Amosi

4 “Yingisani rito leri, n’wina tihomu ta Baxani,+ leti nga entshaveni ya Samariya,+ leti dyelelaka swisiwana, leti ti pfotlosaka swisiwana,+ leti ti byelaka vini va tona ti ku, ‘Tisani, hi nwa!’ 2 Yehovha, Hosi leyi Lawulaka u hlambanye hi vukwetsimi bya yena,+ ‘“Maswivo! Masiku ma ta ta eka n’wina, kunene u ta mi teka hi swiove kutani lava saleke va n’wina u ta va teka hi swinjovo.+ 3 Xisweswo mi ta huma hi mavangwa, un’wana ni un’wana a kongoma emahlweni;+ kunene mi ta cukumeteriwa eHarimoni,” ku vula Yehovha.’

4 “‘Tanani, eBethele, mi tlula nawu.+ EGiligala tlulani nawu hi xitalo,+ mi tisa switlhavelo swa n’wina nimixo; hi siku ra vunharhu, mi tisa swiphemu swa n’wina swa vukhume.+ 5 Mbulukisani xitlhavelo hi leswi nga ni comela,+ mi huwelela magandzelo ya ku tirhandzela;+ swi twariseni, hikuva i ndlela leyi mi swi rhandzeke ha yona, N’wina vana va Israyele,’+ ku vula Yehovha, Hosi leyi Lawulaka.

6 “‘Loko ku ri mina, ndzi mi nyike ku basa ka meno+ emitini ya n’wina hinkwayo ni ku kayivela xinkwa etindhawini+ ta n’wina hinkwato; kambe a mi vuyanga eka mina,’+ ku vula Yehovha.

7 “‘Loko ku ri mina, ndzi tlhele ndzi mi sivela maboboma ka ha sele tin’hweti tinharhu ku ya entshovelweni;+ kutani ndzi endle leswaku yi na emutini wun’we, kambe emutini wun’wana a ndzi yi nisanga. Xiphemu xin’wana xa tiko a xi neriwa hi mpfula, kambe xiphemu xa tiko lexi ndzi nga nisangiki mpfula eka xona a xi oma.+ 8 Kutani miti yimbirhi kumbe yinharhu yi tshetsheleke yi ya emutini wun’we yi ya nwa mati,+ kambe a yi kolwanga; kambe a mi vuyanga eka mina,’+ ku vula Yehovha.

9 “‘Ndzi mi hlasele hi dyandza ni mfurho.+ Mintanga ya n’wina a yi andzisiwa ni masimu ya n’wina ya vhinya, kambe xivungu a xi dya minkuwa ya n’wina ni mirhi ya n’wina ya mutlhwari;+ kambe a mi vuyanga eka mina,’+ ku vula Yehovha.

10 “‘Ndzi rhumele ntungu exikarhi ka n’wina hi muxaka wo fana ni wa le Egipta.+ Majaha+ ya n’wina ndzi ma dlaye hi banga, ni ku yisa tihanci ta n’wina evukhumbini.+ Ndzi hambete ndzi endla leswaku ku nun’hwa ka mixaxa ya n’wina ku fika etinhompfini;+ kambe a mi vuyanga eka mina,’+ ku vula Yehovha.

11 “‘Ndzi endle leswaku mi hluriwa, ku fana ni loko Xikwembu xi hlula Sodoma na Gomora.+ Mi fane ni ntsandza lowu susiweke endzilweni;+ kambe a mi vuyanga eka mina,’+ ku vula Yehovha.

12 “Hikokwalaho, hi swona leswi ndzi nga ta ku endla swona, Wena Israyele. Hikwalaho ka leswi ndzi nga ta ku endla nchumu lowu, lunghekela ku hlangana ni Xikwembu+ xa wena, Wena Israyele. 13 Hikuva waswivo, Muvumbi wa tintshava+ ni Mutumbuluxi wa mheho,+ ni Loyi a byelaka munhu wa la misaveni leswi a anakanyaka ha swona,+ Loyi a endlaka vurhonga byi phumela,+ Loyi a pyanyaka etindhawini leti tlakukeke ta misava,+ vito ra yena i Yehovha Xikwembu xa mavuthu.”+