Matewu

27 Loko ri xile, vaprista hinkwavo lavakulu ni vakulukumba va tiko va kanerisana hi Yesu leswaku va ta n’wi dlaya.+ 2 Loko va n’wi bohile, va famba na yena va ya n’wi nyiketa eka Pilato lowa ndhuna-nkulu.+

3 Kutani Yudasi, la nga n’wi xenga, hi ku vona leswaku u gweviwile, a tilaya ivi a vuyisela swiphemu swa silivhere swa 30+ eka vaprista lavakulu ni vakulukumba, 4 a ku: “Ndzi dyohile loko ndzi xenga ngati+ yo lulama.” Va ku: “Sweswo swi vula yini eka hina? I swa wena sweswo!”+ 5 Kutani a hoxa swiphemu swa silivhere etempeleni, a suka, a famba a ya tihinga.+ 6 Kambe vaprista lavakulu va teka swiphemu swa silivhere, va ku: “A swi fanelanga leswaku swi hoxiwa evuhlayiselweni byo kwetsima bya xuma, hikuva i nxavo wa ngati.” 7 Loko va kanerisanile, va xave ha swona nsimu ya munhu la vumbaka, laha a ku ta lahliwa vafambi. 8 Hikokwalaho nsimu yoleyo yi vuriwa “Nsimu ya Ngati”+ ku fikela siku roroleri. 9 Kutani leswi nga vuriwa hi nomu wa muprofeta Yeremiya swi hetisekile, loko a ku: “Kutani va teka swiphemu+ swa silivhere swa 30, nxavo lowu munhu a a xavisiwa ha wona, loyi vana va Israyele van’wana a va n’wi xavisa ha wona, 10 kutani va va nyika swona leswaku va ta kuma nsimu ya munhu la vumbaka,+ hi ku landza leswi Yehovha a ndzi leriseke swona.”

11 Kutani Yesu a yima emahlweni ka ndhuna-nkulu; hiloko ndhuna-nkulu yi n’wi tlhandleka xivutiso: “Xana u hosi ya Vayuda?”+ Yesu a angula: “Wena hi wexe u vula swona.”+ 12 Kambe, loko a ri karhi a hehliwa+ hi vaprista lavakulu ni vakulukumba, a nga hlamulanga.+ 13 Kutani Pilato a ku eka yena: “Xana a wu swi twi swilo swo tala swonghasi leswi va ku hehlaka ha swona?”+ 14 Kambe a nga n’wi hlamulanga, e-e, ni rito ni rin’we, lerova ndhuna-nkulu yi hlamala ngopfu swinene.+

15 Enkhubyeni wun’wana ni wun’wana ndhuna-nkulu a yi tolovele ku ntshunxela ntshungu mukhotsiwa, loyi wu n’wi lavaka.+ 16 Hi nkarhi wolowo a va khome mukhotsiwa loyi a a dume hi swo biha, la vuriwaka Barabasi.+ 17 Hikwalaho loko va hlengeletanile Pilato a ku eka vona: “Xana mi lava leswaku ndzi mi ntshunxela mani, Barabasi kumbe Yesu la vuriwaka Kreste?”+ 18 Hikuva a a swi lemukile leswaku va n’wi nyikete+ hikwalaho ka mona.+ 19 Kutani, loko a tshame exitshan’weni xa vuavanyisi, nsati wakwe a rhumela rito eka yena, a ku: “U nga n’wi endli nchumu munhu yoloye wo lulama,+ hikuva ndzi karhateke swinene namuntlha enorhweni+ hikwalaho ka yena.” 20 Kambe vaprista lavakulu ni vakulukumba va kucetela mintshungu leswaku yi kombela Barabasi,+ kambe ku dlayiwa Yesu. 21 Kutani ndhuna-nkulu yi va angula yi ku: “Xana mi lava leswaku ndzi mi ntshunxela mani eka lavambirhi?” Va ku: “Barabasi.”+ 22 Pilato a ku eka vona: “Xana ndzi ta endla yini hi Yesu la vuriwaka Kreste?” Hinkwavo va ku: “A a beleriwe!”+ 23 A ku: “Ha yini, xana u endle xilo xihi xo biha?” Kambe va ya emahlweni va huwelela hilaha ku engetelekeke va ku: “A a beleriwe!”+

24 Hi ku vona leswaku a swi nga pfuni nchumu, kambe a ku pfuka hasahasa, Pilato a teka mati,+ a hlamba mavoko yakwe emahlweni ka ntshungu, a ku: “Ndzi hava nandzu engatini ya munhu loyi. Tivoneleni hi n’wexe.” 25 Hiloko vanhu hinkwavo va hlamula va ku: “Ngati yakwe a yi te ehenhla ka hina ni le henhla ka vana va hina.”+ 26 Kutani a va ntshunxela Barabasi, kambe a lerisa leswaku Yesu a biwa hi ximoko,+ a nyiketiwa leswaku a ya beleriwa.+

27 Hiloko masocha ya ndhuna-nkulu ma teka Yesu ma n’wi yisa exigodlweni xa ndhuna-nkulu, ma n’wi hlengeletela ntlawa hinkwawo wa masocha.+ 28 Naswona ma n’wi hluvula tinguvu to leha, ma n’wi kapeka nkhancu wa ribungu,+ 29 ma luka harhi ya mitwa ma n’wi tlhandleka enhlokweni, ma n’wi khomisa rihlanga evokweni rakwe ra xinene. Kutani, ma n’wi nkhinsamela, ma endla xihlekiso+ hi yena, ma ku: “Xewani, wena Hosi ya Vayuda!”+ 30 Kutani ma n’wi tshwutelela,+ ma teka rihlanga ma sungula ku n’wi ba nhloko. 31 Eku heteleleni, loko ma endle xihlekiso+ hi yena, ma n’wi hluvula nkhancu, ma n’wi ambexa tinguvu takwe ta le handle, ma n’wi yisa eku beleriweni.+

32 Loko ma huma ma kuma munhu wa le Kirena hi ku velekiwa, la vuriwaka Simoni.+ Ma sindzisa wanuna loyi ku rhwala mhandzi yakwe ya nxaniso. 33 Naswona loko ma fika endhawini leyi vuriwaka Golgota,+ hileswaku, Ndhawu ya Ripala, 34 ma n’wi nyika vhinyo leyi pfanganisiweke ni nyongwa+ leswaku a nwa; kambe, endzhaku ko yi nantswa, a ala ku nwa.+ 35 Loko ma n’wi belerile,+ ma ava tinguvu+ takwe ta le handle hi ku hoxa vuhlolotwana,+ 36 kutani, ma tshama, ma n’wi rindza kwalaho. 37 Nakambe, ma vehela ehenhla ka nhloko yakwe xihehlo lexi a a hehliwa ha xona, ku tsariwe marito lama nge: “Loyi i Yesu Hosi ya Vayuda.”+

38 Kutani swigevenga swimbirhi a swi beleriwe na yena, xin’wana exineneni xakwe ni xin’wana eximatsini+ xakwe. 39 Kutani vahundzi va ndlela va sungula ku vulavula hi ku n’wi tseketsela,+ va hlakahla+ tinhloko 40 va ku: “Wena la nga ta wisa tempele+ u tlhela u yi aka hi masiku manharhu, tiponise! Loko u ri n’wana wa Xikwembu, xika emhandzini ya nxaniso!”+ 41 Hi mukhuva lowu fanaka na vona vaprista lavakulu ni vatsari ni vakulukumba va sungula ku endla xihlekiso ha yena va ku:+ 42 “Van’wana u va ponisile; yena hi byakwe wa tsandzeka ku tiponisa! I Hosi+ ya Israyele; a a xike sweswi emhandzini ya nxaniso kutani hi ta n’wi kholwa.+ 43 U veke ntshembo wakwe eka Xikwembu; a xi n’wi ponise+ loko xi n’wi lava, hikuva u te, ‘Ndzi N’wana wa Xikwembu.’”+ 44 Hi ndlela leyi fanaka hambi ku ri swigevenga leswi beleriweke na yena swi sungula ku n’wi rhukana.+

45 Munyama wu funengeta+ tiko hinkwaro ku sukela hi awara ya vutsevu ku fikela hi awara ya vukaye.+ 46 Kwalomu ka awara ya vukaye Yesu a huwelela hi rito lerikulu, a ku: “Eli, Eli, lama sabaktani?” hileswaku, “Xikwembu xanga, Xikwembu xanga, u ndzi tshikele yini?”+ 47 Loko va twa leswi, van’wana lava a va yime kwalaho va sungula ku vula va ku: “Wanuna loyi u vitana Eliya.”+ 48 Hi ku hatlisa un’wana wa vona a tsutsuma a teka xiponci a xi tsakamisa hi vhinyo yo dzunga+ ivi a xi tlhoma erihlangeni, a n’wi nwisa.+ 49 Kambe lavan’wana hinkwavo va ku: “N’wi tshikeni! Hi ta vona loko Eliya a ta ta a ta n’wi ponisa.”+ [[Wanuna un’wana a teka fumu a n’wi tlhava tsheve, kutani ku huma ngati ni mati.]]+ 50 Nakambe Yesu a huwelela hi rito lerikulu, ivi a nyikela moya+ wakwe.

51 Kutani waswivo, nguvu+ ya vukwetsimelo yi handzuka hi le xikarhi, ku suka ehenhla ku ya ehansi,+ misava yi tsekatseka, ni maribye lamakulu ma pandzeka.+ 52 Kutani masirha-bako ya xitsundzuxo ma pfuleka, mintsumbu yo tala ya vakwetsimi lava etleleke yi humela ehandle, 53 (kutani vanhu, lava a va huma exikarhi ka masirha-bako ya xitsundzuxo endzhaku ka loko a pfuxiwile, va nghena emutini wo kwetsima,)+ mintsumbu yi voniwa hi vanhu vo tala. 54 Kambe ndhuna ya vuthu ni lava a va rindze Yesu swin’we na yona, loko va vona ku tsekatseka ka misava ni swilo leswi endlekaka, va sungula ku chava ngopfu swinene, va ku: “Hakunene loyi a a ri N’wana wa Xikwembu.”+

55 Ku tlula kwalaho, a ku ri ni vavasati vo tala lava a va ri kwalaho va langutile va ri ekule,+ lava a va fambisana na Yesu ku suka eGaleliya va n’wi tirhela;+ 56 exikarhi ka vona a ku ri na Mariya Magadala, na Mariya mana wa Yakobo na Yosi, ni mana wa vana va Zebediya.+

57 Leswi a ri rhengile swinene, ku fike wanuna la fuweke wa Arimatiya, la vuriwaka Yosefa, loyi na yena a veke mudyondzisiwa wa Yesu.+ 58 Wanuna loyi u ye eka Pilato kutani a kombela ntsumbu wa Yesu.+ Kutani Pilato a lerisa leswaku a nyikiwa wona.+ 59 Kutani Yosefa a teka ntsumbu wolowo, a wu tsondzela hi ntsembyana wa risima wo basa,+ 60 ivi a wu veka eka sirha-bako rakwe ra xitsundzuxo+ lerintshwa, leri yena a a ri kovotle eribyeni lerikulu. Kutani, endzhaku ko khunguluxela ribye lerikulu enyangweni ya sirha-bako ra xitsundzuxo, a suka.+ 61 Kambe Mariya Magadala na Mariya loyi un’wana va tshama kwalaho, emahlweni ka sirha.+

62 Hi siku leri tlhandlamaka, ku nga leri landzeleke ro Lunghiselela,+ vaprista lavakulu ni Vafarisi va hlengeletana emahlweni ka Pilato, 63 va ku: “Nkulukumba, hi tsundzuke leswaku muxisi loyi u vule leswi loko a ha hanya, ‘Endzhaku ka masiku+ manharhu ndzi ta pfuxiwa.’ 64 Hikokwalaho lerisa leswaku sirha ri sirheleriwa ku fikela siku ra vunharhu, leswaku vadyondzisiwa vakwe va nga tshuki va ta va ta n’wi yiva+ ivi va byela vanhu va ku, ‘U pfuxiwile eka lava feke,’ kutani vuxisi lebyo hetelela byi ta biha ngopfu ku tlula lebyo sungula.” 65 Pilato a ku eka vona: “Mi ni varindzi.+ Fambani mi ya ri sirhelela hilaha mi tivaka hakona.” 66 Kutani va suka va ya sirhelela sirha hi ku tiyisa ribye+ ni ku veka varindzi.