Tikronika To Sungula

29 Kutani Hosi Davhida a byela vanhu hinkwavo a ku: “Solomoni n’wananga loyi Xikwembu xi n’wi hlawuleke,+ wa ha ri ntsongo naswona a nga na ntokoto,+ ntirho i wukulu hikuva tempele* leyi faneleke yi akiwa a hi ya munhu, kambe i ya Yehovha Xikwembu.+ 2 Ndzi tikarhatile leswaku ndzi hlengeleta swilo leswi nga ta tirhiseriwa ku aka yindlu ya Xikwembu xa mina, ndzi hlengelete nsuku wa leswi nga ta lava nsuku, silivhere ya leswi nga ta lava silivhere, koporo ya leswi nga ta lava koporo, nsimbhi ya leswi nga ta lava nsimbhi,+ timhandzi+ ta leswi nga ta lava timhandzi, maribye ya onikisi, maribye yo sasekisa ha wona, swiribyana swa mivalavala, maribye ya muxaka wun’wana ni wun’wana wa risima ni maribye yo tala ya alabasta. 3 Ku tlula kwalaho, leswi ndzi rhandzaka yindlu ya Xikwembu xa mina,+ ka ha ri ni rifuwo ra mina+ ra nsuku ni silivhere leri ndzi ri nyikelaka eka yindlu ya Xikwembu xanga, ku engetela eka swilo hinkwaswo leswi ndzi swi hlengeleteleke yindlu yo kwetsima, 4 ku katsa ni titalenta* ta 3 000 ta nsuku wa le Ofiri+ ni titalenta ta 7 000 ta silivhere leyi tengisiweke yo phama makhumbi ya tiyindlu, 5 nsuku wa leswi nga ta lava nsuku ni silivhere ya leswi nga ta lava silivhere ni swa mitirho hinkwayo leyi nga ta endliwa hi vanhu lava tivaka ntirho wa mavoko. Xana u kona loyi a nga tsakelaka ku nyika Yehovha nyiko?”+

6 Hiloko tihosana ta mindyangu, tihosana ta tinyimba ta Israyele, tindhuna ta vanhu va magidi ni ta vanhu va madzana+ ni tindhuna leti langutelaka ntirho wa hosi+ ti ta hi ku swi rhandza. 7 Kutani ti nyikela endlwini ya Xikwembu xa ntiyiso nsuku lowu ringanaka titalenta ta 5 000, tidarika* ta 10 000, silivhere leyi ringanaka titalenta ta 10 000, koporo leyi ringanaka titalenta ta 18 000 ni nsimbhi leyi ringanaka titalenta ta 100 000. 8 Hinkwavo lava a va ri ni maribye ya risima va nyikele hi wona leswaku ma va xuma xa yindlu ya Yehovha, Yehiyele+ wa Mugerixoni+ hi yena loyi a a ri mulanguteri wa xuma xexo. 9 Vanhu va tsaka hikwalaho ka minyikelo leyi va yi nyikeleke, hikuva va nyikele eka Yehovha hi timbilu ta vona hinkwato+ hambi ku ri hosi Davhida a a tsakile swinene.

10 Hiloko Davhida a dzunisa Yehovha emahlweni ka nhlengeletano hinkwayo. Kutani a ku: “Onge u nga dzunisiwa, Yehovha Xikwembu xa Israyele tata wa hina, hilaha ku nga heriki. 11 Yehovha, vukulu,+ matimba,+ ku saseka, vunene ni xindzhuti i swa wena,+ hikuva hinkwaswo leswi nga ematilweni ni le misaveni i swa wena.+ Mfumo i wa wena Yehovha Xikwembu xanga.+ U tlakukile eka swilo hinkwaswo. 12 Rifuwo ni ku vangama i swa wena+ naswona u fuma swilo hinkwaswo,+ evokweni ra wena ku ni matimba+ ni ntamu,+ voko ra wena ri kota+ ku endla swilo leswikulu ni ku nyika hinkwavo ntamu.+ 13 Kutani sweswi, wena Xikwembu xa hina, ha ku khensa ni ku dzunisa vito ra wena ro saseka.

14 “Nakambe ndzo va mani mina ni vanhu va mina vo va yini lerova hi kota ku endla magandzelo yo tirhandzela yo fana ni lawa? Hikuva swilo hinkwaswo swi huma eka wena naswona hi ku nyike leswi hi swi kumaka eka wena. 15 Hikuva eka wena hi fana ni valuveri ku fana ni vakokwa wa hina hinkwavo.+ Masiku ya hina emisaveni ma fana ni ndzhuti,+ a ku na ntshembo eka wona. 16 Yehovha Xikwembu xa hina, rifuwo leri hinkwaro leri hi ri hlengeleteke leswaku hi ta ku akela yindlu leyi nga ta vangamisa vito ra wena ro kwetsima, ri huma eka wena naswona hinkwaro i ra wena. 17 Wena Xikwembu xanga, ndzi swi tiva kahle leswaku u kambisisa mbilu+ naswona u rhandza munhu wo tshembeka.+ Ndzi nyikele swilo leswi hinkwaswo hi ku swi rhandza, kutani ndzi tsakile loko ndzi vona vanhu va wena lava nga kona laha va nyikela hi mbilu yo basa. 18 Yehovha Xikwembu xa Abrahama, Isaka na Israyele, vakokwa wa hina, pfuna vanhu lava leswaku va ya emahlweni va va ni moya lowu va nga na wona wa ku tinyiketela ni ku ku tirhela hi timbilu ta vona hinkwato.+ 19 Endla leswaku Solomoni n’wananga a ku tirhela hi mbilu hinkwayo+ leswaku a ta kota ku yingisa swileriso,+ switsundzuxo ni milawu ya wena, a endla swilo leswi hinkwaswo kutani a aka tempele* leyi ndzi hlengeleteke swilo swo yi aka.”+

20 Kutani Davhida a byela vanhu hinkwavo a ku: “Sweswi dzunisani Yehovha Xikwembu xa n’wina.” Hiloko vanhu hinkwavo va dzunisa Yehovha Xikwembu xa vakokwa wa vona, va khinsama emahlweni ka Yehovha ni le ka hosi mimombo ya vona yi languta ehansi. 21 Va ya emahlweni va nyikela magandzelo eka Yehovha ni ku endlela Yehovha magandzelo yo hisiwa+ hi siku leri landzelaka, swinkuzana swa 1 000, makhuna ya 1 000, swinyimpfana swa xinuna swa 1 000 ni magandzelo ya swakunwa;+ va nyikele magandzelo yo tala ya Vaisrayele hinkwavo.+ 22 Va ya emahlweni va dya ni ku nwa emahlweni ka Yehovha hi siku rero va tsakile swinene+ naswona va tlhela va veka Solomoni n’wana wa Davhida ku va hosi ra vumbirhi, va n’wi chela mafurha emahlweni ka Yehovha leswaku a va murhangeri,+ Sadoki a vekiwa ku va muprista.+ 23 Hiloko Solomoni a tshama exiluvelweni xa Yehovha+ a va hosi ematshan’wini ya Davhida tata wakwe, a swi n’wi fambela kahle naswona Vaisrayele hinkwavo a va n’wi yingisa. 24 Tihosana hinkwato,+ tinhenha+ ta matimba ni vana hinkwavo va Hosi Davhida,+ a va tiveka ehansi ka hosi Solomoni. 25 Kutani Yehovha a endla leswaku Solomoni a va ni ndhuma swinene etikweni hinkwaro ra Israyele a tlhela a tiyisa vuhosi byakwe ku tlula tihosi hinkwato leti tshameke ti fuma eIsrayele.+

26 Hi ndlela yoleyo Davhida n’wana wa Yese, u fume tiko hinkwaro ra Israyele, 27 u fume malembe ya 40 eIsrayele. EHebroni u fume malembe ya nkombo,+ kasi eYerusalema u fume malembe ya 33.+ 28 Naswona u fe a dyuharile swinene,+ a enerisekile hi vutomi, rifuwo ni ku vangama; Solomoni n’wana wakwe a vekiwa ku va hosi ematshan’weni yakwe.+ 29 Matimu hinkwawo ya Hosi Davhida, ku sukela eku sunguleni ku ya fikela emakumu, ma tsariwile eka marito ya Samuwele muvoni wa swivono, marito ya muprofeta Nathani+ ni ya Gadi+ muvoni wa swivono, 30 ku katsa ni swilo hinkwaswo leswi endlekeke hi nkarhi wa ku fuma kakwe, leswi endlekeke eka yena ni Vaisrayele ni le ka mifumo hinkwayo leyi nga ekusuhi.