Tinhlayo

10 Yehovha a ya emahlweni a byela Muxe a ku: 2 “Tiendlele timhalamhala+ timbirhi ta silivhere. U ta ti fula hi hamula, ti fanele ti va evutirhelini bya wena, ti va ta ku hlengeleta+ ntshungu ni ku hahlula mixaxa. 3 Va fanele va ti yimba hatimbirhi ka tona, kutani ntshungu hinkwawo wu fanele wu hlangana na wena enyangweni ya ntsonga wa nhlangano+ hilaha mi twaneke hakona. 4 Loko vo yimba yin’we ntsena, kutani tindhuna tanihi varhangeri va vanhu van’wana ni van’wana va magidi va Israyele, ti fanele ti hlangana na wena hilaha mi twaneke hakona.+

5 “Mi fanele mi yimba mpfumawulo lowu nga ringaniki, kutani mixaxa ya lava va dzimeke etlhelo ra le vuxeni+ yi fanele yi suka. 6 Mi fanele mi yimba mpfumawulo lowu nga ringaniki ra vumbirhi, kutani mixaxa ya lava va dzimeke etlhelo ra le dzongeni+ yi fanele yi suka. Va ta yimba mpfumawulo lowu nga ringaniki nkarhi wun’wana ni wun’wana loko wun’wana wa yona wu suka.

7 “Kutani loko mi vitana nhlengeletano, mi ta yimba,+ kambe mi nga tshuki mi yimba mpfumawulo lowu nga ringaniki. 8 Vana va Aroni, lava va nga vaprista va ta yimba timhalamhala,+ kutani ku tirhisiwa ka tona ku fanele ku va nawu wa hilaha ku nga riki na makumu eka n’wina, eswitukulwaneni swa n’wina.

9 “Loko mo tshuka mi lava ku nghenela nyimpi etikweni ra n’wina, mi lwa ni mutshikileri loyi a mi karhataka,+ mi ta ba hungwe ra nyimpi hi timhalamhala,+ kunene mi ta tsundzukiwa emahlweni ka Yehovha Xikwembu xa n’wina, mi ponisiwa eka valala+ va n’wina.

10 “Kutani hi siku ra ku tsaka+ ka n’wina ni hi minkarhi+ ya n’wina leyi vekiweke ya ntsako ni le ku sunguleni ka tin’hweti+ ta n’wina, mi fanele mi yimba timhalamhala ta n’wina, mi ti yimba hikwalaho ka magandzelo ya n’wina yo hisiwa+ ni switlhavelo swa n’wina swa xinakulobye;+ ku tirhisiwa ka tona ku ta va xitsundzuxo xa n’wina, emahlweni ka Xikwembu xa n’wina. Hi mina Yehovha Xikwembu+ xa n’wina.”

11 Kutani hi lembe ra vumbirhi, en’hwetini ya vumbirhi, hi siku ra vu-20 ra n’hweti,+ papa ri tlakuka ehenhla ka tabernakela+ ya Vumbhoni. 12 Hiloko vana va Israyele va suka hi mukhuva wa mafambelo+ ya vona loko va suka emananga ya Sinayi, kutani papa ri tshama emananga ya Parani.+ 13 Hiloko va suka ro sungula hi ku landza xileriso xa Yehovha ha Muxe.+

14 Kutani ntlawa wa tinyimba tinharhu wa nxaxa wa vana va Yuda wu va wo sungula ku suka hi mavuthu+ ya wona, Nasoni+ n’wana wa Aminadaba a a rhangele vuthu ra wona. 15 Loyi a a rhangele vuthu ra nyimba ya vana va Isakara a ku ri Nethanele+ n’wana wa Suwara. 16 Loyi a a rhangele vuthu ra nyimba ya vana va Zebuloni a ku ri Eliyabu n’wana wa Heloni.+

17 Kutani tabernakela yi hahluriwa,+ naswona vana va Gerixoni+ ni vana va Merari+ lava va nga varhwali va tabernakela va suka.

18 Hiloko ntlawa wa tinyimba tinharhu wa nxaxa wa Ruveni+ hi mavuthu ya wona wu suka, Elizuri+ n’wana wa Xidewuru a a rhangele vuthu ra wona. 19 Loyi a a rhangele vuthu ra nyimba ya vana va Simiyoni+ a ku ri Xelumiyele+ n’wana wa Zurixadayi. 20 Loyi a a rhangele vuthu ra nyimba ya vana va Gadi a ku ri Eliyasafa+ n’wana wa Duwele.

21 Kutani Vakohata tanihi varhwali va vukwetsimelo+ va suka, hikuva a va ta yimisa tabernakela loko va fika.

22 Hiloko ntlawa wa tinyimba tinharhu wa nxaxa wa vana va Efrayimi+ hi mavuthu ya wona wu suka, Elixama+ n’wana wa Amihudi a a rhangele vuthu ra wona. 23 Loyi a a rhangele vuthu ra nyimba ya vana va Manase+ a ku ri Gamaliyele+ n’wana wa Pedasuru. 24 Loyi a a rhangele vuthu ra nyimba ya vana va Benjamini+ a ku ri Abidana+ n’wana wa Gideyoni.

25 Hiloko ntlawa wa tinyimba tinharhu wa nxaxa wa vana va Dani+ wu suka, wu ri murindzi+ wa le ndzhaku wa mixaxa hinkwayo ni mavuthu ya yona, Ahiyezere+ n’wana wa Amixadayi a a rhangele vuthu ra wona. 26 Loyi a a rhangele vuthu ra nyimba ya vana va Axere+ a ku ri Pagiyele+ n’wana wa Okirani. 27 Loyi a a rhangele vuthu ra nyimba ya vana va Neftali+ a ku ri Ahira+ n’wana wa Enana. 28 Vana va Israyele va fambe hi ndlela leyi hi mavuthu ya vona loko va suka.+

29 Kutani Muxe a byela Hobabu n’wana wa Rhuwele+ lowa Mumidiyani, mukon’wana wa Muxe a ku: “Hi ya endhawini leyi Yehovha a vuleke ha yona a ku, ‘Ndzi ta mi nyika yona.’+ Famba na hina, kunene hi ta endla leswinene eka wena,+ hikuva Yehovha u vule leswinene malunghana na Israyele.”+ 30 Kambe a ku eka yena: “A ndzi nge fambi, kambe ndzi ta ya etikweni+ ra ka hina ni le maxakeni ya mina.” 31 Hiloko yena a ku: “Ndza ku kombela, u nga hi siyi, hikuva hikwalaho ka leswi u ku tivaka kahle laha hi nga dzimaka kona mixaxa emananga, u fanele u va mahlo ya hina. 32 Kutani loko wo famba na hina,+ ina, hi vunene lebyi Yehovha a nga ta hi endlela leswinene ha byona, hilaha ku fanaka, na hina hi ta ku endlela leswinene.”

33 Kutani va famba riendzo ra masiku manharhu va suka entshaveni ya Yehovha,+ areka ya ntwanano+ wa Yehovha a yi famba emahlweni ka vona eriendzweni ra masiku manharhu, yi va lavela ndhawu yo wisela eka yona.+ 34 Papa+ ra Yehovha a ri ri ehenhla ka vona ninhlikanhi loko va suka laha a va dzime mixaxa kona.

35 Kutani loko Areka yi suka, Muxe a a vula a ku: “Oho Yehovha, humelela, valala va wena a va hangalasiwe;+ lava va ku vengaka swinene a va baleke emahlweni ka wena.”+ 36 Kutani loko yi wisa, a a vula a ku: “Oho Yehovha, vuya eka timiriyadi ta magidi ta Israyele.”+