Tikronika To Sungula
21 Hiloko Sathana* a lwa ni Vaisrayele kutani a kucetela Davhida leswaku a hlaya Vaisrayele.+ 2 Kutani Davhida a byela Yowabu+ ni tindhuna a ku: “Fambani mi ya hlaya Vaisrayele ku suka eBera-xeba ku ya fika eDani;+ mi ndzi tisela nhlayo ya vona ndzi ta tiva leswaku i vangani.” 3 Kambe Yowabu a ku: “Onge Yehovha a nga andzisa vanhu vakwe ka dzana. Wena hosi yanga, xana vanhu lava hinkwavo a hi malandza ya wena? Hikwalaho ka yini hosi yanga yi lava ku endla mhaka yo tano? Hikwalaho ka yini u dyohisa Vaisrayele?”
4 Kambe hosi yi hlula Yowabu hi marito. Hiloko Yowabu a suka a ya hlaya vanhu etikweni hinkwaro ra Israyele, loko a hetile, a tlhelela eYerusalema.+ 5 Kutani Yowabu a nyika Davhida nhlayo ya vanhu lava a va hlayeke. Tiko hinkwaro ra Israyele a ri ri ni vavanuna va 1 100 000 lava hlomeke hi mabanga, eYuda a ku ri ni vavanuna va 470 000 lava hlomeke hi mabanga.+ 6 Kambe Levhi na Benjamini a va tsarisiwanga exikarhi ka vona,+ hikuva leswi vuriweke hi hosi a swi n’wi nyenyetsa Yowabu.+
7 Mhaka leyi a yi nga xi tsakisi nikatsongo Xikwembu xa ntiyiso, hiloko xi xupula Israyele. 8 Kutani Davhida a byela Xikwembu xa ntiyiso a ku: “Ndzi dyohe+ ngopfu hi ku endla leswi. Ndzi kombela u ndzi rivalela+ hikuva leswi ndzi swi endleke i vuphukuphuku lebyikulu.”+ 9 Hiloko Yehovha a vulavula na Gadi,+ loyi a a ri muvoni wa swivono swa Davhida a ku: 10 “Famba u ya byela Davhida u ku, ‘Yehovha u ri: “Ndzi veka swigwevo swinharhu emahlweni ka wena. Tihlawulele xin’we lexi ndzi nga ta ku ba ha xona.”’” 11 Hiloko Gadi a fika eka Davhida a ku: “Yehovha u ri, ‘Tihlawulele 12 loko u lava leswaku ku va ni ndlala malembe manharhu,+ kumbe leswaku u balekela banga ra valala va wena tin’hweti tinharhu,+ kumbe ku xupuriwa masiku manharhu hi banga ra Yehovha, laha ku nga ta va ni ntungu etikweni+ naswona ntsumi ya Yehovha yi lovisa+ vanhu etikweni hinkwaro ra Israyele.’ Ehleketisisa hi mhaka leyi leswaku ndzi ta hlamula Loyi a ndzi rhumeke.” 13 Hiloko Davhida a hlamula Gadi a ku: “Swa ndzi tikela swinene. Ndzi kombela ku wela evokweni ra Yehovha hikuva u ni musa swinene;+ kambe u nga ndzi tshiki ndzi wela emavokweni ya vanhu.”+
14 Hiloko Yehovha a vanga ntungu+ eIsrayele lerova ku fa vanhu va 70 000.+ 15 Ku tlula kwalaho, Xikwembu xa ntiyiso xi rhuma ntsumi eYerusalema leswaku yi ya wu lovisa; kambe loko ya ha lava ku wu lovisa, Yehovha a swi vona ivi a tisola hikwalaho ka khombo leri,+ kutani a byela ntsumi leyi a yi lovisa a ku: “Swi ringene!+ Ehlisa voko ra wena.” Ntsumi ya Yehovha a yi yime ekusuhi ni xivuya* xa Orinani+ wa Muyebusi.+
16 Loko Davhida a languta, a vona ntsumi ya Yehovha yi yime exikarhi ka misava ni matilo yi khome banga+ yi ri kombetele eYerusalema. Hiloko Davhida ni vakulukumba va tilahlela ehansi swikandza+ swa vona swi languta ehansi va tifunengete hi xiambalo* xo khwaxa.+ 17 Davhida a ku eka Xikwembu xa ntiyiso: “Xana a hi mina loyi a vuleke leswaku ku hlayiwa vanhu? Hi mina loyi a dyoheke, hi mina loyi a endleke xihoxo;+ kambe xana tinyimpfu leti ti fela yini? Yehovha Xikwembu xanga, ndzi kombela u xupula mina ni ndyangu wa tatana; kambe u nga tiseli vanhu va wena ntungu lowu.”+
18 Hiloko ntsumi ya Yehovha yi byela Gadi+ leswaku a byela Davhida a tlhandluka a ya akela Yehovha altari exivuyeni* xa Orinani wa Muyebusi.+ 19 Kutani Davhida a tlhandluka hilaha Yehovha a vuleke hakona hi ku tirhisa Gadi. 20 Hi nkarhi wolowo, Orinani a hundzuluka kutani a vona ntsumi, vana vakwe va mune lava a va ri na yena va tumbela. Orinani a a ri eku huleni ka koroni. 21 Loko Davhida a ya eka yena, Orinani a vona Davhida, xikan’wekan’we a huma exivuyeni a khinsama emahlweni ka Davhida xikandza xakwe xi langute ehansi. 22 Davhida a byela Orinani a ku: “Ndzi xavisele* ndhawu leyi xivuya xi nga eka yona leswaku ndzi ta akela Yehovha altari. Ndzi xavisele yona hi ntsengo lowu heleleke leswaku ntungu wu ta hela.”+ 23 Kambe Orinani a ku eka Davhida: “Yi teke yi va ya wena naswona hosi yanga a yi endle leswi yi vonaka swi fanerile. Hi leti tihomu, ti ta va magandzelo yo hisiwa ni xileyi xo hula mavele+ u ta tshivela ndzilo hi xona ni koroni yi ta va gandzelo ra mavele. Ndzi humesa hinkwaswo.”
24 Kambe Hosi Davhida a hlamula Orinani a ku: “E-e, u fanele u ndzi xavisela yona hi ntsengo lowu heleleke, hikuva a ndzi nge teki leswi nga swa wena ndzi swi nyika Yehovha kumbe ndzi endla magandzelo yo hisiwa hi swilo leswi ndzi nga swi xavangiki.”+ 25 Hiloko Davhida a nyika Orinani swiphemu* swa nsuku swa 600 leswi kariweke leswaku a xava ndhawu yoleyo. 26 Kutani Davhida a akela Yehovha altari+ kwalaho, a endla magandzelo yo hisiwa ni magandzelo yo kombela ku rhula naswona u vitane Yehovha loyi a n’wi hlamuleke hi ku rhumela ndzilo+ lowu humaka ematilweni ehenhla ka altari ya gandzelo ro hisiwa. 27 Kutani Yehovha a lerisa ntsumi+ leswaku yi tlherisela banga enkotlotweni wa rona. 28 Hi nkarhi wolowo, loko Davhida a vona leswaku Yehovha u n’wi hlamurile exivuyeni xa Orinani wa Muyebusi, a ya emahlweni a endla gandzelo kwalaho. 29 Hambiswiritano, tabernakela ya Yehovha leyi Muxe a yi endleke emananga ni altari ya gandzelo ro hisiwa, a swi ri endhawini leyi tlakukeke eGibiyoni+ hi nkarhi wolowo. 30 Kambe Davhida a nga swi kotanga ku ya kwalaho leswaku a ya vutisa Xikwembu hikuva a a chava banga ra ntsumi ya Yehovha.