Varhoma

7 Xana swi nga endleka mi nga swi tivi, vamakwerhu, (hikuva ndzi vulavula ni lava va tivaka nawu,) leswaku Nawu wu lawula munhu, ntsena loko a ha hanya?+ 2 Hi xikombiso, wansati loyi a tekiweke u bohiwa hi nawu eka nuna wa yena loko a ha hanya; kambe loko nuna wa yena a fa, u ntshunxiwile enawini wa nuna+ wa yena. 3 Hikwalaho, loko nuna wa yena a ha hanya, u ta vitiwa wansati wa vuoswi loko a va nsati wa wanuna+ un’wana. Kambe loko nuna wa yena a fa, u ntshunxekile enawini wa nuna wa yena, lerova a hi wansati wa vuoswi loko a va nsati wa wanuna+ un’wana.

4 Kutani vamakwerhu, na n’wina mi endliwe lava feke eNawini+ hi miri wa Kreste, leswaku mi ta va va un’wana,+ loyi a pfuxiweke eka lava feke,+ leswaku hi ta vekela Xikwembu mihandzu.+ 5 Hikuva loko ha ha famba hi ku pfumelelana ni nyama,+ ku navela ka vudyoho loku a ku pfuxiwa hi Nawu a ku tirha eka swirho swa hina leswaku hi humesa mihandzu leyi yisaka eku feni.+ 6 Kambe sweswi hi ntshunxiwile eNawini,+ hikuva hi file+ eka wona lowu a wu hi khome swi tiya, leswaku hi ta va mahlonga+ hi mianakanyo leyintshwa hikwalaho ka moya,+ ku nga ri hi mianakanyo ya khale hikwalaho ka nawu+ lowu tsariweke.

7 Kutani hi ta ku yini? Xana Nawu i xidyoho?+ Sweswo swi nga tshuki swi va tano! Kunene ingi ndzi nga xi tivanga xidyoho+ loko a ku nga ri hikwalaho ka Nawu; naswona, hi xikombiso, ingi ndzi nga ku tivanga ku navela+ loko Nawu a wu nga vulanga wu ku: “U nga tshuki u navela.”+ 8 Kambe xidyoho, leswi xi endliweke xi va erivaleni hikwalaho ka xileriso,+ xi vange ku navela ka mixaka hinkwayo eka mina, hikuva handle ka nawu, xidyoho a xi file.+ 9 Entiyisweni, khale a ndzi hanya handle ka nawu;+ kambe loko xileriso xi fika,+ xidyoho xi tlhele xi hanya, kambe mina ndzi file.+ 10 Naswona xileriso lexi a xi yisa evuton’wini,+ mina ndzi xi kume xi yisa eku feni.+ 11 Hikuva xidyoho, leswi xi endliweke xi va erivaleni hikwalaho ka xileriso, xi ndzi kanganyisile,+ xi ndzi dlaya hikwalaho ka xileriso. 12 Hikwalaho, loko ku ri Nawu wa kwetsima,+ na xona xileriso xa kwetsima, xi lulamile,+ i xinene.+

13 Kutani, xana leswi nga swinene swi ve rifu eka mi-​na? Sweswo swi nga tshuki swi endleka! Kambe i xidyoho lexi veke rifu, leswaku swi ta kombisiwa leswaku i xidyoho xi ndzi vangelaka rifu hi leswi nga swinene;+ leswaku xidyoho xi ta va ni vudyoho lebyikulu ngopfu hikwalaho ka xileriso.+ 14 Hikuva ha swi tiva leswaku Nawu i wa moya;+ kambe mina ndzi wa nyama, ndzi xaviseriwe xidyoho.+ 15 Hikuva leswi ndzi swi endlaka a ndzi swi tivi. Hikuva leswi ndzi swi navelaka a ndzi hanyi hi swona; kambe leswi ndzi swi vengaka hi swona leswi ndzi swi endlaka. 16 Hambiswiritano, loko leswi ndzi nga swi naveliki ku ri swona leswi ndzi swi endlaka,+ ndza pfumela leswaku Nawu i wunene.+ 17 Kambe a swa ha endliwi hi mina, kambe i xidyoho lexi tshamaka eka mina.+ 18 Hikuva ndza swi tiva leswaku eka mina, ku nga enyameni ya mina, a ku tshami nchumu lexinene;+ hikuva vuswikoti byo navela+ byi kona eka mina, kambe vuswikoti byo endla+ leswi nga swinene a byi kona. 19 Hikuva leswinene leswi ndzi swi navelaka a ndzi swi endli,+ kambe leswo biha leswi ndzi nga swi naveliki hi swona leswi ndzi hanyaka hi swona. 20 Loko leswi ndzi nga swi naveliki ku ri swona leswi ndzi swi endlaka, a swa ha endliwi hi mina, kambe i xidyoho lexi tshamaka eka mina.+

21 Kutani eka mina ndzi kuma nawu lowu: leswaku loko ndzi navela ku endla leswi lulameke,+ leswo biha swi kona eka mina.+ 22 Kunene ndza wu tsakela+ nawu wa Xikwembu hi ku ya hi munhu+ loyi ndzi nga yena endzeni, 23 kambe eswirhweni+ swa mina ndzi vona nawu wun’wana lowu lwaka+ ni nawu wa mianakanyo+ ya mina, wu ndzi endla khumbi ra nawu+ wa xidyoho lowu nga eswirhweni swa mina. 24 Mina munhu wa maxangu! I mani loyi a nga ta ndzi ponisa eka miri lowu weriwaka hi rifu+ leri? 25 Ndzi nkhensa Xikwembu ha Yesu Kreste Hosi+ ya hina! Hikwalaho, emianakanyweni ya mina, ndzi hlonga ra nawu+ wa Xikwembu, kambe enyameni ya mina ndzi hlonga ra nawu+ wa xidyoho.