24 Kutani mi fanele mi vitana vito ra xikwembu xa n’wina+ na mina ndzi ta vitana vito ra Yehovha. Xikwembu lexi nga ta hlamula hi ku rhumela ndzilo, hi xona Xikwembu xa ntiyiso.”+ Hiloko vanhu hinkwavo va hlamula va ku: “Leswi u swi vulaka swi kahle.”

25 Eliya a ya emahlweni a byela vaprofeta va Bali a ku: “Tihlawuleleni xinkuzana mi rhanga mi xi lunghisa, hikuva n’wina mi tele. Endzhaku mi vitana vito ra xikwembu xa n’wina kambe mi nga xi tshiveleli ndzilo.”