Tikronika Ta Vumbirhi
14 Hiloko Abiya a fa kutani a lahliwa ni vakokwa wakwe eMutini wa Davhida;+ kutani Asa n’wana wakwe a va hosi. Enkarhini wakwe ku ve ni ku rhula etikweni ku ringana malembe ya khume.
2 Asa u endle leswinene ni leswi lulameke emahlweni ka Yehovha Xikwembu xakwe. 3 A susa tialtari+ ta vamatiko ni tindhawu leti tlakukeke, a fayelela tiphuphu+ leti va ti hundzuleke swikwembu ni ku tsema timhandzi ta Axera.*+ 4 A tlhela a byela Yuda leswaku a lavisisa Yehovha Xikwembu xa vakokwa wa vona ni ku landzela Nawu ni xileriso. 5 A susa tindhawu leti tlakukeke ni swo tlhandleka+ murhi wo nun’hwela etikweni hinkwaro ra Yuda naswona mfumo wakwe a wu kavanyetiwanga hi nchumu. 6 A aka miti leyi biyeleriweke eYuda,+ hikuva a ku ri ni ku rhula etikweni naswona a ku ri hava loyi a a n’wi hlasela, hikuva Yehovha a a n’wi wisisile.+ 7 Hiloko a byela Yuda a ku: “A hi akeni miti leyi hi yi rhendzela hi makhumbi ni hi swihondzo,+ tigede* ni swo goga ha swona. Hikuva hi nyikiwe tiko hileswi hi lavisiseke Yehovha Xikwembu xa hina. Hi n’wi lavisisile naswona u hi sirhelerile eka valala va hina.” Hiloko va heta ku aka.+
8 Asa a ri ni masocha ya 300 000 eYuda, lawa a ma khoma switlhangu leswikulu ni matlhari. Eka Benjamini a ri ni tinhenha ta matimba ta 280 000 leti a ti khoma switlhangu leswitsongo ni mavurha.*+
9 Endzhaku ka sweswo, Zara loyi a humaka eEtiyopiya a ta ku ta lwa na vona, a ri ni masocha ya 1 000 000 ni makalichi+ ya 300. Loko a fika eMarixa,+ 10 Asa a huma a ya lwa na yena naswona va fike va hloma eNkoveni wa Zefata eMarixa. 11 Hiloko Asa a sungula ku khongela eka Yehovha Xikwembu+ xakwe a ku: “Yehovha, a swi na mhaka eka wena leswaku lava u va pfunaka va tele kumbe a va na matimba.+ Hi pfune, Yehovha Xikwembu xa hina, hikuva hi tshembe wena+ naswona hi te ku ta lwa ni ntshungu lowu hi vito ra wena.+ Yehovha, u Xikwembu xa hina. U nga pfumeleli munhu leswaku a ku hlula.”+
12 Kutani Yehovha a hlula Vaetiyopiya emahlweni ka Asa ni le mahlweni ka Yuda, Vaetiyopiya va baleka.+ 13 Asa ni masocha yakwe va va hlongorisa ku ya fika eGerara+ Vaetiyopiya va ya emahlweni va dlayiwa kukondza ku nga ha sali munhu, hikuva va lovisiwe hi ku helela hi Yehovha ni masocha yakwe. Endzhaku ka sweswo va phange swilo swo tala. 14 Hiloko va hlasela miti hinkwayo leyi nga ekusuhi na Gerara, hikuva Yehovha u endle leswaku miti yoleyo yi chava; kutani va phanga swilo emitini hinkwayo hikuva a yi ri ni swilo swo tala. 15 Va tlhela va hlasela vanhu lava nga ni swifuwo lava a va tshama ematendeni, va teka swifuwo swo tala ni tikamela kutani va tlhelela eYerusalema.