1 Vakorinto

2 Vamakwerhu, loko ndzi ta eka n’wina a ndzi tanga hi ku lava ku mi hlamarisa hi mavulavulelo+ kumbe hi vutlhari loko ndzi mi byela xihundla+ xo kwetsima xa Xikwembu. 2 Hikuva loko ndzi ri na n’wina ndzi tiendle loyi a nga tiviki nchumu loko a nga ri Yesu Kreste+ ni ku beleriwa ka yena. 3 Naswona ndzi te eka n’wina ndzi ri ni ku tsana ni ku chava ni hi ku rhurhumela+ lokukulu; 4 naswona leswi ndzi swi vulavuleke ni leswi ndzi swi chumayeleke a ndzi swi vulanga hi marito lama khorwisaka ya vutlhari, kambe ndzi swi vule hi ku kombisiwa ka moya ni matimba,+ 5 leswaku mi nga vi na ripfumelo evutlharini+ bya vanhu, kambe ematimbeni+ ya Xikwembu.

6 Sweswi hi vulavula vutlhari exikarhi ka lava wupfeke,+ kambe hayi vutlhari+ bya mafambiselo lawa ya swilo, kumbe bya vafumi va mafambiselo lawa ya swilo,+ lava nga ta herisiwa.+ 7 Kambe hi vulavula vutlhari bya Xikwembu bya xihundla xo kwetsima,+ ku nga vutlhari lebyi fihliweke, lebyi Xikwembu xi byi vekeke mafambiselo+ ya swilo ma nga si va kona, leswaku hi ta vangamisiwa. 8 A nga kona mufumi+ wa mafambiselo lawa ya swilo loyi a tiveke+ vutlhari lebyi, hikuva loko a va byi tivile ingi va nga yi belelanga+ Hosi leyi dzunekaka. 9 Kambe hilaha ku tsariweke hakona: “Tihlo a ri swi vonanga, ni ndleve a yi swi twanga, naswona mbilu ya munhu a yi swi ehleketanga swilo leswi Xikwembu xi swi lunghiseleleke lava xi rhandzaka.”+ 10 Hikuva Xikwembu xi swi hlavutele+ hina hi moya+ wa xona, hikuva moya+ wu lavisisa swilo hinkwaswo, hambi swi ri swilo leswi enteke+ swa Xikwembu.

11 Hikuva i mani exikarhi ka vanhu loyi a tivaka swilo swa munhu loko wu nga ri moya+ wa munhu lowu nga endzeni ka yena? Kutani a nga kona loyi se a tivaka swilo swa Xikwembu loko wu nga ri moya+ wa Xikwembu. 12 Kutani a hi amukelanga moya+ wa misava, kambe hi amukele moya+ lowu humaka eka Xikwembu, leswaku hi ta tiva swilo leswi Xikwembu+ xi hi nyikeke swona hi musa. 13 Nakambe swilo leswi a hi swi vulavuli hi marito lawa hi dyondzisiweke hi vutlhari+ bya munhu, kambe hi marito lawa hi dyondzisiweke hi moya,+ hi ri karhi hi hlanganisa timhaka ta moya ni marito ya moya.+

14 Kambe munhu wa nyama a nga swi amukeli swilo swa moya wa Xikwembu, hikuva eka yena i vuphukuphuku; naswona a nge swi tivi,+ hikuva swi kamberiwa hi tlhelo ra moya. 15 Hambiswiritano, munhu wa moya+ kunene u kambela swilo hinkwaswo, kambe yena hi byakwe a nga kamberiwi+ hi munhu. 16 Hikuva “i mani loyi a tivaka mianakanyo ya Yehovha,+ leswaku a n’wi letela?”+ Kambe mianakanyo+ ya Kreste hi na yona.