Estere
6 Evusikwini byebyo vurhongo bya hosi byi hangalaka.+ Hiloko yi vula leswaku ku tisiwa buku ya swiviko+ swa mintirho ya minkarhi. Hiloko yi hlayiwa emahlweni ka hosi. 2 Hi ku famba ka nkarhi ku kumiwa ku tsariwe leswi Mordekayi a swi vikeke+ malunghana na Bigithana na Terexi, vatirhi vambirhi+ va le hubyeni va hosi, valanguteri va tinyangwa lava a va lava ku tlhandleka voko eka Hosi Ahasuwerusi. 3 Kutani hosi yi ku: “Xana hi kwihi ku fundzhiwa ni nchumu lowukulu lowu endleriweke Mordekayi eka leswi?” Hiloko malandza ya hosi, vatirheli va yona, va ku: “A ku endliwanga nchumu ha yena.”+
4 Endzhaku hosi yi ku: “I mani loyi a nga exivaveni?” Kutani Hamani hi yena loyi a a ri exivaveni+ xa le handle xa yindlu ya hosi leswaku a byela hosi yi hayeka Mordekayi emhandzini+ leyi a n’wi lunghiseleleke yona. 5 Hiloko mutirheli wa hosi a ku eka yena: “Hi loyi Hamani+ a yimeke exivaveni.” Kutani hosi yi ku: “A a nghene.”
6 Loko Hamani a nghena, hosi yi ku eka yena: “Xana ku nga endliwa yini hi munhu loyi ku fundzheka ka yena ku tsakiseke hosi?”+ Hiloko Hamani a ku embilwini yakwe: “I mani loyi hosi yi nga tsakelaka ku n’wi fundzha ku tlula mina?”+ 7 Kutani Hamani a byela hosi a ku: “Loko ku ri munhu loyi hosi yi tsakisiweke hi ku fundzheka kakwe, 8 a va tise nguvu ya vuhosi+ leyi hosi yi yi ambalaka ni hanci leyi yi gadiwaka+ hi hosi, leyi enhlokweni ya yona ku veheriweke xifunengeto xa nhloko xa vuhosi. 9 A ku vekiwe nguvu ni hanci, swi languteriwa hi un’wana wa tihosana+ ta swiyimo swa le henhla ta hosi; va fanele va swi ambexa munhu loyi ku fundzheka kakwe ku tsakiseke hosi, va n’wi gadisa hanci a rhendzeleka entsendzeleni+ wa muti,+ va fanele va huwelela emahlweni ka yena va ku, ‘Ku endliwa hi ndlela leyi eka munhu loyi ku fundzheka kakwe ku tsakiseke hosi.’”+ 10 Xikan’we-kan’we hosi yi byela Hamani yi ku: “Hi ku hatlisa, teka nguvu ni hanci, hilaha u vuleke hakona, u endla tano eka Mordekayi lowa Muyuda la tshameke enyangweni ya hosi. U nga tshiki mhaka ni yin’we yi nga hetisekanga eka hinkwaswo leswi u swi vuleke.”+
11 Hiloko Hamani a teka nguvu+ ni hanci, nguvu a yi ambexa Mordekayi,+ a n’wi fambisa hi hanci entsendzeleni+ wa muti, a huwelela emahlweni ka yena a ku:+ “Ku endliwa hi ndlela leyi eka munhu loyi ku fundzheka kakwe ku tsakiseke hosi.”+ 12 Endzhaku ka sweswo Mordekayi a tlhelela enyangweni ya hosi.+ Loko ku ri Hamani, a tsutsumela endlwini yakwe a ri karhi a rila, a funengete nhloko.+ 13 Hamani a rungulela Zerexi+ nsati wakwe ni vanakulobye hinkwavo, hinkwaswo leswi swi n’wi humeleleke. Kutani tintlhari+ takwe na Zerexi nsati wakwe va ku eka yena: “Loko Mordekayi loyi u sunguleke ku wa emahlweni ka yena a huma eka Vayuda, a wu nge n’wi hluli, kunene u ta wa emahlweni ka yena.”+
14 Loko va ha vulavula na yena, vatirhi va le hubyeni va fika, kutani hi xihatla+ va teka Hamani a ya enkhubyeni+ lowu endliweke hi Estere.