Esaya

29 “Khombo eka Ariyele,+ eka Ariyele, muti lowu Davhida a dzimeke nxaxa eka wona!+ Engetelani lembe ehenhla ka lembe; a ku endliwe minkhuvo+ yi helela. 2 Kutani ndzi ta endla leswaku swilo swi nonon’hwela+ Ariyele, ku ta va ni ku rila ni nkalanga,+ eka mina wu ta fana ni xitiko xa alitari ya Xikwembu.+ 3 Ndzi ta dzima mixaxa ndzi ku rhendzela matlhelo hinkwawo, naswona ndzi ta ku rhendzela hi timhandzi to tontswa to biyela, ndzi ku akela khokholo leri nga ta ku sivelela.+ 4 Kutani u fanele u va exiyin’weni xa le hansi leswaku u ta vulavula u ri emisaveni, marito ya wena ma ta twalela ehansi kukota loko u ri entshurini.+ Naswona rito ra wena ri ta huma emisaveni ku fana ni mungoma, marito ya wena ma ta pfuma ma huma entshurini.+ 5 Ntshungu wa lava u nga va tolovelangiki wu ta fana ni mapa lama silekeke kahle,+ ni ntshungu wa vaxanisi+ wu ta fana ni mungu lowu hundzaka.+ Swi ta endleka hi xinkarhana, hi xitshuketa.+ 6 Yehovha wa mavuthu u ta ku nyika nyingiso hi ku dzindza ni hi ku tsekatseka ni hi mpfumawulo lowukulu, mheho ni xidzedze, ni langavi ra ndzilo lowu lovisaka.”+

7 Kutani swi ta endleka ku fana ni le norhweni, exivonweni xa vusiku, malunghana ni ntshungu wa matiko hinkwawo lama lwaka na Ariyele,+ ni hinkwawo lama lwaka na wona ni swihondzo swo sirhelela ni lava va wu nonon’hwiselaka.+ 8 Ina, swi ta fana ni loko munhu la nga ni ndlala a lorha a ri karhi a dya, kutani a pfuka, a kuma moya-xiviri wakwe wu nga ri na nchumu;+ ku fana ni loko munhu la nga ni torha a lorha a ri karhi a nwa, kutani a pfuka, a karhele ni moya-xiviri wakwe wu omile; swi ta va tano hi ntshungu wa matiko hinkwawo lowu lwaka ni Ntshava ya Siyoni.+

9 Yimani, mi hlamala;+ tipfaleni mahlo, mi fa mahlo.+ Va pyopyiwile,+ kambe ku nga ri hi vhinyo; va dedelekile, kambe ku nga ri hikwalaho ka swakunwa leswi pyopyaka.+

10 Hikuva Yehovha u chele moya wa vurhongo lebyikulu ehenhla ka n’wina;+ naswona u pfala mahlo ya n’wina vaprofeta,+ u funengete ni tinhloko ta n’wina,+ lava vonaka swivono.+ 11 Naswona eka n’wina xivono xin’wana ni xin’wana xi kotisa marito ya buku leyi lemiweke,+ leyi va yi nyikaka loyi a tivaka leswi tsariweke, va ku: “Hi kombela u yi hlaya swi twala,” kutani yena a ku: “A ndzi swi koti, hikuva yi lemiwile”;+ 12 kutani buku yi fanele yi nyikiwa loyi a nga swi tiviki leswi tsariweke, un’wana a ku: “Hi kombela u yi hlaya swi twala,” kutani yena a ku: “Vutsari a ndzi byi tivi.”

13 Yehovha u ri: “Hikwalaho ka leswi vanhu lava va tshineleke hi nomu wa vona, naswona va ndzi vangamiseke hi milomu ya vona ntsena,+ nileswi mbilu ya vona va yi yiseke ekule na mina,+ ni ku ndzi chava ka vona ku hundzukaka xileriso xa munhu lexi dyondzisiwaka,+ 14 hikokwalaho, hi mina Loyi a nga ta tlhela a endla swo hlamarisa eka vanhu lava,+ hilaha ku hlamarisaka ni hi nchumu wo hlamarisa; kutani vutlhari bya tintlhari ta vona byi ta hela, ni ku twisisa ka vanhu va vona vo tlhariha ku ta tumbela.”+

15 Khombo eka lava va tumbetelaka Yehovha+ makungu hi vuenti, ni lava va endleke swiendlo swa vona emunyameni,+ va ri karhi va ku: “Hi voniwa hi mani, naswona i mani la hi tivaka?”+ 16 Vuhomboloki bya n’wina! Xana muvumbi u fanele a tekiwa tanihi vumba?+ Xana nchumu lowu endliweke wu fanele wu vula leswi malunghana ni muendli wa wona, wu ku: “A ndzi endliwanga hi yena”?+ Naswona nchumu lowu vumbiweke wu nga vula leswi malunghana ni muvumbi wa wona, wu ku: “A nga twisisi”?+

17 Xana a ku salanga nkarhi lowutsongo leswaku Lebanoni wu hundzuriwa ntanga wa mihandzu+ nileswaku ntanga wa mihandzu wu tekiwa wu ri khwati?+ 18 Kunene esikwini rero lava feke tindleve va ta twa marito ya buku,+ ni mahlo ya lava feke mahlo ma ta vona laha ku dzwihaleke ni le munyameni.+ 19 Kunene lavo rhula+ va ta engetela ku tsaka ka vona eka Yehovha, ni swisiwana exikarhi ka vanhu swi ta tsakela Mukwetsimi wa Israyele,+ 20 hikuva muxanisi u ta hela,+ ni loyi a tikurisaka u ta fika emakumu yakwe,+ kasi hinkwavo lava xalamukelaka ku onha+ va ta tsemiwa, 21 lava dyohisaka munhu hi rito rakwe,+ ni lava rhiyaka loyi a tshinyaka enyangweni,+ ni lava va bakanyaka lowo lulama hi ku vulavula ka hava.+

22 Hikokwalaho Yehovha la kutsuleke Abrahama+ u byele yindlu ya Yakobe a ku: “Yakobe a nge khomiwi hi tingana sweswi, naswona xikandza xakwe a xi nge kwalali sweswi;+ 23 hikuva loko a vona vana vakwe, mintirho ya mavoko ya mina, exikarhi ka yena,+ va ta hlawulekisa vito ra mina,+ kunene va ta hlawulekisa Mukwetsimi wa Yakobe,+ ni Xikwembu xa Israyele va ta xi xixima.+ 24 Entiyisweni lava dyohaka emoyeni wa vona va ta twisisa, ni lava dzumadzumaka va ta kuma xiletelo.”+