Mitirho

22 “Vavanuna, vamakwerhu+ na vatatana, twanani ku tihlamulela+ ka mina eka n’wina.” 2 (Kutani, loko va twa leswaku a a vulavula na vona hi ririmi ra Xiheveru,+ va miyela va ku ntsee, hiloko a ku:) 3 “Ndzi Muyuda,+ la velekiweke eTarso wa Kilikiya,+ kambe ndzi dyondze emutini lowu emilengeni ya Gamaliyele,+ ndzi leteriwa hi ku ya hi rilondzo+ ra Nawu wa vakokwana, ndzi hisekela+ Xikwembu hilaha hinkwenu ka n’wina mi endlaka hakona namuntlha. 4 Naswona ndzi xanise Ndlela leyi ku fikela eku feni,+ ndzi boha ni ku nyiketa emakhotsweni+ vavanuna swin’we ni vavasati, 5 hilaha muprista lonkulu ni nhlengeletano hinkwayo ya vakulukumba+ yi nga nyikelaka hakona vumbhoni ha mina. Eka vona ndzi tlhele ndzi kuma mapapila+ lama yaka eka vamakwerhu eDamaska, naswona a ndzi ri endleleni ya mina yo ya teka lava a va ri kwale ndzi va tisa eYerusalema va bohiwile va xupuriwa.

6 “Kambe loko ndzi ri karhi ndzi famba ndzi tshinela ekusuhi na Damaska, kwalomu ka nhlikanhi, hi xitshuketa ku vonakala lokukulu loku humaka etilweni ku tlhava ku ndzi rhendzela,+ 7 hiloko ndzi wela ehansi ndzi twa rito ri ku eka mina, ‘Sawulo, Sawulo, u ndzi xanisela yini?’+ 8 Ndzi hlamula ndzi ku, ‘Hi wena mani, Hosi?’ Kutani a ku eka mina, ‘Hi mina Yesu wa Munazareta, loyi u n’wi xanisaka.’+ 9 Kutani vavanuna lava a va ri na mina+ va ku vonile hakunene ku vonakala, kambe a va ri twanga rito ra loyi a a vulavula na mina.+ 10 Kavaloko ndzi ku, ‘Xana ndzi ta endla yini,+ Hosi?’ Hosi yi ku eka mina, ‘Tlakuka, u ya eDamaska, u ta fika u byeriwa hinkwaswo leswi u nga ta swi endla.’+ 11 Kambe leswi a ndzi nga koti ku vona nchumu hi mhaka ya ku vangama ka ku vonakala koloko, ndzi fike eDamaska, ndzi kongomisiwa hi voko ra lava a va ri na mina.+

12 “Kutani Ananiya, wanuna un’wana wa xichavo hi ku ya hi Nawu, loyi Vayuda lava a va tshama kwalaho a va vulavula kahle+ ha yena, 13 a ta eka mina, a yima ekusuhi na mina, a ku eka mina, ‘Sawulo, makwerhu, tlhela u vona!’+ Kutani ndzi n’wi languta hi nkarhi wolowo. 14 A ku, ‘Xikwembu xa vatata wa hina+ xi ku hlawurile+ leswaku u tiva ku rhandza ka xona ni ku vona+ Loyi a lulameke+ ni ku twa rito ra nomu wakwe,+ 15 hikuva u ta va mbhoni yakwe eka vanhu hinkwavo malunghana ni swilo leswi u swi voneke ni ku swi twa.+ 16 Kutani sweswi ha yini u hlwela? Tlakuka, khuvuriwa+ u hlantswa+ swidyoho swa wena swi suka hi ku vitana vito rakwe.’+

17 “Kambe loko ndzi vuyele eYerusalema+ naswona ndzi ri karhi ndzi khongela etempeleni, ndzi weriwe hi riphume+ 18 kutani ndzi n’wi vona a ku eka mina, ‘Hatlisa u huma eYerusalema u nga hlweli, hikuva a va nge byi pfumeli+ vumbhoni bya wena malunghana na mina.’ 19 Hiloko ndzi ku, ‘Hosi, va swi tiva kahle leswaku a ndzi tshamela ku khotsa+ ni ku ba lava kholwaka eka wena+ esinagogeni yin’wana ni yin’wana; 20 naswona loko ngati ya Stefano+ mbhoni ya wena yi halatiwa, na mina a ndzi yime ekusuhi ndzi swi seketela+ ni ku hlayisa tinguvu ta le handle ta lava va n’wi dlayaka.’ 21 Kambe a ku eka mina, ‘Famba, hikuva ndzi ta ku rhuma ematikweni ya le kule ngopfu.’”+

22 Va hambeta va n’wi yingisa ku ta fikela eka rito leri, kutani va tlakusa marito ya vona, va ku: “Susa munhu wo tano emisaveni, hikuva a a nga faneriwi hi ku hanya!”+ 23 Hikwalaho ka leswi a va huwelela ni ku lahletela tinguvu ta vona ta le handle, va tsutsuxela ni ritshuri emoyeni,+ 24 ndhuna ya nyimpi yi lerisa leswaku a nghenisiwa egoveleni ra masocha kutani yi vula leswaku u fanele ku konanisiwa a ri karhi a xupuriwa, leswaku a swi tiva hi ku helela leswi a swi endla leswaku va huwelela+ eka yena hi ndlela leyi. 25 Kambe loko va n’wi vambile leswaku a biwa hi ximoko, Pawulo a byela ndhuna ya vuthu leyi a yi yime kwalaho a ku: “Xana swa pfumeleriwa leswaku mi ba munhu la nga Murhoma,+ a nga dyiwanga hi nandzu?” 26 Loko ndhuna ya vuthu yi twa leswi, yi ya endhuneni ya nyimpi yi yi vikela, yi ku: “Xana u kunguhata ku endla yini? Phela, munhu loyi i Murhoma.” 27 Hiloko ndhuna ya nyimpi yi tshinela kutani yi ku eka yena: “Ndzi byele, Xana u Murhoma?”+ Yena a ku: “Ina.” 28 Ndhuna ya nyimpi yi angula yi ku: “Ndzi xave timfanelo leti ta ku va muaka-tiko hi ntsengo lowukulu wa mali.” Pawulo a ku: “Kambe mina ndzi velekeriwe+ eka tona.”

29 Hikokwalaho, hi ku hatlisa vavanuna lava a va lava ku n’wi konanisa va ri karhi va n’wi xanisa va n’wi sukela; kutani ndhuna ya nyimpi yi chava loko yi kumisise leswaku a a ri Murhoma+ ni leswi yi n’wi boheke.

30 Hi siku leri tlhandlamaka, loko yi navela ku tiva kahle leswaku ha yini a hehliwa hi Vayuda, yi n’wi ntshunxa kutani yi lerisa vaprista lavakulu ni Sanedri hinkwayo leswaku yi hlengeletana. Hiloko yi tisa Pawulo yi n’wi yimisa exikarhi ka vona.+