Esaya
46 Bele+ u nkhinsamile,+ Ne-bo u korhamile; swifaniso+ swa vona swa hava i swa swivandzana ni swa swifuwo, mindzhwalo ya vona, tinhundzu, i mpingu eka swiharhi leswi karhaleke. 2 Va fanele va korhama; va fanele va nkhinsama ehansi hinkwavo; kahle-kahle a va swi koti ku balekisa+ ndzhwalo, kambe moya-xiviri wa vona wu fanele wu ya evukhumbini.+
3 “Ndzi yingise, Wena yindlu ya Yakobe, na n’wina hinkwenu lava seleke va yindlu ya Israyele,+ n’wina lava hundzisiweke hi mina ku suka ekhwirini, lava rhwariweke ku suka embelekweni.+ 4 Hambiloko munhu a ri emalembeni ya vudyuhari, ndza ha ri Mina;+ ni loko a ri ni misisi ya mpunga, ndzi ta hambeta ndzi n’wi rhwala.+ Kunene mina ndzi ta teka goza,+ leswaku ndzi rhwala, ndzi tlakula ni ku ponisa.+
5 “Xana mi ta ndzi fanisa na mani+ kumbe mi ndzi ringanisa na mani kumbe mi ndzi fanisa na mani leswaku hi fana?+ 6 Ku ni lava humesaka nsuku hi vusopfa exipachini, naswona va pima silivhere hi mhandzi yo hayeka xikalo. Va thola la tirhaka hi nsimbi, kutani a yi endla xikwembu.+ Va tiwisela ehansi, ina, va nkhinsama.+ 7 Va xi rhwala hi katla,+ va xi byarha kutani va xi veka endhawini ya xona leswaku xi yima xi tiya. A xi suki endhawini leyi xi yimeke eka yona.+ Xa huweleriwa, kambe a xi hlamuli; a xi n’wi ponisi munhu emaxangwini yakwe.+
8 “Tsundzukani leswi, leswaku mi va ni xivindzi. Swi vekeni embilwini,+ n’wina lava tlulaka nawu.+ 9 Tsundzukani swilo swo sungula swa nkarhi wa khale swinene,+ leswaku hi mina Loyi a nga ni Vukwembu+ kutani a ku na Xikwembu xin’wana,+ kumbe la fanaka na mina;+ 10 Loyi a vulaka ka ha ri eku sunguleni leswi nga ta humelela emakumu,+ ku sukela khale swinene a vula leswi nga si tshamaka swi endliwa;+ Loyi a nge, ‘Xikongomelo xa mina xi ta tiya,+ naswona hinkwaswo leswi ndzi swi tsakelaka ndzi ta swi endla’;+ 11 Loyi a vitanaka nyenyana leyi dyaka nyama ku suka evuhuma-dyambu,+ munhu la nga ta hetisisa swikongomelo swa mina ku suka etikweni ra le kule.+ Ndzi swi vurile; ndzi ta tlhela ndzi swi tisa.+ Ndzi swi vumbile, ndzi ta tlhela ndzi swi endla.+
12 “Ndzi yingiseni, n’wina va timbilu ta matimba,+ n’wina lava nga ekule swinene ni ku lulama.+ 13 Ndzi tshinete ku lulama ka mina.+ A ku le kule,+ naswona ku ponisa ka mina a ku nge hlweli.+ Ndzi ta ponisa Siyoni, ndzi nyika Israyele ku saseka ka mina.”+