Amosi
3 “Twanani rito leri Yehovha a ri vuleke malunghana na n’wina,+ N’wina vana va Israyele, malunghana ni ndyangu hinkwawo lowu ndzi wu humeseke etikweni ra Egipta,+ a ku, 2 ‘Hi n’wina ntsena lava ndzi mi tiveke+ eka miti hinkwayo ya misava.+ Hi yona mhaka leyi ndzi nga ta endla leswaku mi tihlamulela eswihoxweni swa n’wina hinkwaswo.+
3 “‘Xana vambirhi va nga famba swin’we handle ka loko va hlangane hi nkarhi lowu va twananeke ha wona?+ 4 Xana nghala yi nga vomba ekhwatini loko yi nga khomanga xiharhi?+ Xana xinghalana xa ntshiva xi nga bonga endhawini leyi xi tumbeleke eka yona, loko xi nga khomanga nchumu? 5 Xana nyenyana yi nga wela exirimbanini emisaveni loko nchumu wo yi wonga wu nga ri kona?+ Xana xirimbana xa tlhekeka emisaveni xi nga khomanga nchumu? 6 Loko nanga yi yimbiwa emutini, xana vanhu a va rhurhumeli?+ Loko ku va ni khombo emutini, xana a hi yena Yehovha loyi a tekeke goza? 7 Hikuva Yehovha, Hosi leyi Lawulaka a nge endli nchumu a nga si hlavutela mhaka ya yena leyi nga xihundla eka malandza ya yena ku nga vaprofeta.+ 8 Ku ni nghala leyi yi vombeke!+ I mani loyi a nga ta ka a nga chavi? Yehovha, Hosi leyi Lawulaka u vurile! I mani loyi a nga ta ka a nga profeti?’+
9 “‘Swi twariseni eswihondzweni swo tshama eka swona eAxidodo ni le swihondzweni swo tshama eka swona etikweni ra Egipta,+ mi ku: “Hlengeletanani etintshaveni ta Samariya,+ mi vona mpfilumpfilu lowukulu lowu nga exikarhi ka wona ni ku dyelela loku ku nga endzeni ka wona.+ 10 A va swi tivanga ku endla leswi kongomeke,”+ ku vula Yehovha, “lava va hlayisaka madzolonga+ ni ku phanga eswihondzweni swa wona swo tshama eka swona.”’
11 “Hikokwalaho Yehovha, Hosi leyi Lawulaka u te, ‘Ku ni xirha etikweni hinkwaro,+ kunene xi ta teka matimba ya wena, swihondzo swa wena swo tshama eka swona swi ta phangiwa.’+
12 “Yehovha u te, ‘Hilaha murisi a wutlaka hakona manqina mambirhi kumbe xiphemu xa ndleve+ enon’wini wa nghala, vana va Israyele va ta wutliwa hi ndlela yoleyo, lava va tshamaka eSamariya esangwini ro saseka+ ni le mubedweni wa Damaska.’+
13 “‘Yingisani, mi nyikela vumbhoni+ endlwini ya Yakobe,’ ku vula Yehovha, Hosi leyi Lawulaka, Xikwembu xa mavuthu. 14 ‘Hikuva, esikwini leri ha rona ndzi nga ta endla leswaku Israyele wu tihlamulela+ eka swiendlo swa wona swa ku pfukela, ndzi ta tlhela ndzi endla leswaku tialitari ta Bethele+ ti tihlamulela; kunene timhondzo ta alitari ti ta tsemiwa, ti wela emisaveni.+ 15 Ndzi ta hirimuxa yindlu ya vuxika ni yindlu+ ya ximumu.’+
“‘Kutani tindlu leti endliweke hi timhondzo ta tindlopfu ti ta lova,+ ni tindlu to tala ti ta herisiwa,’+ ku vula Yehovha.”