Ezra

8 Kutani hi lava varhangeri+ va tindlu ta vatatana ni ku tsarisiwa+ ka vona hi ku ya hi swivongo ka lava va nga ta tlhandluka na mina hi nkarhi wa ku fuma ka Atazekiseki+ lowa hosi, loko va huma eBabilona: 2 Eka vana va Finiyasi,+ Gerixomu; eka vana va Ithamara,+ Daniyele;+ eka vana va Davhida,+ Hatuxi; 3 eka vana va Xekaniya, eka vana va Paroxi,+ Zakariya, naswona a ku tsarisiwe vaxinuna va 150 eka yena; 4 eka vana va Pahata-mowabu,+ Eliyeho-enayi n’wana wa Zerahiya, yena a ri ni vaxinuna va 200; 5 eka vana va Zatu,+ Xekaniya n’wana wa Yahaziyele, a ri ni vaxinuna va 300; 6 eka vana va Adini,+ Ebedi n’wana wa Yonathani, a ri ni vaxinuna va 50; 7 eka vana va Elami,+ Yexaya n’wana wa Ataliya, a ri ni vaxinuna va 70; 8 eka vana va Xefatiya,+ Zebadiya n’wana wa Mikayele, a ri ni vaxinuna va 80; 9 eka vana va Yowabu, Obadiya n’wana wa Yehiyele, a ri ni vaxinuna va 218; 10 eka vana va Bani,+ Xelomiti n’wana wa Yosifiya, a ri ni vaxinuna va 160; 11 eka vana va Bebayi, Zakariya n’wana wa Bebayi,+ a ri ni vaxinuna va 28; 12 eka vana va Azigadi,+ Yohanani n’wana wa Hakatana, a ri ni vaxinuna va 110; 13 eka vana va Adonikamu,+ lavo hetelela, hi lawa mavito ya vona: Elifalete, Yehiyele na Xemaya, a va ri ni vaxinuna va 60; 14 eka vana va Bigivhayi,+ Utayi na Zabudi, a va ri ni vaxinuna va 70.

15 Kutani ndzi va hlengeleta enambyeni+ lowu taka eAhavha;+ hi dzima mixaxa kwalaho masiku manharhu, leswaku ndzi kambela vanhu+ ni vaprista,+ kambe a ndzi kumanga munhu eka vana va Levhi.+ 16 Hiloko ndzi rhumela rito leswaku ku vitaniwa Eliyezere, Ariyele, Xemaya na Elinathani na Yaribi na Elinathani na Natani na Zakariya na Mexulama, varhangeri, na Yowaribi na Elinathani, valeteri.+ 17 Ndzi va lerisa malunghana na Ido la nga murhangeri wa le ndhawini ya Kasifiya, ndzi va byela marito+ lawa va nga ta ma vula eka Ido ni vamakwavo Vanethinimi+ endhawini ya Kasifiya, leswaku va hi tisela lava va nga ta tirha+ endlwini ya Xikwembu xa hina. 18 Kutani va hi tisela hi ku ya hi voko lerinene+ ra Xikwembu xa hina leri ri nga eka hina, munhu wa vutlhari,+ a huma eka vana va Maheli+ ntukulu wa Levhi+ n’wana wa Israyele, ku nga Xerebiya+ ni vana vakwe ni vamakwavo, va ri 18; 19 Haxabiya a ri na Yexaya va huma eka vana va Merari,+ vamakwavo ni vana va vona, va ri 20. 20 Eka Vanethinimi, lava Davhida ni tihosana va va nyikeke ntirho wa Valevhi, a ku ri ni Vanethinimi va 220, lava hinkwavo ka vona va hlawuriweke hi mavito.

21 Kutani ndzi huwelela leswaku ku va ni ku titsona swakudya kwalaho enambyeni wa Ahavha, leswaku hi titsongahata+ emahlweni ka Xikwembu xa hina, leswaku hi kuma ndlela+ leyi yi hi lulameleke eka xona, ni ya vana+ va hina ni ya nhundzu ya hina. 22 Hikuva a ndzi nyuma ku kombela vandla ra nyimpi+ ni vagadi va tihanci+ va hosi leswaku va hi pfuna ku lwa ni nala endleleni, hikuva hi byele hosi hi ku: “Voko+ ra Xikwembu ri na hinkwavo lava xi lavaka leswaku xi va endlela leswinene,+ kambe ntamu wa xona ni ku hlundzuka+ ka xona swi le henhla ka hinkwavo lava va xi tshikaka.”+ 23 Hikwalaho hi titsone swakudya+ hi tlhela hi kombela+ eka Xikwembu xa hina malunghana ni leswi, lerova xi pfumela leswaku hi kombela+ eka xona.

24 Hiloko ndzi hambanisa vaprista lava rhangelaka va 12, ku nga Xerebiya,+ Haxabiya,+ ni vamakwavo va khume. 25 Kutani ndzi va pimela silivhere ni nsuku ni swingolongondzwana,+ munyikelo wa yindlu ya Xikwembu xa hina lowu hosi+ ni vatsundzuxi+ va yona ni tihosana ta yona ni Vaisrayele+ hinkwavo lava a va ta kumeka va swi nyikeleke. 26 Hiloko ndzi va pimela evokweni ra vona titalenta ta silivhere+ ta 650 ni swingolongondzwana swa silivhere swa 100 leswi swi durhaka titalenta timbirhi ni nsuku ni titalenta ta 100, 27 ni minkambana ya nsuku ya 20 leyi durhaka tidarika ta 1 000 ni swingolongondzwana swimbirhi swa koporo leyinene, swa ku tshwuka loku vangamaka, ku fana ni nsuku lowu navelekaka.

28 Kutani ndzi va byela ndzi ku: “Mi nchumu lowu kwetsimaka+ eka Yehovha, ni swingolongondzwana+ i nchumu lowu kwetsimaka, ni silivhere ni nsuku i magandzelo ya ku tirhandzela lama yaka eka Yehovha Xikwembu xa vatata wa n’wina. 29 Tshamani mi xalamukile naswona mi rindzile ku fikela loko mi swi pima+ emahlweni ka vaprista lava rhangelaka ni Valevhi ni tihosana ta vatata wa Israyele eYerusalema, etiholweni to dyela+ eka tona ta yindlu ya Yehovha.” 30 Vaprista ni Valevhi va amukela ntiko wa silivhere ni nsuku ni swingolongondzwana, leswaku va swi tisa eYerusalema endlwini ya Xikwembu xa hina.+

31 Eku heteleleni hi suka enambyeni wa Ahavha+ hi siku ra vu-12 ra n’hweti+ yo sungula hi ya eYerusalema, kutani voko ra Xikwembu xa hina a ri ri na hina, lerova xi hi kutsula+ exandleni xa nala ni le ka lava va hi tumbeleleke endleleni. 32 Hiloko hi fika eYerusalema+ hi tshama kona masiku manharhu. 33 Kutani hi siku ra vumune, hi sungula ku pima silivhere ni nsuku+ ni swingolongondzwana+ endlwini ya Xikwembu xa hina hi swi nghenisa evokweni ra Meremoto+ n’wana wa Yuriya lowa muprista a ri na Eliyazara n’wana wa Finiyasi, va ri na Yozabadi+ n’wana wa Yexuwa na Nowadiya n’wana wa Binuyi,+ lava va nga Valevhi, 34 hi nhlayo ni ntikelo wa hinkwaswo, endzhaku ka sweswo ntiko hinkwawo wu tsariwe ehansi hi nkarhi wolowo. 35 Lava va humaka evukhumbini, lava a va ri evukhumbini+ eku sunguleni, va nyikela switlhavelo swo hisiwa+ eka Xikwembu xa Israyele, tinkunzi+ ta 12 ta tiko hinkwaro ra Israyele, makhuna+ ya 96, swinyimpfana swa xinuna swa 77, swiphongo+ swa 12 swi va magandzelo ya xidyoho, hinkwaswo swi ri gandzelo ro hisiwa eka Yehovha.

36 Hiloko milawu+ ya hosi hi yi nyika valanguteri+ ni tindhuna-nkulu+ leti nga entsungeni wa Nambu,+ kutani va pfuna vanhu+ ni yindlu ya Xikwembu xa ntiyiso.