Tikronika Ta Vumbirhi
15 Azariya n’wana wa Odedi a va ni moya wa Xikwembu. 2 Hiloko a huma ku ya hlangana na Asa, kutani a ku eka yena: “Ndzi yingise, wena Asa ni tiko hinkwaro ra Yuda na Benjamini! Yehovha u na n’wina ntsena loko na n’wina mi nga n’wi tshiki;+ naswona loko mi n’wi lavisisa, u ta endla leswaku mi n’wi kuma,+ kambe loko mi n’wi fularhela na yena u ta mi fularhela.+ 3 Vaisrayele va fularhele Xikwembu xa ntiyiso ku ringana nkarhi wo leha, a va nga ri na muprista loyi a dyondzisaka naswona a va nga ri na nawu.+ 4 Kambe loko va ri emaxangwini a va tlhelela eka Yehovha Xikwembu xa Israyele, va n’wi lavisisa, yena a endla leswaku va n’wi kuma.+ 5 Emikarhini yoleyo, a swi ri ni khombo ku fambafamba, hikuva a ku ri ni mpfilumpfilu ematikweni wolawo. 6 Tiko a ri lwa ni tiko rin’wana ni muti wu lwa ni muti wun’wana, hikuva Xikwembu a xi va nyikanga ku rhula, xi va vangele swiphiqo swo hambanahambana.+ 7 Kambe n’wina, vanani ni xivindzi naswona mi nga heli matimba,+ hikuva mi ta hakeriwa hikwalaho ka mitirho ya n’wina.”
8 Loko Asa a twa marito lawa ni vuprofeta bya muprofeta Odedi, a va ni xivindzi, a susa swifaniso swo nyenyetsa etikweni hinkwaro ra Yuda+ na Benjamini ni le mitini leyi a yi tekeke endhawini ya tintshava ya Efrayimi kutani a tlherisela altari ya Yehovha leyi a yi ri emahlweni ka rikupakupa* ra Yehovha.+ 9 Hiloko a hlengeleta tiko hinkwaro ra Yuda na Benjamini ni valuveri lava a va ri na vona lava humaka eka va ka Efrayimi na Manase na Simiyoni,+ hikuva a va baleke eIsrayele va ya eka yena va tele loko va vona leswaku Yehovha Xikwembu xakwe xi na yena. 10 Kutani va hlengeletana eYerusalema hi n’hweti ya vunharhu hi lembe ra vu-15 ra ku fuma ka Asa. 11 Hi siku rero va endlele Yehovha gandzelo hi swilo leswi va swi phangeke leswi va teke na swona, ku nga tihomu ta 700 ni tinyimpfu ta 7 000. 12 Ku tlula kwalaho, va endla ntwanano wa leswaku va ta lavisisa Yehovha Xikwembu xa vakokwa wa vona hi timbilu ta vona hinkwato ni hi vutomi bya vona hinkwabyo.+ 13 Loyi a nga ta ka a nga n’wi lavisisi Yehovha Xikwembu xa Israyele a a fanele a dlayiwa, ku nga khathariseki leswaku hi lontsongo kumbe hi lonkulu, i wanuna kumbe i wansati.+ 14 Hiloko va hlambanya eka Yehovha hi rito lerikulu, va ba mikulungwana hikwalaho ka ku tsaka va tlhela va chaya timhalamhala ni tinanga. 15 Kutani tiko hinkwaro ra Yuda ri tsaka hi xihlambanyo lexi ri xi endleke, hikuva va xi endle hi timbilu ta vona hinkwato naswona va n’wi lavisise hi mapfundza lerova a endla leswaku va n’wi kuma,+ Yehovha a ya emahlweni a va wisisa eka valala va vona.+
16 Hosi Asa a susa hambi ku ri kokwa wakwe Maka+ eka xikhundlha xa ku va mana wa hosi, hikuva a a endle xifaniso xo nyenyetsa xa mhandzi ya Axera*+ leswaku ku gandzeriwa xona. Asa u tseme xifaniso xexo xo nyenyetsa a xi pandzelela kutani a xi hisa eNkoveni wa Kedroni.+ 17 Kambe tindhawu leti tlakukeke a ti susiwanga+ eIsrayele.+ Nilokoswiritano, mbilu ya Asa a yi tinyiketele hi ku helela vutomi byakwe hinkwabyo.+ 18 Kutani a nghenisa swilo leswi yena ni tata wakwe va swi nyikeleke endlwini ya Xikwembu xa ntiyiso, silivhere, nsuku ni swibya swo hambanahambana.+ 19 A ku vanga na nyimpi kukondza ku va lembe ra vu-35 ra ku fuma ka Asa.+