Marka

10 Hiloko a suka kwalaho a fika emaaveni ya Yudiya entsungeni wa Yordani, nakambe mintshungu yi hlengeletanela eka yena, naswona hilaha a a tolovele ku endla hakona, a tlhela a yi dyondzisa.+ 2 Kutani Vafarisi va tshinela, naswona leswaku va n’wi ringa, va n’wi vutisa loko swi pfumeleriwa leswaku wanuna a tshika nsati.+ 3 A va hlamula a ku: “Xana Muxe u mi lerise yini?” 4 Va ku: “Muxe u pfumelele leswaku a tsaleriwa papila ra ku n’wi hlongola ni ku n’wi tshika.”+ 5 Kambe Yesu a ku eka vona: “U mi tsalele xileriso lexi hikwalaho ko xiya ku nonon’hwa ka timbilu+ ta n’wina. 6 Hambiswiritano, ku sukela eku sunguleni ka ntumbuluko ‘Xi endle waxinuna ni waxisati.+ 7 Hikwalaho wanuna u ta siya tata wakwe ni mana wakwe, 8 naswona lavambirhi va ta va nyama yin’we’;+ kutani a va ha ri vambirhi, kambe i nyama yin’we. 9 Hikokwalaho leswi Xikwembu xi swi paneke swin’we, ku nga tshuki ku va ni munhu la swi hambanisaka.”+ 10 Nakambe loko a ri endlwini+ vadyondzisiwa va sungula ku n’wi vutisa malunghana ni leswi. 11 Kutani a ku eka vona: “Mani na mani la tshikaka nsati wakwe a teka un’wana u endla vuoswi+ eka nsati wakwe, 12 naswona loko wansati a tshike nuna wakwe, a tekana ni un’wana, wansati loyi u endla vuoswi.”+

13 Kutani vanhu va sungula ku n’wi tisela vana lavatsongo leswaku a va khumba; kambe vadyondzisiwa va va holovela.+ 14 Loko a vona leswi, Yesu a hlundzuka ivi a ku eka vona: “Tshikani vana lavatsongo va ta eka mina; mi nga ringeti ku va sivela, hikuva mfumo wa Xikwembu i wa lavo tano.+ 15 Ndzi tiyisile ndzi ri eka n’wina, Mani na mani loyi a nga wu amukeriki mfumo wa Xikwembu ku fana ni n’wana lontsongo a nge pfuki a nghenile eka wona.”+ 16 Kutani a angarha vana, a va katekisa, a va tlhandleka mavoko.+

17 Kuteloko a huma, a khoma ndlela, munhu un’wana a tsutsuma a fika a nkhinsama emahlweni ka yena ivi a n’wi tlhandleka xivutiso a ku: “Mudyondzisi Lonene, xana ndzi fanele ndzi endla yini leswaku ndzi kuma ndzhaka ya vutomi lebyi nga heriki?”+ 18 Yesu a ku eka yena: “Ha yini u vula leswaku ndzi lonene?+ Munhu lonene a nga kona, handle ka un’we, ku nga Xikwembu.+ 19 Wa swi tiva swileriso leswi nge, ‘U nga dlayi hi vomu,+ U nga endli vuoswi,+ U nga yivi,+ U nga nyikeli vumbhoni bya mavunwa,+ U nga dyeleli,+ Xixima tata wa wena ni mana wa wena.’”+ 20 Munhu loyi a ku eka yena: “Mudyondzisi, hinkwaswo swilo leswi ndzi swi hlayisile ku sukela evuntshweni bya mina.” 21 Yesu a n’wi languta ivi a titwa a n’wi rhandza kutani a ku eka yena: “U kayivela xilo xin’we: Famba, u ya xavisa swilo leswi u nga na swona u nyika swisiwana, kutani u ta va ni xuma etilweni, u ta, u va mulandzeri wa mina.”+ 22 Kambe a hlunamisiwa hi marito lawa, kutani a famba a ri ni gome, hikuva a a ri ni swilo swo tala.+

23 Endzhaku ko rhalarhala, Yesu a byela vadyondzisiwa vakwe a ku: “Ku ta va nchumu wo nonon’hwa swinene eka lava nga ni mali+ leswaku va nghena emfun’weni wa Xikwembu!”+ 24 Kambe vadyondzisiwa va hlamarisiwa+ hi marito yakwe. Yesu a tlhela a va angula a ku: “Vana vanga, i nchumu wo nonon’hwa swinene ku nghena emfun’weni wa Xikwembu! 25 Swa olova swinene leswaku kamela yi hundza exuveni xa neleta ku ri ni ku va munhu la fuweke a nghena emfun’weni wa Xikwembu.”+ 26 Nakambe va hlamala ngopfu swinene kutani va ku eka yena: “Entiyisweni, i mani la nga ponisiwaka?”+ 27 Yesu a va languta hi ku kongoma ivi a ku: “Eka vanhu a swi koteki, kambe a swi tano eka Xikwembu, hikuva swilo hinkwaswo swa koteka eka Xikwembu.”+ 28 Petro a sungula ku n’wi byela a ku: “Waswivo! Hi siye swilo hinkwaswo naswona ha ku landzela.”+ 29 Yesu a ku: “Ndzi tiyisile ndzi ri eka n’wina, A ku na munhu la siyeke yindlu kumbe vamakwavo va xinuna kumbe vamakwavo va xisati kumbe manana kumbe tatana kumbe vana kumbe masimu hikwalaho ka mina ni hikwalaho ka mahungu lamanene+ 30 la nga ta ka a nga kumi hilaha ku phindhiweke ka 100+ enkarhini lowu, tindlu ni vamakwavo va xinuna ni vamakwavo va xisati ni vamanana ni vana ni masimu, swin’we ni ku xanisiwa,+ kutani emafambiselweni lama taka ya swilo a kuma vutomi lebyi nga heriki. 31 Hambiswiritano, vo tala lava nga vo sungula va ta va vo hetelela, ni lavo hetelela va ta va vo sungula.”+

32 A va ri karhi va tlhandluka hi gondzo va kongoma eYerusalema, naswona Yesu a a famba emahlweni ka vona, kutani va hlamala; kambe lava a va landzela va sungula ku chava. A tlhela a ya ni lava 12 etlhelweni a va byela swilo leswi nga ta n’wi humelela:+ 33 “Hi hina lava, hi tlhandlukela eYerusalema, naswona N’wana wa munhu u ta nyiketiwa eka vaprista lavakulu ni le ka vatsari, kutani va ta n’wi gwevela rifu, naswona va ta n’wi nyiketa eka vanhu va matiko,+ 34 va ta endla xihlekiso ha yena, va n’wi tshwutelela, va n’wi ba naswona va n’wi dlaya, kambe hi siku ra vunharhu u ta pfuka.”+

35 Hiloko Yakobo na Yohane, vana vambirhi va Zebediya,+ va ya eka yena va ku: “Mudyondzisi, hi lava leswaku u hi endlela xin’wana ni xin’wana lexi hi xi kombelaka eka wena.”+ 36 A ku eka vona: “Xana mi lava leswaku ndzi mi endlela yini?” 37 Va ku eka yena: “Hi pfumelele ku tshama, un’wana evokweni ra wena ra xinene un’wanyana eka lera ximatsi, eku vangameni+ ka wena.” 38 Kambe Yesu a ku eka vona: “A mi swi tivi leswi mi swi kombelaka. Xana mi nga swi kota ku nwa eka xinwelo lexi ndzi nwaka eka xona, kumbe ku khuvuriwa hi nkhuvulo lowu ndzi khuvuriwaka+ ha wona?” 39 Va ku eka yena: “Ha swi kota.” Kutani Yesu a ku eka vona: “Xinwelo lexi ndzi xi nwaka mi ta xi nwa, ni nkhuvulo lowu ndzi khuvuriwaka ha wona mi ta khuvuriwa+ ha wona. 40 Hambiswiritano, loko ku ri ku tshama exineneni xa mina kumbe eximatsini xa mina a hi swa mina ku swi nyika+ van’wana, kambe i swa lava lunghiseriweke swona.”

41 Ina, loko lavan’wana va khume va twa ha swona, va sungula ku hlundzukela Yakobo na Yohane.+ 42 Kambe Yesu, loko a va vitanele eka yena, a ku eka vona: “Ma swi tiva leswaku lava vonakaka va fuma matiko va ma tikisela naswona lavakulu va ma lawula.+ 43 A swi fanelanga swi va tano exikarhi ka n’wina; kambe mani na mani la lavaka ku va lonkulu exikarhi ka n’wina u fanele ku va mutirheli wa n’wina,+ 44 naswona mani na mani la lavaka ku va wo sungula exikarhi ka n’wina u fanele ku va hlonga ra n’wina hinkwenu.+ 45 Hikuva hambi ku ri N’wana wa munhu a nga telanga ku tirheriwa,+ kambe u tele ku tirhela ni ku nyikela moya-xiviri wakwe wu va nkutsulo+ wa lavo tala.”+

46 Kutani va fika eYeriko. Kambe loko yena ni vadyondzisiwa vakwe ni ntshungu lowukulu va huma eYeriko, Bartimiya (n’wana wa Timiya), mukomberi la feke mahlo, a a tshame etlhelo ka gondzo.+ 47 Loko a twa leswaku a ku ri Yesu wa Munazareta, a sungula ku huwelela a ku: “N’wana wa Davhida,+ Yesu, vana ni tintswalo eka mina!”+ 48 Hikwalaho vo tala va n’wi byela hi ku kongoma leswaku a miyela; kambe a ya emahlweni a huwelela swinene ngopfu a ku: “N’wana wa Davhida, vana ni tintswalo eka mina!”+ 49 Kutani Yesu a yima, a ku: “N’wi vitaneni.” Hiloko va vitana munhu la feke mahlo, va ku eka yena: “Tiya mbilu, u suka u yima, wa ku vitana.”+ 50 Loko a hluvule nguvu yakwe ya le handle, a suka a yima a ya eka Yesu. 51 Yesu a n’wi angula a ku: “Xana u lava leswaku ndzi ku endlela yini?”+ Munhu la feke mahlo a ku eka yena: “Raboni, endla leswaku ndzi tlhela ndzi vona.”+ 52 Yesu a ku eka yena: “Famba, ripfumelo ra wena ri ku hanyisile.”+ Hi ku hatlisa a tlhela a vona,+ a sungula ku n’wi landzela egondzweni.+