Tihosi To Sungula
4 Hosi Solomoni a a fuma tiko hinkwaro ra Israyele.+ 2 Tindhuna takwe* a ku ri leti: Azariya n’wana wa Sadoki+ a a ri muprista; 3 Elihorefe na Ahiya vana va Xixa a va ri vamatsalana;+ Yehoxafati+ n’wana wa Ahiludi a a ri mutsari wa matimu; 4 Benaya+ n’wana wa Yoyada a a ri ndhuna ya vuthu; Sadoki na Abiyatara+ a va ri vaprista; 5 Azariya n’wana wa Nathani+ a a ri murhangeri wa tindhuna; Zabudu n’wana wa Nathani a a ri muprista naswona a a ri munghana wa hosi;+ 6 Ahixara a a ri mulanguteri wa yindlu ya hosi; Adoniramu+ n’wana wa Abida a a ri mulanguteri wa mahlonga ya hosi.+
7 Solomoni a a ri ni tindhuna ta 12 etikweni hinkwaro ra Israyele, leti a ti phamela hosi ni vandyangu wa yona. Ndhuna yin’wana ni yin’wana a yi fanele yi phamela swakudya n’hweti yin’we hi lembe.+ 8 Mavito ya tona hi lawa: N’wana wa Huru endhawini ya tintshava ya Efrayimi; 9 n’wana wa Dekera a a ri mulanguteri eMakazi, eXalabimi,+ eBeta-xemexe ni le Eloni-beta-hanana; 10 n’wana wa Hesede eAruboti (a a ri mulanguteri eSokho ni le tikweni hinkwaro ra Hefere); 11 n’wana wa Abinadaba, eswintshabyanini hinkwaswo swa Dori (Tafata, n’wana wa Solomoni u ve nsati wakwe); 12 Bana n’wana wa Ahiludi eTanaka, eMegido+ ni le Beta-xeyani+ hinkwaro, tiko leri nga etlhelo ka Saretana ehansi ka Yizriyele, ku suka eBeta-xeyani ku ya eAvele-mehola, ku ya fika exifundzheni xa Yokimiyama;+ 13 n’wana wa Gebere eRhamoti-giliyadi+ (a a lawula swimitana leswi nga ni matende swa Yayiri+ n’wana wa Manase, leswi nga eGiliyadi;+ nakambe a a lawula xifundzha xa Arigobi,+ lexi nga eBaxani:+ miti leyikulu ya 60 leyi nga ni makhumbi ni swo goga ha swona swa koporo); 14 Ahinadaba n’wana wa Ido eMahanayimi;+ 15 Ahimazi eNeftali (u teke Basemata n’wana un’wana wa Solomoni a va nsati wakwe); 16 Bana n’wana wa Huxayi eAxere ni le Beyaloto; 17 Yehoxafati n’wana wa Paruwa eIsakara; 18 Ximeyi+ n’wana wa Ela eBenjamini;+ 19 Gebere n’wana wa Uri etikweni ra Giliyadi,+ ku nga tiko ra Sihoni+ hosi ya Vaamori na Ogo+ hosi ya Baxani. Nakambe a ku ri ni ndhuna yin’we leyi a yi ri mulanguteri wa tindhuna letin’wana hinkwato etikweni.
20 Vanhu va Yuda ni va Israyele a va tele ku fana ni sava ra lwandle;+ a va dya, va nwa va tlhela va tsaka.+
21 Solomoni a a fuma mifumo hinkwayo ku suka eNambyeni*+ ku ya etikweni ra Vafilista ni ku ya fika endzilakaneni wa Egipta. Vanhu va matiko wolawo a va hakela xibalo va tlhela va tirhela Solomoni masiku hinkwawo ya vutomi bya yena.+
22 Swakudya swa Solomoni swa siku ni siku a ku ri mpimo wa tikoro* ta 30 ta mapa lama silekeke kahle ni mpimo wa tikoro ta 60 ta mapa, 23 tihomu ta khume leti noneke ni tihomu ta 20 leti tekiweke emadyelweni ni tinyimpfu ta 100, ku nga hlayiwi timbavala, timhala, tinhlangu ni swinyenyana swo nona. 24 Hikuva a a lawula swilo hinkwaswo leswi nga etlhelweni leri ra Nambu,*+ ku sukela eTifisa ku ya eGaza,+ ku katsa ni tihosi hinkwato ta tlhelo rero ra Nambu; tiko hinkwaro ku katsa ni mindzilakano ya rona a ri rhurile.+ 25 Emasikwini hinkwawo ya ku fuma ka Solomoni, vanhu va Yuda ni va Israyele va tshame va sirhelelekile, un’wana ni un’wana ehansi ka mudiriva wakwe ni le hansi ka nkuwa wakwe, ku suka eDani ku ya eBera-xeba.
26 Solomoni a a ri ni swivala swa 4 000* swa tihanci leti a ti koka makalichi yakwe naswona a a ri ni tihanci* ta 12 000.+
27 Tindhuna leti a ti nyika Hosi Solomoni swakudya ku katsa ni vanhu hinkwavo lava a va dya etafuleni ra Hosi Solomoni. Ndhuna yin’wana ni yin’wana a yi tirha n’hweti yin’we naswona a yi fanele yi tiyiseka leswaku a ku pfumaleki nchumu.+ 28 Ti tlhela ti tisa maxalana ni byanyi kun’wana ni kun’wana laha a swi laveka kona, ti tisela tihanci ni tihanci leti a ti koka makalichi, ndhuna yin’wana ni yin’wana a yi tisa hi nkarhi lowu a yi vekeriwe wona.
29 Xikwembu xi nyika Solomoni vutlhari ni ku twisisa lokukulu ni mbilu leyi taleke ku twisisa, ku fana ni sava leri nga eribuweni ra lwandle.+ 30 Vutlhari bya Solomoni a byi tlula vutlhari bya vanhu hinkwavo va le Vuxeni ni vutlhari hinkwabyo bya le Egipta.+ 31 A a tlharihe ku tlula vanhu hinkwavo, a a tlharihe ku tlula na Ethani+ wa ka Ezra na Hemani,+ Kalkolo+ na Dara vana va Maholi; a a dume ematikweni hinkwawo lawa a va akelane na wona.+ 32 U tsale swivuriso+ swa 3 000 kasi tinsimu+ takwe a ti ri 1 005. 33 A a kota ku hlamusela mirhi, ku suka eka mukedari lowu nga eLebanoni ku ya eka murhi wa hisopa+ lowu milaka ekhumbini; a a kota ku hlamusela swiharhi,+ swinyenyana,+ swikokovi*+ ni tihlampfi. 34 Vanhu lava humaka ematikweni hinkwawo a va ta va ta twa vutlhari bya Solomoni, ku katsa ni tihosi leti humaka emisaveni hinkwayo, leti a ti twe hi ta vutlhari byakwe.+