Amosi
1 Marito ya Amosi, loyi a a ri exikarhi ka varisi va tinyimpfu va le Tekowa,+ lawa a ma voneke exivonweni malunghana na Israyele+ emasikwini ya Uzhiya+ lowa hosi ya Yuda ni le masikwini ya Yerobuwamu+ n’wana wa Yowasi,+ hosi ya Israyele, malembe mambirhi ku nga si va ni ku tsekatseka ka misava.+ 2 Kutani a ku:
“Yehovha—u ta vomba a ri eSiyoni,+ u ta twarisa rito rakwe a ri eYerusalema;+ kutani madyelo ya varisi ma fanele ma rila, nhlohlorhi ya Karimeli yi fanele yi oma.”+
3 “Yehovha u te, ‘“Hikwalaho ka swiendlo swinharhu swa Damaska+ swa ku pfukela, ni hikwalaho ka mune wa swona, a ndzi nge byi tlherisi, hikwalaho ka leswi va hulaka Giliyadi+ hi swihulo swa nsimbi. 4 Ndzi ta rhumela ndzilo+ endlwini ya Hazayele,+ wu ta lovisa swihondzo swo tshama eka swona swa Beni-hadadi.+ 5 Ndzi ta tshova xigogo xa Damaska,+ ndzi lovisa loyi a akeke eBikati-avheni, ni loyi a khomaka nhonga ya vuhosi eBeta-edeni; kutani vanhu va Siriya va ta ya eKiri+ va ri makhumbi,” Yehovha u vurile.’
6 “Yehovha u te, ‘“Hikwalaho ka swiendlo swinharhu swa Gaza swa ku pfukela,+ ni hikwalaho ka mune wa swona, a ndzi nge byi tlherisi, hikwalaho ka leswi va yisaka ntlawa hinkwawo wa makhumbi evukhumbini,+ wu nyiketiwa aEdomu.+ 7 Ndzi ta rhumela ndzilo erirhangwini ra Gaza,+ wu fanele wu lovisa swihondzo swa wona swo tshama eka swona. 8 Ndzi ta lovisa loyi a akeke eAxidodo,+ ni loyi a khomaka nhonga ya vuhosi eAxikeloni;+ ndzi ta tlherisa+ voko ra mina ehenhla ka Ekroni,+ kutani lava va seleke va Vafilisita va fanele va hela,”+ Yehovha, Hosi leyi Lawulaka u vurile.’
9 “Yehovha u te, ‘Hikwalaho ka swiendlo swinharhu swa Tiri+ swa ku pfukela, ni hikwalaho ka mune wa swona, a ndzi nge byi tlherisi, hikwalaho ka leswi va nyiketaka ntlawa hinkwawo wa makhumbi aEdomu, ni hikwalaho ka leswi va nga wu tsundzukangiki ntwanano wa vamakwerhu.+ 10 Ndzi ta rhumela ndzilo erirhangwini ra Tiri, wu fanele wu lovisa swihondzo swa wona swo tshama eka swona.’+
11 “Yehovha u te, ‘Hikwalaho ka swiendlo swinharhu swa Edomu+ swa ku pfukela, ni hikwalaho ka mune wa swona, a ndzi nge byi tlherisi, hikwalaho ka leswi a hlongorisaka makwavo hi banga,+ ni hikwalaho ka leswi a onheke timfanelo ta yena ta tintswalo,+ naswona ku hlundzuka ka yena ku tshamela ku handzulela hi masiku; vukarhi bya yena—u byi hlayise hilaha ku nga heriki.+ 12 Kutani ndzi ta rhumela ndzilo eTemani,+ wu fanele wu lovisa swihondzo swo tshama eka swona swa Bosira.’+
13 “Yehovha u te, ‘“Hikwalaho ka swiendlo swinharhu swa Amone swa ku pfukela,+ ni hikwalaho ka mune wa swona, a ndzi nge byi tlherisi,+ hikwalaho ka leswi va handzulaka wansati la tikeke wa Giliyadi, hi xikongomelo xo ndlandlamuxa ndhawu ya vona.+ 14 Ndzi ta tshivela ndzilo erirhangwini ra Rhaba,+ wu fanele wu lovisa swihondzo swa wona swo tshama eka swona, hi ku ba hungwe esikwini ra nyimpi, hi xidzedze esikwini ra mheho.+ 15 Hosi ya vona yi fanele yi ya evukhumbini, yona ni tihosana ta yona,”+ Yehovha u vurile.’