Tikronika To Sungula

17 Kuteloko Davhida a tshamisekile endlwini* yakwe, a byela muprofeta Nathani+ a ku: “Vona, mina ndzi tshama endlwini leyi akiweke hi mikedari,+ kasi areka ya ntwanano wa Yehovha yi le tendeni leri endliweke hi malapi.”+ 2 Nathani a hlamula Davhida a ku: “Endla leswi naveriwaka hi mbilu ya wena, hikuva Xikwembu xa ntiyiso xi na wena.”

3 Hi vusiku byebyo, rito ra Xikwembu ri fika eka Nathani ri ku: 4 “Famba u ya byela nandza wa mina Davhida u ku, ‘Yehovha u ri: “A hi wena loyi u nga ta ndzi akela yindlu leyi ndzi nga ta tshama eka yona.+ 5 Hikuva a ndzi si tshama endlwini ku sukela esikwini leri ndzi humeseke Vaisrayele ku fikela namuntlha, kambe a ndzi tshama etendeni rin’wana ndzi suka ndzi ya eka rin’wana ni le tabernakeleni yin’wana ku ya eka yin’wana.+ 6 Enkarhini hinkwawo lowu a ndzi fambafamba ni Vaisrayele hinkwavo, xana ndzi tshame ndzi byela vaavanyisi va Israyele lava ndzi va vekeke ku risa vanhu va mina ndzi ku, ‘Hikwalaho ka yini mi nga ndzi akelanga yindlu ya mikedari?’”’

7 “Sweswi byela nandza wa mina Davhida u ku, ‘Yehovha wa mavuthu u ri: “Ndzi ku suse emadyelweni, eku riseni ka ntlhambi, leswaku u va murhangeri wa vanhu va mina, ku nga Israyele.+ 8 Naswona ndzi ta va na wena kun’wana ni kun’wana laha u yaka kona,+ ndzi ta herisa valala va wena hinkwavo emahlweni ka wena;+ ndzi ta ku endlela vito ku fana ni vanhu va ndhuma emisaveni.+ 9 Ndzi ta hlawulela vanhu va mina, Israyele, ndhawu yo tshama eka yona, va ta tshama kwalaho hi ku rhula, a va nge he karhatiwi; vanhu vo homboloka a va nge he tlheli va va xanisa hilaha va endleke hakona,+ 10 hi nkarhi lowu ndzi hlawuleke vaavanyisi leswaku va rhangela vanhu va mina, Israyele.+ Ndzi ta hlula valala va wena hinkwavo.+ Ku tlula kwalaho, ndza ku byela, ‘Yehovha u ta ku akela yindlu.’

11 “‘“Loko masiku ya wena ma hela, u lahliwa ni vakokwa wa wena, ndzi ta hlawula un’wana wa vana* va wena+ ndzi simeka vuhosi bya yena byi tiya.+ 12 Hi yena loyi a nga ta ndzi akela yindlu+ naswona ndzi ta tiyisa xiluvelo xakwe hilaha ku nga heriki.+ 13 Ndzi ta va tata wa yena, yena u ta va n’wana wa mina.+ Rirhandzu ra mina lerikulu a ndzi nge ri susi eka yena+ hi ndlela leyi ndzi ri suseke ha yona eka loyi a a ri emahlweni ka wena.+ 14 Ndzi ta endla leswaku a tshama endlwini ya mina ni le vuhosini bya mina hilaha ku nga heriki+ naswona xiluvelo xakwe xi ta tshama hilaha ku nga heriki.”’”+

15 Nathani a byela Davhida marito wolawo hinkwawo ni xivono xolexo hinkwaxo.

16 Endzhaku ka sweswo Hosi Davhida a nghena a tshama emahlweni ka Yehovha, a ku: “Yehovha Xikwembu, xana ndzo va mani? Naswona ndyangu wa mina wo va yini leswi u ndzi hlayiseke ku ta fikela namuntlha?+ 17 Ku engetela kwalaho, Xikwembu xanga, u tlhela u boxa timhaka leti khumbaka vumundzuku bya ndyangu wa mina nandza wa wena,+ Yehovha Xikwembu u ndzi fanise ni munhu loyi a faneriwaka hi ku tlakusiwa. 18 Xana mina Davhida nandza wa wena ndzi nga ha ku byela yini swin’wana, hi vuhosi lebyi u ndzi nyikeke byona hikuva u ndzi tiva kahle?+ 19 Yehovha Xikwembu xanga, hikwalaho ka mina nandza wa wena ni hi ku pfumelelana ni mbilu ya wena, u endle swilo leswi hinkwaswo swo hlamarisa hi ku paluxa vukulu bya wena.+ 20 A nga kona wo fana na wena Yehovha Xikwembu xanga+ naswona a ku na Xikwembu handle ka wena;+ hinkwaswo leswi hi swi tweke hi tindleve ta hina swi tiyisekisa mhaka leyi. 21 Naswona hi rihi tiko rin’wana leri fanaka ni vanhu va wena, Vaisrayele, laha misaveni?+ Xikwembu xa ntiyiso xi tikutsulele vona tanihi vanhu va xona.+ U tiendlele vito hi ku endla swilo swo hlamarisa swinene.+ U hlongole matiko hikwalaho ka vanhu va wena+ lava u va poniseke eEgipta. 22 U endle leswaku Vaisrayele va va vanhu va wena hilaha ku nga heriki;+ kasi wena, Wena Yehovha u ve Xikwembu xa vona.+ 23 Sweswi, Yehovha Xikwembu xanga, onge switshembiso leswi u swi endleke mayelana ni nandza wa wena ni ndyangu wakwe swi nga hetiseka hilaha ku nga heriki naswona onge u nga endla hilaha u tshembiseke hakona.+ 24 Vito ra wena a ri dzunisiwe hilaha ku nga heriki,+ leswaku vanhu va ta ku, ‘Yehovha wa mavuthu, Xikwembu xa Israyele, i Xikwembu xa Israyele,’ ndyangu wa nandza wa wena Davhida a wu simekiwe wu tiya emahlweni ka wena.+ 25 Hikuva wena Xikwembu xanga, u hlavutele nandza wa wena xikongomelo xa wena xo n’wi akela yindlu. Hi yona mhaka nandza wa wena a nga ni xivindzi xo khongela eka wena hi mhaka leyi. 26 Yehovha u Xikwembu xa ntiyiso naswona u tshembise nandza wa wena swilo leswi leswinene. 27 Kutani a swi ku tsakise ku katekisa ndyangu wa nandza wa wena naswona a wu tshame hilaha ku nga heriki emahlweni ka wena, hikuva wena Yehovha Xikwembu xanga, u wu katekisile naswona wu katekile hilaha ku nga heriki.”