Esaya
25 Oho Yehovha, u Xikwembu xanga.+ Ndza ku tlakusa,+ ndzi dzunisa vito ra wena,+ hikuva u endle swilo swo hlamarisa,+ u nyikele switsundzuxo+ ku sukela eminkarhini ya khale, hi ku tshembeka,+ hi ku lulama.+ 2 Hikuva u endle muti wu va nhulu ya maribye, muti lowu tiyisiweke u wu endle rhumbi leri hirimukaka, xihondzo xo tshama eka xona xa vafambi xi nga vi muti lowu nga ta ka wu nga pfuxiwi hilaha ku nga riki na makumu.+ 3 Hi yona mhaka leyi vanhu lava nga ni matimba va nga ta ku vangamisa; muti wa matiko ya tihanyi, va ta ku chava.+ 4 Hikuva u hundzuke khokholo ra la nga exiyin’weni xa le hansi, khokholo ra xisiwana emaxangwini ya xona,+ vutumbelo exidzedzeni, ndzhuti+ emun’wini, loko vukarhi bya lava tihanyi byi fana ni xidzedze ehenhla ka khumbi. 5 Ku fana ni ku hisa etikweni leri nga riki na mati, u hlule huwa ya vafambi, u hlule mumu hi ndzhuti wa papa.+ Miloti ya lava va tihanyi ya siviwa.+
6 Kunene Yehovha wa mavuthu u ta endlela vanhu hinkwavo+ entshaveni leyi,+ nkhuvo wa swakudya swo nona,+ nkhuvo wa vhinyo leyi kumekaka eswiseseni, wa swakudya swo nona leswi nga ni mongo,+ wa vhinyo+ leyi kumekaka eswiseseni, leyi hlutiweke.+ 7 Kunene entshaveni leyi u ta mita xikandza xa xifunengeto lexi funengetaka vanhu hinkwavo,+ ni muluko lowu tsondzelaka matiko hinkwawo. 8 Entiyisweni u ta mita rifu hi masiku,+ kunene Yehovha, Hosi leyi Lawulaka yi ta sula mihloti eswikandzeni hinkwaswo.+ Naswona ku rhukaniwa ka vanhu va yona yi ta ku susa emisaveni hinkwayo,+ hikuva Yehovha u vurile.
9 Kunene esikwini rero un’wana u ta ku: “Maswivo! Lexi i Xikwembu xa hina.+ Hi tshembe xona,+ naswona xi ta hi ponisa.+ Loyi i Yehovha.+ Hi tshembe yena. A hi tsakeni, hi tsakela ku ponisiwa hi yena.”+
10 Hikuva voko ra Yehovha ri ta tshama entshaveni leyi,+ naswona Mowabu u ta kandziyeriwa+ endhawini yakwe ku fana ni loko byanyi byo tala byi kandziyeriwa laha ku nga ni vulongo.+ 11 U ta tshambulutela mavoko yakwe exikarhi ka yena ku fana ni loko muhlamberi a ma tshambuluta a hlambela, kutani u ta tsongahata ku titlakusa+ kakwe hi mafambelo ya vukanganyisi ya mavoko ya yena. 12 Kutani muti lowu tiyisiweke, ni marhangu ya wena yo leha, u ta swi mbundzumuxa; u ta wu tsongahata, a wu hlanganisa ni misava, entshurini.+