukela evuntshweni ku fikela sweswi.’ 6 Munhu u fanele a ku eka yena, ‘I ta yini timbanga leti ti nga eka wena exikarhi ka mavoko?’ Yena u ta vula a ku, ‘Ndzi biwe tona endlwini ya varhandziwa va mina lavakulu.’”
7 “Wena banga, xalamuka u lwa ni murisi wa mina+ ni munhu la tiyeke emirini loyi a nga nakulorhi,”+ ku vula Yehovha wa mavuthu. “Bana murisi,+ u hangalasa ntlhambi;+ kunene ndzi ta tlherisa voko ra mina eka lava va nga nyawuriki.”+
8 “Kutani etikweni hinkwaro,” ku vula Yehovha, “swiphemu swimbirhi leswi swi nga eka rona swi ta tsemiwa, swi hela;+ loko ku ri xiphemu xa vunharhu, xi ta sala eka rona.+ 9 Kunene xiphemu xa vunharhu ndzi ta xi tisa endzilweni;+ entiyisweni ndzi ta va tengisa ku fana ni loko ku tengisiwa silivhere,+ ndzi va kambela ku fana ni loko ku kamberiwa nsuku.+ Loko ku ri xona, xi ta vitana vito ra mina, kasi loko ku ri mina, ndzi ta xi hlamula.+ Ndzi ta vula ndzi ku, ‘I vanhu va mina,’+ loko ku ri xona, xi ta ku, ‘Yehovha i Xikwembu xanga.’”+