Genesa

13 Hiloko Abrama a huma aEgipta, yena ni nsati wakwe ni hinkwaswo leswi a a ri na swona, na Lota a ri na yena, va ya eNegebu.+ 2 Abrama a a ri ni mintlhambi yo tala ya swifuwo ni silivhere ni nsuku.+ 3 Kutani a famba a ri karhi a dzima mixaxa ni ku rhurha a huma eNegebu a ya eBethele, endhawini leyi ntsonga wa yena a wu ri eka yona ro sungula exikarhi ka Bethele na Ayi,+ 4 endhawini ya alitari leyi a nga yi endla eku sunguleni;+ kutani Abrama a ya emahlweni a vitana vito ra Yehovha.+

5 Lota loyi a a fambisana na Abrama, na yena a a ri ni tinyimpfu ni tihomu ni mintsonga. 6 Kutani tiko a ri va pfumelelanga leswaku va tshama swin’we, hikuva nhundzu ya vona a yi tele, hikwalaho a va swi kotanga ku tshama swin’we.+ 7 Kutani ku pfuka mholovo exikarhi ka varisi va swifuwo swa Abrama ni varisi va swifuwo swa Lota; hi nkarhi wolowo a ku tshama Mukanana ni Muperezi etikweni rero.+ 8 Hikwalaho Abrama a ku eka Lota:+ “Ndza ku kombela, u nga tshuki u pfumela leswaku ku va ni ku holova exikarhi ka mina na wena ni le xikarhi ka varisi va swifuwo swa mina ni varisi va swifuwo swa wena, hikuva hi vamakwerhu.+ 9 Xana tiko hinkwaro a ri ku pfulekelanga ke? Ndza ku kombela, hambana na mina. Loko u ya eximatsini, ndzi ta ya exineneni; kambe loko u ya exineneni, ndzi ta ya eximatsini.”+ 10 Kutani Lota a tlakusa mahlo a vona Muganga hinkwawo wa Yordani,+ leswaku hinkwawo a wu ri ndhawu leyi kumaka mati kahle loko Yehovha a nga si lovisa Sodoma na Gomora, a wu fana ni ntanga wa Yehovha,+ wu fana ni tiko ra Egipta ku ya fika eSowara.+ 11 Kutani Lota a hlawula Muganga hinkwawo wa Yordani, Lota a rhurhisa nxaxa wakwe a wu yisa evuxeni. Hiloko va hambana. 12 Abrama a tshama etikweni ra Kanana, kambe Lota a tshama exikarhi ka miti ya Muganga.+ A hetelela a dzime ntsonga wakwe ekusuhi na Sodoma. 13 Vanhu va Sodoma a va bihile naswona a va ri vadyohi lavakulu eka Yehovha.+

14 Yehovha a ku eka Abrama endzhaku ka loko Lota a hambane na yena: “Ndzi kombela u tlakusa mahlo ya wena, u languta tlhelo ra n’walungu ni tlhelo ra dzonga ni tlhelo ra vuxa ni tlhelo ra vupela-dyambu+ endhawini leyi u nga eka yona, 15 hikuva tiko hinkwaro leri u ri vonaka, ndzi ta ku nyika rona, wena ni mbewu ya wena hilaha ku nga riki na makumu.+ 16 Ndzi ta endla leswaku mbewu ya wena yi fana ni ntshuri wa misava, lerova loko munhu o kota ku hlaya ntshuri wa misava, hikwalaho ni mbewu ya wena yi ta hlayiwa.+ 17 Suka u yima, u rhendzeleka etikweni ku vona ku leha ni ku anama ka rona, hikuva ndzi ta ku nyika rona.”+ 18 Kutani Abrama a hambeta a tshama emintsongeni. Endzhakunyana a ya tshama exikarhi ka mirhi leyikulu ya Mamre+ leyi nga eHebroni;+ kwalaho a akela Yehovha+ alitari.