Yohane

21 Endzhaku ka swilo leswi Yesu a tlhela a tikombisa eka vadyondzisiwa elwandle ra Tiberiyo; kambe u humelele hi ndlela leyi. 2 Simoni Petro na Tomasi, loyi a a vuriwa Hahla,+ na Nataniyele+ wa le Kana wa Galeliya ni vana va Zebediya+ ni van’wana vambirhi va vadyondzisiwa vakwe a va ri swin’we. 3 Simoni Petro a ku eka vona: “Ndzi ya phasa tinhlampfi.” Va ku eka yena: “Na hina hi famba na wena.” Hiloko va huma kutani va khandziya byatso, kambe evusikwini byebyo a va phasanga nchumu.+

4 Hambiswiritano, loko ri ya eku xeni, Yesu a a yime eribuweni, kambe vadyondzisiwa a va nga swi lemuki leswaku a ku ri Yesu.+ 5 Hiloko Yesu a ku eka vona: “Vana lavatsongo, a mi na nchumu xo dya, a hi swona ke?” Va n’wi hlamula va ku “Ina!” 6 A ku eka vona: “Hoxani rikoka etlhelweni ra xinene ra byatso, mi ta khoma.”+ Kutani va ri hoxa, kambe a va nga ha swi koti ku ri koka hikwalaho ka vunyingi bya tinhlampfi.+ 7 Hikokwalaho mudyondzisiwa loyi Yesu a a n’wi rhandza+ a byela Petro+ a ku: “I Hosi!” Hikwalaho Simoni Petro, loko a twa leswaku i Hosi, a tikhama hi nguvu ya le henhla, hikuva a a nga ambalanga, kutani a tihoxa elwandle. 8 Kambe vadyondzisiwa lavan’wana va ta hi byatso lebyitsongo, hikuva a va nga ri kule ngopfu ni ribuwa, a va ri empfhukeni wa kwalomu ka timitara ta 90, va koka rikoka ra tinhlampfi.

9 Hambiswiritano, loko va xika eribuweni va vona ndzilo wa makala+ ku ri ni tinhlampfi ehenhla ka wona ni xinkwa. 10 Yesu a ku eka vona: “Tisani tinhlampfi tin’wana leti ma ha ku ti phasaka.” 11 Hikokwalaho, Simoni Petro a khandziya a koka rikoka ri ta eribuweni ri tele hi tinhlampfi letikulu, ta 153. Kambe hambileswi a ti tele swonghasi rikoka a ri tlurhukanga. 12 Yesu a ku eka vona: “Tanani, mi ta fihlula.”+ Ku hava ni un’we wa vadyondzisiwa la veke ni xivindzi xo n’wi vutisa a ku: “Hi wena mani?” hikuva a va swi tiva leswaku i Hosi. 13 Yesu a ta kutani a teka xinkwa a va nyika,+ ni tinhlampfi hi ku fanana. 14 A ku ri ra vunharhu+ Yesu a humelela eka vadyondzisiwa endzhaku ka loko a pfuxiwe eka lava feke.

15 Kuteloko va fihlurile, Yesu a byela Simoni Petro a ku: “Simoni n’wana wa Yohane, xana u ndzi rhandza ku tlula leswi?”+ A ku eka yena: “Ina, Hosi, wa swi tiva leswaku ndzi ni xinakulobye eka wena.”+ A ku eka yena: “Phamela swinyimpfana+ swa mina.” 16 Nakambe a ku eka yena, ra vumbirhi: “Simoni n’wana wa Yohane, xana wa ndzi rhandza?”+ A ku eka yena: “Ina, Hosi, wa swi tiva leswaku ndzi ni xinakulobye eka wena.” A ku eka yena: “Risa tinyimpfu ta mina letitsongo.”+ 17 A ku eka yena ra vunharhu: “Simoni n’wana wa Yohane, xana u ni xinakulobye eka mina?” Petro a va ni gome hileswi a vuleke ra vunharhu eka yena a ku: “Xana u ni xinakulobye eka mina?” Hiloko a ku eka yena: “Hosi, u tiva swilo hinkwaswo;+ wa swi lemuka leswaku ndzi ni xinakulobye eka wena.” Yesu a ku eka yena: “Phamela tinyimpfu ta mina letitsongo.+ 18 Hakunene ndzi tiyisile ndzi ri eka wena, Loko wa ha ri ntsongo, a wu hamba u tikhama u famba-famba laha u lavaka kona. Kambe loko u kula u ta tshambuluta mavoko ya wena kutani munhu un’wana u ta ku khama+ a ku yisa laha u nga ku tsakeliki.”+ 19 Leswi a a swi vulela ku kombisa muxaka wa rifu+ leri a a ta vangamisa Xikwembu+ ha rona. Kutani, loko a vule leswi, a ku eka yena: “Hambeta u ndzi landzela.”+

20 Loko a hundzuluka Petro u vone mudyondzisiwa loyi Yesu a a n’wi rhandza+ a ta, loyi exilalelweni a a khegetele exifuveni xakwe a ku: “Hosi, i mani loyi a ku xengaka?” 21 Hikwalaho, loko a n’wi vona, Petro a ku eka Yesu: “Hosi, xana wanuna loyi u ta endla yini?” 22 Yesu a ku eka yena: “Loko ku ri ku rhandza ka mina leswaku a tshama ndzi kondza ndzi fika,+ wena u ni mhaka muni na swona? Wena hambeta u ndzi landzela.” 23 Hikokwalaho, marito lawa ma hangalaka eka vamakwavo, leswaku mudyondzisiwa yoloye a nge fi. Hambiswiritano, Yesu a nga n’wi byelanga leswaku a nge fi, kambe: “Loko ku ri ku rhandza ka mina leswaku a tshama+ ndzi kondza ndzi fika, wena u ni mhaka muni na swona?”

24 Loyi i mudyondzisiwa+ la nyikelaka vumbhoni hi swilo leswi ni loyi a tsaleke swilo leswi, naswona ha swi tiva leswaku vumbhoni lebyi a byi nyikaka i bya ntiyiso.+

25 Entiyisweni, ku ni swilo swin’wana swo tala leswi Yesu a swi endleke, leswi, loko a swi lo tsariwa hi vuxokoxoko lebyi heleleke, ndzi ehleketa leswaku misava a yi nga ta ti tamela tibuku-nsongwa leti a ti ta tsariwa.+