Yobo

 2 “Yingisani rito ra mina hi rixaladza,

Naswona a ri mi chavelele.

 3 Ndzi lehiseleni mbilu, mina ndzi ta vulavula;

Naswona un’wana ni un’wana wa n’wina u ta hlekula endzhaku ka loko se ndzi vulavurile.+

 4 Loko ku ri mina, xana leswi swi ndzi karhataka ndzi swi byela munhu?

Kumbe, hikwalaho ka yini moya wa mina wu nga heli matimba?

 5 Hundzuluxelani swikandza swa n’wina eka mina mi ndzi languta hi ku hlamala,

Mi veka voko ra n’wina enon’wini+ wa n’wina.

 6 Loko ndzi tsundzuka, ndza karhateka,

Naswona nyama ya mina ya rhurhumela.

 7 Hikwalaho ka yini lavo homboloka va hambeta va hanya,+

Va dyuhala, va tlhela va va ni rifuwo ro tala?+

 8 Vana va vona va simekiwe va tiya emahlweni ka vona,

Ni vatukulu va vona ematihlweni ya vona.

 9 Tindlu ta vona i ku rhula, ku chava a ku kona,+

Ni nhonga ya Xikwembu a yi kona ehenhla ka vona.

10 Entiyisweni nkunzi ya yena ya mithisa, a yi yi chululi mbewu ya ku veleka;

Homu ya yena ya veleka,+ a yi holoti.

11 Va tshamela ku humesa vafana va vona ku fana ni ntlhambi,

Ni vana va vona vaxinuna va tlula-tlula.

12 Va hambeta va tlakusa rito ra vona hi xingomana ni haripa,+

Naswona va hambeta va tsaka hi mpfumawulo wa nanga.

13 Va heta masiku ya vona va ri eku titsakiseni,+

Naswona va hatla va rhelela eSheol.

14 Va byela Xikwembu xa ntiyiso va ku, ‘Hi fularhele!+

Ku tiva tindlela ta wena a ku hi tsakisanga.+

15 Xana Lowa Matimba Hinkwawo wo va yini, leswaku hi n’wi tirhela,+

Naswona hi pfuneka ha yini leswi hi tihlanganisaka na yena?’+

16 Waswivo! Vutomi bya vona a byi le matimbeni ya vona.+

Xitsundzuxo xa lavo homboloka xi tshama xi ri ekule na mina.+

17 I kangani rivoni ra lavo homboloka ri timiwa,+

Naswona i kangani makhombo ya vona ma va wela ehenhla?

Xana i kangani xi va lovisa hi vukarhi bya xona?+

18 Xana va fana ni byanyi emahlweni ka mheho,+

Ni mungu lowu yiviweke hi mheho?

19 Xikwembu xi ta hlayisa ku biha ka munhu, xi ku hlayisela vana vakwe;+

Xi ta n’wi riha, leswaku a ta swi tiva.+

20 Mahlo ya xona ma vona ku bola ka yena,

Naswona u ta nwa+ evukarhini bya Lowa Matimba Hinkwawo.

21 Xana ntsako wakwe wu ta va yini endlwini yakwe, endzhaku kakwe,

Loko hakunene nhlayo ya tin’hweti ta yena yi tsemiwa hi le xikarhi?+

22 Xana a nga dyondzisa Xikwembu vutivi,+

Loko xona hi xoxe xi avanyisa lava tlakukeke?+

23 Yoloye u ta fa a enerisekile hi ku helela,+

Loko a nga karhatiwi hi nchumu nikatsongo naswona a tshamisekile;

24 Loko mindzhumbi yakwe yi tele hi mafurha,

Ni mongo wa marhambu yakwe wu tshama wu tsakama.

25 Loyi un’wana u ta fa a ri ni moya-xiviri lowu vavisekeke

A nga dyanga swilo leswinene.+

26 Va ta etlela swin’we entshurini+

Ni swivungu swi ta va funengeta.+

27 Waswivo! Ndzi yi tiva kahle miehleketo ya n’wina

Ni makungu ya n’wina ya tihanyi yo lwa na mina.+

28 Hikuva mi ri, ‘Xana yi kwihi yindlu ya lowa xiyimo xa le henhla,

Naswona wu kwihi ntsonga, vutshamo bya lavo homboloka?’+

29 Xana mi va vutisile lava fambaka emagondzweni?

Xana a mi swi kambisisi hi vukheta swikombiso swa vona,

30 Leswaku hi siku ra khombo lowo biha wa tsetseleriwa,+

Wa kutsuriwa hi siku ra ku hlundzuka?

31 I mani la nga ta n’wi byela ndlela yakwe exikandzeni xakwe?+

Naswona i mani la nga ta n’wi hakela eka leswi a swi endleke?+

32 Loko ku ri yena, u ta yisiwa esirheni,+

Naswona murindzi u ta vekiwa ehenhla ka sirha-bako.

33 Kunene mabuwa ya misava ya le nkoveni ma ta n’wi tsokombelela,+

U ta koka vanhu hinkwavo va n’wi landzela,+

Naswona lava n’wi landzelaka va tele ngopfu.

34 Hakunene n’wina mi ringeta ku ndzi chavelela hi vuhava,+

Naswona nkarhi hinkwawo ma angulelo ya n’wina a ma tshembeki!”