Marka

8 Emasikwini wolawo, loko ku tlhele ku va ni ntshungu lowukulu naswona wu nga ri na swakudya, a vitana vadyondzisiwa a ku eka vona:+ 2 “Ntshungu lowu ndzi wu twela vusiwana,+ hikuva swi endla masiku manharhu wu tshama ekusuhi na mina naswona a wu na swakudya; 3 loko ndzo wu mukisa wu ri ni ndlala, wu ta gon’wela egondzweni. Hakunene, van’wana va wona va huma ekule swinene.” 4 Kambe vadyondzisiwa vakwe va n’wi hlamula va ku: “Xana munhu a nga swi kuma kwihi swinkwa swo xurhisa vanhu lava laha nhoveni?”+ 5 A tlhela a ya emahlweni a va vutisa: “Xana mi ni swinkwa swingani?” Va ku: “Swa nkombo.”+ 6 Hiloko a lerisa ntshungu leswaku wu vurhama ehansi, kutani a teka swinkwa swa nkombo, a nkhensa,+ a swi phemelela, a sungula ku nyika vadyondzisiwa vakwe leswaku va swi ava, vona va swi avela ntshungu.+ 7 Nakambe a va ri ni tinhlampfi ti nga ri tingani letitsongo; naswona, loko a ti katekisile, a va byela leswaku na tona va ti ava.+ 8 Hiloko va dya va xurha, kutani va hlengeleta swiphemu leswi saleke, ku tala swirhundzu swo phamela swa nkombo.+ 9 Kambe a ku ri ni vanhu va 4 000. Eku heteleleni a va mukisa.+

10 Hi ku hatlisa a khandziya byatso ni vadyondzisiwa vakwe kutani va fika etindhawini ta Dalmanuta.+ 11 Hiloko Vafarisi va huma, va sungula ku kanetana na yena, va lava leswaku a va endlela singita leri humaka etilweni, hi xikongomelo xo n’wi ringa.+ 12 Hiloko a konya swinene+ emoyeni wakwe, ivi a ku: “Ha yini xitukulwana lexi xi lava singita? Ndzi tiyisile ndzi ri, Ku hava singita leri nga ta nyikiwa xitukulwana+ lexi.” 13 Hiloko a va siya, a khandziya nakambe, a ya eribuweni leri nga endzhandzeni.

14 Kutani, va rivala ku famba ni swinkwa, naswona a va ri hava nchumu ebyatsweni+ loko xi nga ri xinkwa xin’we. 15 Kutani a va lerisa hi ku kongoma a ku: “Tshamani mi pfule mahlo, tivoneleni comela xa Vafarisi ni comela xa Heroda.”+ 16 Hiloko va phikizana hi mhaka ya leswaku a va na swinkwa.+ 17 Loko a vona leswi, a ku eka vona: “Ha yini mi phikizana hi leswaku a mi na swinkwa?+ Xana a mi si xiya ni ku kuma nhlamuselo ya kona? Xana timbilu ta n’wina ti tlanyarile a ti twisisi?+ 18 ‘Hambileswi mi nga ni mahlo, a mi voni ke; hambileswi mi nga ni tindleve, a mi twi ke?’+ Xana a mi tsundzuki, 19 loko ndzi phemela vavanuna va 5 000 swinkwa swa ntlhanu,+ xana mi hlengelete swirhundzu swingani leswi teleke hi swiphemu?” Va ku eka yena: “Swa 12.”+ 20 “Loko ndzi phemela vanhu va 4 000 swinkwa swa nkombo, xana mi hlengelete swirhundzu swingani swo phamela leswi teleke hi swiphemu?” Va ku eka yena: “Swa nkombo.”+ 21 Hiloko a ku eka vona: “Xana a mi si yi kuma nhlamuselo+ ya kona?”

22 Kutani va fika eBetsayida. Kwalaho vanhu va n’wi tisela munhu la feke mahlo, va n’wi kombela leswaku a n’wi khumba.+ 23 Kutani a khoma munhu la feke mahlo hi voko, a n’wi humesa eximutanini, naswona, loko a tshwutelele+ mahlo yakwe, a n’wi tlhandleka mavoko kutani a n’wi vutisa a ku: “Xana xi kona lexi u xi vonaka?” 24 Kutani munhu loyi a languta ivi a ku: “Ndzi vona vanhu, hikuva ndzi xiya leswi vonakaka onge i mirhi, kambe swa famba-famba.” 25 Hiloko a veka mavoko yakwe nakambe ehenhla ka mahlo ya munhu loyi, kutani munhu loyi a vona kahle, a a hanyisiwile, naswona a a swi vona kahle hinkwaswo. 26 Hiloko a n’wi mukisa, a ku: “Kambe u nga ngheni eximutanini.”+

27 Yesu ni vadyondzisiwa vakwe va suka va ya eswimitanini swa Khezariya wa Filipi, naswona loko va ri endleleni a sungula ku vutisa vadyondzisiwa vakwe, a ku eka vona: “Xana vanhu va ri ndzi mani?”+ 28 Va ku eka yena: “Yohane Mukhuvuri,+ naswona van’wana va ri, Eliya,+ kasi van’wanyana va ri, Un’wana wa vaprofeta.”+ 29 Hiloko a va tlhandleka xivutiso: “Kambe n’wina mi ri ndzi mani?” Petro a n’wi hlamula a ku: “U Kreste.”+ 30 Kutani a va lerisa hi matimba leswaku va nga byeli munhu ha yena.+ 31 Nakambe, a sungula ku va dyondzisa leswaku N’wana wa munhu u fanele ku xanisiwa swinene ni ku bakanyiwa hi vakulukumba ni vaprista lavakulu ni vatsari ivi a dlayiwa,+ kutani a pfuka hi siku+ ra vunharhu. 32 Hakunene, a a vula marito lawa hi vurhena. Kambe Petro a ya na yena etlhelweni kutani a sungula ku n’wi tshinya.+ 33 A hundzuluka, a languta vadyondzisiwa vakwe kutani a tshinya Petro, a ku: “Yana endzhaku ka mina, Sathana, hikuva a wu ehleketi miehleketo ya Xikwembu, kambe u ehleketa miehleketo ya vanhu.”+

34 Hiloko a vitana ntshungu wu ta eka yena wu ri ni vadyondzisiwa vakwe, a ku: “Loko munhu a lava ku ndzi landzela, a a titshike kutani a rhwala mhandzi yakwe ya nxaniso a ndzi landzela nkarhi hinkwawo.+ 35 Hikuva mani na mani loyi a lavaka ku ponisa moya-xiviri wakwe u ta lahlekeriwa hi wona; kambe mani na mani la lahlekeriwaka hi moya-xiviri wakwe hikwalaho ka mina ni hikwalaho ka mahungu lamanene u ta wu ponisa.+ 36 Kunene, xana munhu swi nga n’wi pfuna yini ku pindzula misava hinkwayo kambe a lahlekeriwa hi moya-xiviri wakwe?+ 37 Kunene, i yini lexi munhu a nga cincisaka moya-xiviri+ wakwe ha xona? 38 Hikuva mani na mani la khomiwaka hi tingana ha mina ni marito ya mina eka xitukulwana lexi xa vuoswi ni vudyoho, N’wana wa munhu na yena u ta khomiwa hi tingana+ ha yena loko a fika hi ku vangama ka Tata wakwe a ri ni tintsumi to kwetsima.”+