Tikronika To Sungula
19 Endzhaku ka sweswo, Nahaxi hosi ya Vaamoni a fa kutani n’wana wa yena a va hosi ematshan’weni ya yena.+ 2 Hiloko Davhida a ku: “Hanunu n’wana wa Nahaxi ndzi ta n’wi kombisa rirhandzu lerikulu+ hikuva tata wakwe u ndzi kombe rirhandzu lerikulu.” Kutani Davhida a rhumela malandza yakwe leswaku ma ya n’wi chavelela hikwalaho ka rifu ra tata wakwe. Kambe loko malandza ya Davhida ma fika etikweni ra Vaamoni,+ ku ya chavelela Hanunu, 3 tihosana ta Vaamoni ti byela Hanunu ti ku: “Xana u ehleketa leswaku Davhida u xixima tata wa wena hileswi a rhumeke vachaveleri lava eka wena? Xana malandza yakwe a ma tanga eka wena hi xikongomelo xa ku ta kambela muti lowu, leswaku a ta wu hlula?” 4 Hiloko Hanunu a teka malandza ya Davhida a ma byevula malepfu+ a tlhela a tsema swiambalo swa wona hi le xisutini, a ma tshika ma famba. 5 Loko Davhida a byeriwa leswi endlekeke eka vavanuna lava, u nambe a rhumela vanhu van’wana leswaku va ya va hlanganisa, hikuva vavanuna lava a va khomisiwe tingana swinene; kutani hosi yi ku eka vona: “Tshamani eYeriko+ kukondza malepfu ya n’wina ma kula, hi kona mi nga ta vuya.”
6 Hi ku famba ka nkarhi, Vaamoni va xiya leswaku va vange rivengo lerikulu exikarhi ka vona na Davhida, hiloko Hanunu ni Vaamoni va rhumela titalenta* ta silivhere ta 1 000 leswaku ku thoriwa vagadi va tihanci ni makalichi eMesopotamiya,* eAramu-maka ni le Soba.+ 7 Hiloko va thola makalichi ya 32 000 swin’we ni hosi ya Maka ni vanhu va yona. Va fika va dzima mixaxa emahlweni ka Medeba.+ Vaamoni va hlengeletana emitini ya vona kutani va ya enyimpini.
8 Loko Davhida a twa mhaka leyi, a rhuma Yowabu+ ni vuthu hinkwaro ku katsa ni tinhenha ta yena ta matimba swinene.+ 9 Kutani Vaamoni va huma va lunghekela ku lwa egedeni ya muti naswona tihosi leti nga ta a ti yime ti ri toxe erivaleni.
10 Loko Yowabu a vona leswaku valala va n’wi hlasela hi le mahlweni ni le ndzhaku, a hlawula man’wana ya masocha lama nga tinhenha eIsrayele, ma hloma leswaku ma ta lwa ni Vasiriya.+ 11 Masocha lama saleke u ma veke ehansi* ka Abixayi+ makwavo, leswaku ma hloma ma ta lwa ni Vaamoni. 12 Kutani a ku: “Loko Vasiriya+ va ndzi tsandza, u fanele u ta ndzi pfuna; kambe loko Vaamoni va ku tsandza ndzi ta ku pfuna. 13 Hi fanele hi tiya hi va ni xivindzi+ hikwalaho ka vanhu va ka hina ni hikwalaho ka miti ya Xikwembu xa hina, naswona Yehovha u ta endla leswi nga swinene ematihlweni yakwe.”
14 Hiloko Yowabu ni vanhu vakwe va kongoma Vasiriya va ya lwa na vona, kutani Vasiriya va n’wi baleka.+ 15 Loko Vaamoni va vona leswaku Vasiriya va balekile, hiloko na vona va baleka emahlweni ka makwavo Abixayi va ya emutini. Endzhaku ka sweswo, Yowabu a tlhelela eYerusalema.
16 Loko Vasiriya va vona leswaku va hluriwile hi Vaisrayele, va rhumele vanhu leswaku va ya vitana Vasiriya lava a va ri exifundzheni lexi nga le kusuhi ni Nambu*+ naswona a va rhangeriwe hi Xofaki ndhuna ya vuthu ra Hadadezera.+
17 Loko Davhida a vikeriwile, xikan’wekan’we a hlengeleta masocha hinkwawo ya Israyele kutani va pela nambu wa Yordani va ya eka vona, va lunghekela ku lwa na vona. Hiloko Davhida a hloma leswaku a ta lwa ni Vasiriya, kutani va lwa na yena.+ 18 Kambe Vasiriya va baleka emahlweni ka Israyele; Davhida a dlaya vachayeri va makalichi va 7 000 ni masocha ya 40 000, a tlhela a dlaya na Xofaki ndhuna ya vuthu ra Vasiriya. 19 Loko malandza ya Hadadezera ma vona leswaku Vaisrayele va ma hlurile,+ ma hatla ma endla ntwanano wa ku rhula na Davhida kutani ma va malandza ya yena;+ naswona Vasiriya a va nga ha swi lavi ku pfuna Vaamoni.