Tinhlayo
30 Hiloko Muxe a byela varhangeri va+ tinyimba ta vana va Israyele, a ku: “Yehovha u lerise rito leri a ku: 2 Loko munhu o tshuka a endla xitshembiso lexi hlambanyiweke+ eka Yehovha kumbe a hlambanya xihlambanyo+ leswaku a boha moya-xiviri wakwe hi xitshembiso lexi hlambanyiweke xa ku papalata+ swo karhi, a nga tshuki a honisa rito rakwe.+ U fanele a endla hi ku landza hinkwaswo leswi humeke enon’wini wakwe.+
3 “Loko wansati o tshuka a endla xitshembiso lexi hlambanyiweke eka Yehovha+ kumbe a tiboha hi xitshembiso lexi hlambanyiweke xa ku papalata swo karhi endlwini ya tata wakwe, evuntshweni byakwe, 4 kunene tata wakwe a twa xitshembiso xakwe lexi hlambanyiweke kumbe xitshembiso xakwe lexi hlambanyiweke xa ku papalata swo karhi lexi a boheke moya-xiviri wakwe ha xona ivi tata wakwe a miyela a nga n’wi hlamuli nchumu, switshembiso swakwe hinkwaswo leswi hlambanyiweke swi ta tiya, naswona xitshembiso xin’wana ni xin’wana xakwe lexi hlambanyiweke+ xa ku papalata swo karhi, lexi a tiboheke ha xona xi ta tiya. 5 Kambe loko tata wakwe a n’wi alerile hi siku leri a nga twa switshembiso swakwe hinkwaswo leswi hlambanyiweke kumbe switshembiso swakwe leswi hlambanyiweke swa ku papalata swo karhi leswi a boheke moya-xiviri wakwe ha swona, a swi nge tiyi, kambe Yehovha u ta n’wi rivalela, hikuva tata wakwe u n’wi alerile.+
6 “Hambiswiritano, loko o tshuka a va ni nuna, xitshembiso xakwe lexi hlambanyiweke xi ri eka yena+ kumbe xitshembiso lexi nga ehleketiwangiki xa nomu wakwe lexi a boheke moya-xiviri wakwe ha xona, 7 kunene nuna wakwe a xi twa ivi a miyela a nga n’wi hlamuli nchumu esikwini leri a nga swi twa ha rona, switshembiso swakwe leswi hlambanyiweke swi fanele swi tiya kumbe switshembiso swakwe leswi hlambanyiweke swa ku papalata swo karhi, leswi a tiboheke ha swona swi ta tiya.+ 8 Kambe loko nuna wakwe o n’wi alela hi siku leri a swi twaka ha rona,+ u ta va a herise xitshembiso xakwe lexi hlambanyiweke lexi a xi endleke kumbe xitshembiso lexi nga ehleketiwangiki xa milomu yakwe, lexi a boheke moya-xiviri wakwe ha xona, kutani Yehovha u ta n’wi rivalela.+
9 “Loko ku ri xitshembiso lexi hlambanyiweke xa noni kumbe wansati la tshikiweke, hinkwaswo leswi a boheke moya-xiviri wakwe ha swona swi ta tiya ehenhla ka yena.
10 “Kambe, loko a endle xitshembiso lexi hlambanyiweke endlwini ya nuna wakwe kumbe a bohe moya-xiviri wakwe hi xitshembiso lexi hlambanyiweke+ xa ku papalata swo karhi, hi ku hlambanya, 11 nuna wakwe a swi twa ivi a miyela a nga n’wi hlamuli nchumu, a nga n’wi arisanga; switshembiso swakwe hinkwaswo leswi hlambanyiweke swi fanele swi tiya kumbe xitshembiso xin’wana ni xin’wana xakwe lexi hlambanyiweke xa ku papalata swo karhi lexi a boheke moya-xiviri wakwe ha xona xi ta tiya. 12 Kambe loko nuna wakwe a swi herise hilaha ku heleleke esikwini leri a tweke rito rin’wana ni rin’wana ra nomu wa yena ri ri switshembiso swakwe leswi hlambanyiweke kumbe ri ri xitshembiso lexi hlambanyiweke xa leswaku moya-xiviri wa yena wu papalata swo karhi, a swi nge tiyi.+ Nuna wakwe u swi herisile, naswona Yehovha u ta n’wi rivalela.+ 13 Xitshembiso xin’wana ni xin’wana lexi hlambanyiweke kumbe xihlambanyo xin’wana ni xin’wana xa xitshembiso lexi hlambanyiweke xa ku papalata swo karhi leswaku xi xanisa moya-xiviri,+ nuna wakwe u ta xi simeka kumbe nuna wakwe u ta xi herisa. 14 Kambe loko nuna wakwe o miyela a nga n’wi hlamuli nchumu siku ni siku, u tiyise switshembiso swa yena hinkwaswo leswi hlambanyiweke kumbe u tiyise switshembiso swakwe hinkwaswo leswi hlambanyiweke swa ku papalata swo karhi leswi nga eka yena.+ U swi tiyisile hikuva u miyerile a nga n’wi hlamuli nchumu esikwini leri a swi tweke ha rona. 15 Kutani loko o swi herisa hilaha ku heleleke endzhaku ka loko a swi twile, kunene u tlhela a byarha xihoxo xa yena.+
16 “Leswi i swileriso leswi Yehovha a swi leriseke Muxe exikarhi ka wanuna ni wansati,+ exikarhi ka tatana ni n’wana wakwe wa nhwanyana evuntshweni byakwe, endlwini ya tata wakwe.”+