Vakolosa
2 Hikuva ndzi lava mi xiya leswaku i nyimpi+ leyikulu swinene leyi ndzi mi lwelaka yona ni lava nga eLawodikiya+ ni hinkwavo lava nga xi vonangiki xikandza xa mina hi nyama, 2 leswaku timbilu ta vona ti chaveleriwa,+ leswaku va hlanganisiwa swin’we hi vun’we erirhandzwini+ ni leswaku va fikelela rifuwo hinkwaro ra ku tiyiseka loku heleleke ka ku twisisa+ ka vona, malunghana ni ku fikelela vutivi lebyi kongomeke bya xihundla xo kwetsima xa Xikwembu, ku nga Kreste.+ 3 Leswi tumbetiweke hi vukheta eka yena i xuma hinkwaxo xa vutlhari ni xa vutivi.+ 4 Leswi ndzi swi vulela leswaku ku nga vi na munhu loyi a mi hambukisaka hi timhaka+ to wonga. 5 Hikuva hambileswi ndzi nga riki kona hi nyama, hambiswiritano ndzi na n’wina hi moya,+ ndzi tsaka ni ku vona nhleleko+ wa n’wina lowunene ni ku tiya ka ripfumelo+ ra n’wina eka Kreste.
6 Hikokwalaho, tanihi leswi mi amukeleke Kreste Yesu, Hosi, hambetani mi famba evun’weni+ na yena, 7 mi dzima timitsu+ ni ku akiwa+ eka yena ni ku tiyisiwa eripfumelweni,+ hilaha mi dyondzisiweke hakona, mi khapakhapa ripfumelo hi ku nkhensa.+
8 Tivoneleni: swi nga ha endleka ku va ni un’wana loyi a nga ta mi phasa+ hi filosofi+ ni vuxisi+ bya hava hi ku ya hi ndhavuko wa vanhu, hi ku ya hi swilo swa masungulo+ swa misava, ku nga ri hi ku ya hi Kreste; 9 hikuva ku tala+ hinkwako ka mfanelo+ ya vukwembu+ ku tshama eka yena hi tlhelo ra miri. 10 Kutani mi ni ku tala hikwalaho ka yena, loyi a nga nhloko ya hulumendhe ni vulawuri+ hinkwabyo. 11 Hi ku va ni vuxaka+ na yena, na n’wina mi yimbisiwile+ hi ku yimba loku nga endliwangiki hi mavoko hi ku susiwa ka miri wa nyama,+ hi ku yimba loku nga ka Kreste, 12 hikuva mi lahliwe na yena eku khuvuriweni+ kakwe, naswona hi vuxaka na yena mi tlhele mi pfuxiwa+ swin’we hi ripfumelo+ ra n’wina eka matirhelo+ ya Xikwembu, lexi n’wi pfuxeke+ eka lava feke.
13 Ku tlula kwalaho, hambileswi a mi file eswivini swa n’wina ni le ka xiyimo xo pfumala ku yimba xa nyama ya n’wina, Xikwembu xi mi hanyisile swin’we na yena.+ Hi musa xi hi rivalele swivi+ swa hina hinkwaswo 14 kutani xi hlangula+ tsalwa+ leri tsariweke hi voko leri a ri lwisana na hina, leri a ri ri ni swileriso+ swa nawu ni leri a ri kanetana na hina;+ naswona xi ri suse endleleni hi ku ri belela+ emhandzini ya nxaniso.+ 15 Xi hluvule tihulumendhe ni vulawuri+ byi sala ntsena, xi byi kombisa erivaleni byi ri lebyi hluriweke,+ xi byi kongomisa enxaxamelweni wa ku hlula+ hi mhandzi ya nxaniso.
16 Hikokwalaho ku nga tshuki ku va ni munhu loyi a mi avanyisaka+ hi ku dya ni ku nwa+ kumbe emhakeni ya nkhuvo+ kumbe ku tlangela ku thwasa ka n’weti+ kumbe savata;+ 17 hikuva swilo sweswo i ndzhuti+ wa swilo leswi nga ta ta, kambe swa xiviri+ i Kreste.+ 18 Ku nga tshuki ku va ni munhu la mi sivelaka+ ku kuma hakelo+ loyi a tsakelaka vutitsongahati bya vuxisi ni muxaka wa ku gandzela wa tintsumi, “a yimela” swilo leswi a swi voneke, a tikukumuxa a nga ri na xivangelo lexi faneleke hi xivumbeko xa mianakanyo yakwe ya nyama, 19 kasi a nga khomi swi tiya eka nhloko,+ eka loyi miri hinkwawo, lowu seketeriwaka ni ku hlanganisiwa swin’we hi vun’we+ hi mahlangano ya wona ni misiha yo hlanganisa marhambu, wu yaka wu kula hi ku kula loku nyikiwaka+ hi Xikwembu.
20 Loko mi fe+ swin’we na Kreste eka swilo swa masungulo+ swa misava,+ ha yini n’wina mi ya emahlweni, onge hiloko mi hanya emisaveni, mi tiveka ehansi ka swileriso+ swa nawu: 21 “Mi nga khomi, kumbe ku nantswa,+ kumbe ku khumba,”+ 22 malunghana ni swilo hinkwaswo leswi nga ta lovisiwa hi ku va swi tirhisiwa, hi ku landza swileriso ni ku dyondzisa ka vanhu?+ 23 Swilo sweswo, hakunene, swi languteka swi ri ni vutlhari hi xivumbeko xa vugandzeri xa ku tisungulela ni ku titsongahata ka vuxisi, ku khoma miri+ hi tihanyi; kambe a swi pfuni nchumu eku lwisaneni ni ku enerisa nyama.+