Yeremiya

22 Yehovha u te: “Rhelela u ya endlwini ya hosi ya Yuda, u fika u vula rito leri. 2 Kutani u fanele u ku, ‘Twana rito ra Yehovha, Wena hosi ya Yuda la tshameke exiluvelweni xa Davhida,+ wena ni malandza ya wena swin’we ni vanhu va wena, lava nghenaka hi tinyangwa leti.+ 3 Yehovha u te: “Kombisani vululami ni ku tshembeka, mi kutsula loyi a kanganyisiwaka evokweni ra mudyeleri; naswona mi nga tshuki mi khoma muluveri hi tihanyi, n’wana la nga riki na tatana kumbe noni.+ Mi nga va endleli madzolonga.+ Naswona mi nga tshuki mi halata ngati leyi nga riki na nandzu endhawini leyi.+ 4 Hikuva loko mo tikarhatela ku endla rito leri, kunene etinyangweni ta yindlu leyi ku ta nghena ni tihosi leti tshamaka exiluvelweni xa Davhida,+ ti khandziye makalichi ni tihanci, yona yi ri ni malandza ya yona ni vanhu va yona.”’+

5 “‘Kambe loko mi nga yingisi marito lawa, ndzi hlambanya hi mina,’+ ku vula Yehovha, ‘leswaku yindlu leyi yi ta va ndhawu leyi onhakeke.’+

6 “‘Hikuva Yehovha u vule leswi malunghana ni yindlu ya hosi ya Yuda, a ku, ‘U fana na Giliyadi eka mina, nhloko ya Lebanoni.+ Hakunene ndzi ta ku endla mananga;+ loko ku ri miti, a wu kona ni wun’we lowu nga ta va ni vaaki.+ 7 Kutani ndzi ta vitanela valovisi,+ un’wana ni un’wana ni matlhari yakwe;+ va ta tsema mikedari+ ya wena leyo hlawuleka, va yi wisela endzilweni.+ 8 Entiyisweni matiko yo tala ma ta hundza hi le mutini lowu kutani ma byelana ma ku: “Hikwalaho ka yini Yehovha a endle hi ndlela leyi eka muti lowu lowukulu?”+ 9 Kutani va ta ku: “Hikwalaho ka leswi va siyeke ntwanano wa Yehovha Xikwembu xa vona,+ va nkhinsamela swikwembu swin’wana ni ku swi tirhela.”’+

10 “Mi nga n’wi rileli loyi a feke,+ naswona mi nga n’wi tshandzisi. N’wi rileleni ngopfu loyi a fambaka, hikuva a nge he vuyi naswona a nge ri voni tiko ra maxaka yakwe. 11 Hikuva malunghana na Xalumu+ n’wana wa Yosiya, hosi ya Yuda loyi a fumaka ematshan’weni ya Yosiya tata wakwe,+ loyi a sukeke endhawini leyi, Yehovha u te, ‘A nge he tlheleli kona. 12 Hikuva u ta fela endhawini leyi va n’wi yiseke eka yona evukhumbini, naswona tiko leri a nge he tlheli a ri vona.’+

13 “Khombo eka loyi a akaka yindlu yakwe,+ ku nga ri hi ku tshembeka, ni makamara yakwe ya le henhla, ku nga ri hi vululami, hi ku tirhisa munhu-kulobye la tirhelaka swa hava, loyi a nga n’wi nyikiki hakelo ya yena;+ 14 loyi a nge, ‘Ndzi ta tiakela yindlu leyi pfulekeke ni makamara ya le henhla lamakulu;+ naswona yi fanele yi va ni mafasitere lamakulu, mapulanga ya kona ma ta va ya mukedari,+ ma totiwa pende yo tshwuka.’+ 15 Xana u ta hambeta u fuma hikwalaho ka leswi u phikizanaka hi ku tirhisa mukedari? Loko ku ri tata wa wena, xana a nga dyanga, a nwa, a endla hi vululami ni hi ku tshembeka?+ Emhakeni yoleyo swi n’wi fambele kahle.+ 16 U xi yimelerile xirilo xa loyi a xanisiwaka ni loyi a nga xisiwana.+ Emhakeni yoleyo swi fambe kahle. ‘Xana a ku nga ri mhaka ya ku ndzi tiva?’ ku vula Yehovha. 17 ‘Hakunene mahlo ya wena ni mbilu ya wena a swi le ka xin’wana loko ku nga ri ehenhla ka mpindzulo wo biha,+ ni le henhla ka ngati ya loyi a pfumalaka nandzu leswaku ma yi halata,+ ehenhla ka ku dyelela ni le henhla ka ku phanga leswaku ma swi yisa emahlweni.’

18 “Hikokwalaho malunghana na Yoyakimi+ n’wana wa Yosiya, hosi ya Yuda, Yehovha u te, ‘A va nge n’wi rileli: “Oho, makwerhu wa xinuna! Oho makwerhu wa xisati!” A va nge n’wi rileli: “Oho, Wena mulawuri! Oho, xindzhuti xakwe!”+ 19 U ta lahliwa ku fana niloko ku lahliwa mbhongolo ya xinuna,+ a koka-kokiwa ni ku cukumetiwa, ehandle ka tinyangwa ta Yerusalema.’+

20 “Tlhandluka u ya eLebanoni+ u huwelela, u humesa rito ra wena eBaxani.+ U huwelela eAbarima,+ hikuva hinkwavo lava va ku rhandzaka swinene va tshovekile.+ 21 Ndzi vulavule na wena enkarhini wo pfumala ku karhateka.+ U te, ‘A ndzi nge yingisi.’+ Leyi a ku ri ndlela ya wena ku sukela evuntshweni bya wena, hikuva a wu ri yingisanga rito ra mina.+ 22 Mheho yi ta risa varisi va wena hinkwavo;+ loko ku ri lava va ku rhandzaka swinene, va ta ya evukhumbini.+ Hikuva enkarhini wolowo u ta khomiwa hi tingana, kunene u ta tsongahateka hikwalaho ka khombo ra wena hinkwaro.+ 23 Oho wena la tshamaka eLebanoni,+ la nga ni xisaka emirhini ya mikedari,+ kunene u ta va ni nhlomulo swinene loko u fikeriwa hi ku lun’wa ka ku veleka,+ switlhavi swa ku veleka swo fana ni swa wansati loyi a velekaka!”+ 

24 “‘Loko ntsena ndza ha hanya,’ ku vula Yehovha, ‘hambiloko Koniya+ n’wana wa Yoyakimi,+ hosi ya Yuda, o va xingwavila xa mfungho+ xa voko ra mina ra xinene, a ndzi ta ku susa!+ 25 Naswona ndzi ta ku nyikela evokweni ra lava va lavaka moya-xiviri+ wa wena ni le vokweni ra lava u va chavaka ni le vokweni ra Nebukadretsara hosi ya Babilona ni le vokweni ra Vakalidiya.+ 26 Kutani ndzi ta ku lahla swin’we ni mana wa wena+ loyi a ku velekeke mi ya eka tiko rin’wana leri mi nga velekeriwangiki eka rona, hi kona laha mi nga ta fela kona.+ 27 Etikweni leri va nga ta wu tlakusela eka rona moya-xiviri wa vona leswaku va tlhelela eka rona, a va nge tlheleli.+ 28 Xana Koniya+ loyi wo va xivumbeko ntsena lexi languteriwaka ehansi, lexi fayeteriweke,+ kumbe xibya lexi nga tsakisiki?+ Ha yini yena ni vana vakwe va fanele va lahliwa, va cukumeteriwa etikweni leri va nga ri tiviki?’+

29 “Oho misava, misava, misava, twana rito ra Yehovha.+ 30 Yehovha u te, ‘Tsalani ehansi leswaku munhu loyi a nga na n’wana,+ leswaku i munhu la tiyeke emirini loyi a nga ta ka a nga humeleli emasikwini yakwe; hikuva eka vana va yena a nga kona ni un’we loyi a nga ta humelela,+ a tshama exiluvelweni xa Davhida,+ a nga ha tlheli a fuma eYuda.’”