Obadiya

1 Xivono xa Obadiya:

Yehovha, Hosi leyi Lawulaka u vule leswi malunghana na Edomu,+ a ku: “Ku ni xiviko lexi hi xi tweke lexi humaka eka Yehovha, naswona ku ni muyimeri loyi a rhumiweke exikarhi ka matiko, ‘Sukani mi yima, hi lwa na yena enyimpini.’”+

2 “Waswivo! Ndzi ku endle u va lontsongo exikarhi ka matiko.+ U languteriwa ehansi swinene.+ 3 Ku tikukumuxa ka mbilu ya wena ku ku xisile,+ wena loyi a tshamaka emabakweni ya maribye,+ ndhawu yo tlakuka leyi a tshamaka eka yona, embilwini yakwe a vula a ku, ‘I mani loyi a nga ta ndzi xikisela emisaveni?’ 4 Loko wo endla xiyimo xa wena xi tlakuka ku fana ni gama, kumbe loko xisaka xa wena a xi vekiwe exikarhi ka tinyeleti, a ndzi ta ku xikisa kona,”+ ku vula Yehovha.

5 “Loko a ku ri makhamba lama teke eka wena, loko vaphangi a va tile nivusiku, xana a wu ta va u miyetiwe ku fikela kwihi?+ Xana a va nga ta yiva hilaha va rhandzaka hakona? Kumbe, loko a wu ngheneriwe hi lava va hlengeletaka madiriva, xana a va nga ta swi siyanyana swo khwaja?+ 6 Vona ndlela leyi vanhu va Esawu va laviweke ha yona!+ Vona ndlela leyi xuma xakwe lexi tumbetiweke xi hlotiweke ha yona! 7 Va ku fambise ku ya fika endzilakaneni. Hinkwavo vanhu lava va endleke ntwanano na wena va ku xisile.+ Vanhu lava va nga ni ku rhula na wena va ku hlurile.+ Lava va dyaka swakudya na wena va ta veka rikoka ehansi ka wena kukota loyi a nga riki na ku twisisa.+ 8 Xana a swi nge vi tano esikwini rero?” ku vula Yehovha.

“Kunene lavo tlhariha ndzi ta va lovisa aEdomu,+ ni ku twisisa endhawini ya tintshava ya Esawu. 9 Wena Temani,+ vavanuna va wena va matimba va fanele va chava,+ hikwalaho ka leswi un’wana ni un’wana a nga ta dlayiwa+ endhawini ya tintshava ya Esawu, hikwalaho ka ku dlayiwa.+ 10 Hikwalaho ka madzolonga lawa u ma endleke eka makwenu Yakobe,+ tingana ti ta ku funengeta,+ u ta dlayiwa hilaha ku nga riki na makumu.+ 11 Esikwini leri u yimeke etlhelweni, esikwini leri vafambi va yiseke vandla rakwe ra nyimpi evukhumbini+ ni le nkarhini lowu vanhu vambe va ngheneke ha wona enyangweni+ yakwe kutani va hoxela Yerusalema vuhlolotwana,+ na wena a wu fana ni un’wana wa vona.

12 “A wu nga fanelanga u hlalela esikwini ra makwenu,+ esikwini ra mhangu yakwe; a wu nga fanelanga u tsaka esikwini ra ku lova+ ka vana va Yuda; a wu nga fanelanga u va ni nomu lowukulu esikwini ra maxangu ya vona. 13 A wu nga fanelanga u nghena enyangweni ya vanhu va mina esikwini ra khombo ra vona.+ Wena, a wu nga fanelanga u nyangisisa khombo rakwe esikwini rakwe ra khombo; naswona a wu nga fanelanga u tshambulutela voko ehenhla ka rifuwo rakwe esikwini ra khombo ra yena.+ 14 A wu nga fanelanga u yima emahandzeni ya tindlela, leswaku u dlaya vabaleki va yena;+ naswona a wu nga fanelanga u nyiketa vaponi va yena esikwini ra maxangu.+ 15 Hikuva siku ra Yehovha ehenhla ka matiko hinkwawo ri kusuhi.+ Ndlela leyi u endleke ha yona, ku ta endliwa ha yona eka wena.+ Ndlela leyi u va khomeke ha yona van’wana yi ta vuyela enhlokweni ya wena.+ 16 Hikuva ndlela leyi mi nweke ha yona ehenhla ka ntshava ya mina yo kwetsima, matiko hinkwawo ma ta tshamela ku nwa ha yona nkarhi hinkwawo.+ Kunene ma ta nwa, ma kukutlela, onge hiloko ma nga vanga kona.

17 “Lava va balekaka va ta va eNtshaveni ya Siyoni,+ yi fanele yi va nchumu wo kwetsima;+ kutani yindlu ya Yakobe yi fanele yi teka swilo swa vona swi va swa yona.+ 18 Yindlu ya Yakobe yi fanele yi va ndzilo,+ yindlu ya Yosefa yi va langavi, ni yindlu ya Esawu yi fana ni mahlanga;+ va fanele va ti hisa, va ti lovisa. Endlwini ya Esawu a ku nge vi na munhu la poneke;+ hikuva Yehovha hi byakwe u swi vurile. 19 Va fanele va teka Negebu, ni ndhawu ya tintshava ya Esawu,+ ni Xefela ni Vafilisita.+ Va fanele va teka masimu ya Efrayimi+ ni masimu ya Samariya;+ Benjamini u fanele a teka Giliyadi.+ 20 Loko ku ri lava va nga makhumbi erirhangwini leri,+ leswi a swi ri swa Vakanana+ swi ta va swa Israyele ku ya fika eSarepta.+ Kutani lava nga makhumbi va Yerusalema, lava a va ri eSefaradi, va ta teka miti ya Negebu.+

21 “Kunene lava va ponisaka+ va ta tlhandlukela eNtshaveni ya Siyoni,+ leswaku va avanyisa ndhawu ya tintshava ya Esawu;+ vuhosi byi fanele byi va bya Yehovha.”+