Genesa
23 Vutomi bya Sara byi va malembe ya 127. A ku ri wona malembe ya vutomi bya Sara.+ 2 Kutani Sara a fela eKiriyati-aba,+ leswi vulaka Hebroni,+ etikweni ra Kanana,+ Abrahama a fika a ta ba nkosi wa Sara ni ku n’wi rila. 3 Kutani Abrahama a suka emahlweni ka mufi wakwe a ya vulavula ni vana va Heti,+ a ku: 4 “Ndzi muluveri ni nhlapfa exikarhi ka n’wina.+ Ndzi nyikeni ndhawu ya xilahlo exikarhi ka n’wina leswaku ndzi ta lahla mufi wa mina a suka ematihlweni+ ya mina.” 5 Hiloko vana va Heti va hlamula Abrahama va ku: 6 “Hi yingise, hosi yanga.+ U ndhuna ya Xikwembu exikarhi ka hina.+ Lahla mufi+ wa wena eswilahlweni swa hina swo hlawuleka. A nga kona ni un’we eka hina la nga alaka ni xilahlo xakwe, a ku sivela ku lahla mufi+ wa wena.”
7 Hi nkarhi wolowo Abrahama a suka a nkhinsama eka vanhu lava tumbulukeke+ kwalaho, ku nga vana va Heti,+ 8 a vulavula na vona, a ku: “Loko mimoya-xiviri ya n’wina yi pfumela leswaku ndzi lahla mufi wa mina a suka ematihlweni ya mina, ndzi yingiseni naswona mi ya ndzi khongotelela Efroni n’wana wa Sohari,+ 9 leswaku a ndzi nyika bako ra Makapela,+ leri nga ra yena, leri nga emakumu ka nsimu yakwe. A a ndzi nyike rona hi ntsengo hinkwawo wa silivhere exikarhi ka n’wina leswaku yi ta va ndhawu ya xilahlo.”+
10 Loko va ri karhi va vulavula tano, Efroni a a tshame exikarhi ka vana va Heti. Kutani Efroni wa Muheti+ a hlamula Abrahama, vana va Heti ni hinkwavo lava nghenaka hi nyangwa ya muti va yingisile, a ku:+ 11 “E-e, hosi yanga! Ndzi yingise. Ndzi ku nyika nsimu ni bako leri ri nga eka yona. Ndzi ku nyika yona ematihlweni ya varikwerhu.+ Lahla mufi wa wena.” 12 Hiloko Abrahama a nkhinsama emahlweni ka vanhu lava tumbulukeke kwalaho 13 naswona a vulavula na Efroni emahlweni ka vanhu lava tumbulukeke kwalaho, a ku: “Ntsena loko wo—e-e, ndzi yingise! Ndzi ta ku nyika ntsengo wa silivhere ya nsimu. Yi teke+ leswaku ndzi kota ku lahla mufi wa mina kona.”
14 Kutani Efroni a hlamula Abrahama, a ku eka yena: 15 “Hosi yanga, ndzi yingise. Xiphemu xa nsimu lexi vitanaka tixikele ta silivhere ta 400, i yini exikarhi ka mina na wena? Hikokwalaho lahla mufi+ wa wena.” 16 Hikwalaho Abrahama a yingisa Efroni, kutani Abrahama a pimela Efroni ntsengo wa silivhere lowu a wu vuleke, vana va Heti va yingisile, tixikele ta silivhere ta 400 leti tirhisiwaka hi vabindzuri.+ 17 Hikwalaho nsimu ya Efroni leyi a yi ri eMakapela, leyi nga emahlweni ka Mamre, nsimu ni bako leri a ri ri eka yona ni mirhi hinkwayo leyi a yi ri ensin’wini,+ leyi a yi ri endzeni ka mindzilakana leyi a yi yi rhendzerile, swi tiyisekisiwa+ 18 eka Abrahama swi ri ndhawu leyi a yi xaveke emahlweni ka vana hinkwavo va Heti lava nghenaka hi nyangwa ya muti.+ 19 Endzhaku ka sweswo Abrahama a lahla Sara nsati wakwe ebakweni ra nsimu ya Makapela emahlweni ka Mamre, leswi vulaka Hebroni, etikweni ra Kanana.+ 20 Kutani nsimu ni bako leri a ri ri eka yona swi tiyisekisiwa eka Abrahama swi ri xilahlo emavokweni ya vana va Heti.+