Ezekiyele

41 Hiloko a ndzi yisa endhawini yo kwetsima ya le handle,* kutani a pima tiphuphu ta le matlhelo; a ti aname swisungunu swa tsevu* eka tlhelo rin’wana ti anama swisungunu swa tsevu eka tlhelo lerin’wana. 2 Ndhawu yo nghena ha yona a yi aname swisungunu swa khume* naswona makhumbi ya le matlhelo ya le ndhawini yo nghena ha yona a ma aname swisungunu swa ntlhanu* eka tlhelo rin’wana na swisungunu swa ntlhanu eka tlhelo lerin’wana. A pima ku leha ka tempele a ku ri swisungunu swa 40,* yi anama swisungunu swa 20.*

3 Hiloko a nghena endzeni,* a pima phuphu ya le tlhelo endhawini yo nghena ha yona, a yi bumbule swisungunu swimbirhi,* kasi ndhawu yo nghena ha yona a yi aname swisungunu swa tsevu. Makhumbi ya le matlhelo ya le ndhawini yo nghena ha yona a ma aname swisungunu swa nkombo.* 4 Endzhaku a pima kamara leri languteke ndhawu yo kwetsima ya le handle, a ri lehe swisungunu swa 20 ri anama swisungunu swa 20.+ Kutani a ku eka mina: “Leri i Kamara Ro Kwetsima Ngopfu.”+

5 Endzhaku ka sweswo, a pima khumbi ra tempele, a ri bumbule swisungunu swa tsevu. Makamara ya le matlhelo lama rhendzeleke tempele a ma aname swisungunu swa mune.*+ 6 Makamara ya le matlhelo a ma ri swithezi swinharhu, xin’we ehenhla ka xin’wana, xithezi xin’we a xi ri ni makamara ya 30. A ku ri ni swilo swo tshega ha swona leswi a swi rhendzela khumbi ra tempele leswi a swi seketela makamara ya le matlhelo leswaku khumbi ra tempele ri nga boxiwi.+ 7 Eka matlhelo hamambirhi ya tempele a ku ri ni phaseji leyi rhendzelekaka* leyi a yi anama loko yi ri karhi yi ya eka makamara ya le henhla.+ A yi ya yi anama ku suka eka xithezi xin’wana ku ya eka xin’wana, loko munhu a ri karhi a ya ehenhla a suka eka xithezi xa le hansi a hundza hi le ka xithezi xa le xikarhi a ya eka xithezi xa le henhla.

8 Ndzi vone xitupu lexi tlakukeke ematlhelo hinkwawo ya tempele naswona masungulo ya makamara ya le matlhelo a ma ringana ni rihlanga leri heleleke leri a ri ri swisungunu swa tsevu ku fika ekhonweni. 9 Khumbi ra le handle ra makamara ya le matlhelo a ri aname swisungunu swa ntlhanu. A ku ri ni ndhawu leyi pfulekeke* etlhelo ka makamara ya le matlhelo leyi a yi ri xiphemu xa tempele.

10 Exikarhi ka tempele ni makamara yo dyela eka wona+ a ku ri ni ndhawu leyi a yi aname swisungunu swa 20 eka tlhelo ha rin’we. 11 A ku ri ni ndhawu yo nghena ha yona exikarhi ka makamara ya le matlhelo ni ndhawu leyi pfulekeke etlhelweni ra le n’walungwini naswona a ku ri ni ndhawu yin’wana yo nghena ha yona etlhelweni ra le dzongeni. Ndhawu leyi pfulekeke a yi aname swisungunu swa ntlhanu matlhelo hinkwawo.

12 Muako lowu a wu ri evupeladyambu lowu a wu langute ndhawu leyi pfulekeke a wu aname swisungunu swa 70* wu leha swisungunu swa 90;* khumbi ra muako a ri bumbule swisungunu swa ntlhanu matlhelo hinkwawo.

13 Hiloko a pima tempele, a yi lehe swisungunu swa 100.* Ndhawu leyi pfulekeke, muako* ni makhumbi ya wona na swona a swi lehe swisungunu swa 100. 14 Ku anama ka xiphemu xa le mahlweni xa tempele lexi languteke evuxeni ni ku anama ka ndhawu leyi pfulekeke a ku ri swisungunu swa 100.

15 A pima ku leha ka xiphemu xa muako lexi languteke ndhawu leyi pfulekeke endzhaku ka tempele, swin’we ni tiphaseji ta wona eka matlhelo hamambirhi, a swi ri swisungunu swa 100.

A tlhela a pima ndhawu yo kwetsima ya le handle, ndhawu yo kwetsima+ ya le ndzeni ni makupakupa ya xivava,* 16 ku katsa ni tindhawu to nghena ha tona, mafasitere lama nga ni tifureme+ to lala ni tiphaseji leti a ti ri etindhawini teto tinharhu. Ekusuhi ni ndhawu yo nghena ha yona a ku namekiwe mapulanga+ ku suka ehansi ku ya fika emafasitereni; mafasitere a ma funengetiwile. 17 Ku pimiwe ehenhla ka ndhawu yo nghena ha yona ni le ndzeni ka tempele ni le handle ka yona ni khumbi hinkwaro matlhelo hinkwawo. 18 A ku ri ni swifaniso swa makerubu+ leswi kovotliweke ni swifaniso swa murhi wa ncindzu,+ exikarhi ka makerubu mambirhi a ku ri ni murhi wa ncindzu naswona kerubu rin’wana ni rin’wana a ri ri ni swikandza swimbirhi. 19 Xikandza xa munhu a xi langute murhi wa ncindzu eka tlhelo rin’wana, xikandza xa nghala a xi langute murhi wa ncindzu eka tlhelo lerin’wana.+ A swi kovotliwe hi ndlela leyi etempeleni hinkwayo. 20 Ku suka ehansi ku ya fika ehenhla ka ndhawu yo nghena ha yona a ku kovotliwe makerubu ni swifaniso swa murhi wa ncindzu ekhumbini ra ndhawu yo kwetsima.

21 Tifureme ta mavanti* ya ndhawu yo kwetsima a ti ri ni matlhelo ya mune lama ringanaka.+ Emahlweni ka ndhawu yo kwetsima* a ku ri ni nchumu lowu fanaka ni 22 altari ya mapulanga+ leyi a yi tlakuke swisungunu swinharhu* yi leha swisungunu swimbirhi. A yi ri ni tinsika etikhonweni naswona ehansi ni le matlhelo ka yona a yi endliwe hi mapulanga. Hiloko a ku eka mina: “Leri i tafula leri nga emahlweni ka Yehovha.”+

23 Ndhawu yo kwetsima ya le handle a yi ri ni tinyangwa timbirhi ni ndhawu yo kwetsima a yi ri ni tinyangwa timbirhi.+ 24 Tinyangwa ta kona a ti ri ni mavanti mambirhi lama a ma pfulekela endzeni ni le handle. 25 A ku ri ni makerubu ni swifaniso swa murhi wa ncindzu leswi kovotliweke etinyangweni ta ndhawu yo kwetsima, ku fana ni leswi kovotliweke emakhumbini.+ Nakambe a ku ri ni lwangu ra mapulanga emahlweni ka rikupakupa leri nga ehandle. 26 A ku ri ni mafasitere lama nga ni tifureme+ to lala ni swifaniso swa murhi wa ncindzu eka matlhelo hamambirhi ya rikupakupa ni le ka makamara ya le matlhelo ya tempele ni malwangu.