Samuwele Wo Sungula

5 Loko Vafilista va teka Areka+ ya Xikwembu xa ntiyiso, va yi suse eEbenezere va yi yisa eAxidodo. 2 Vafilista va teke Areka ya Xikwembu xa ntiyiso va yi veka endlwini* ya Dagoni,* va yi yimisa etlhelo ka Dagoni.+ 3 Loko Vaaxidodo va pfuka nimixo hi siku leri landzelaka, Dagoni a a we hi xikandza emahlweni ka Areka ya Yehovha.+ Hiloko va teka Dagoni va n’wi tlherisela laha a a yime kona.+ 4 Loko va pfuka nimixo wa siku leri landzelaka, Dagoni a a wile nakambe hi xikandza emahlweni ka Areka ya Yehovha. Nhloko ya Dagoni ni swandla swakwe a swi tsemekile swi ri enyangweni ya tempele. A ku sele ntsena xiphemu lexi nga nhlampfi.* 5 Hi yona mhaka leyi vaprista va Dagoni ni hinkwavo lava nghenaka endlwini ya Dagoni va nga kandziyiki enyangweni wa Dagoni eAxidodo ku ta fikela namuntlha.

6 Yehovha a xupula Vaaxidodo, a va ba hi ku hlasela Axidodo ni tindhawu leti nga ekusuhi hi vuvabyi byo pfimba hala ndzhaku.+ 7 Loko vavanuna va le Axidodo va vona leswi a swi endleka, va ku: “Susani Areka ya Xikwembu xa Israyele eka hina, hikuva xa hi xupula hina ni xikwembu xa hina Dagoni.” 8 Hiloko va rhumela rito leswaku ku ya vitaniwa tihosi hinkwato ta Vafilista, kutani va ti vutisa va ku: “Hi fanele hi endla yini hi Areka ya Xikwembu xa Israyele?” Ti hlamula ti ku: “Areka ya Xikwembu xa Israyele a yi yisiwe eGati.”+ Hiloko va yisa Areka ya Xikwembu xa Israyele kwalaho.

9 Endzhaku ka loko va yi yise kwalaho, Yehovha a xupula muti wolowo, a endla leswaku va chava swinene. A hlasela vavanuna va muti, ku suka eka lontsongo ku ya eka lonkulu, va va ni vuvabyi byo pfimba hala ndzhaku.+ 10 Hiloko va teka Areka ya Xikwembu xa ntiyiso va yi yisa eEkroni,+ kambe hi ku hatlisa loko Areka ya Xikwembu xa ntiyiso yi fika eEkroni, Vaekroni va sungula ku rila va huwelela va ku: “Va tise Areka ya Xikwembu xa Israyele eka hina leswaku va ta dlaya hina ni vanhu va hina!”+ 11 Kutani ku vitaniwa tihosi hinkwato ta Vafilista, va ku: “Tshikani Areka ya Xikwembu xa Israyele yi famba; a yi tlhelele endhawini ya yona leswaku hina ni vanhu va hina hi nga dlayiwi.” Hikuva muti hinkwawo a wu chava ku fa; Xikwembu xa ntiyiso a xi va xupula swinene,+ 12 vanhu lava nga fangiki va hlaseriwe hi vuvabyi byo pfimba hala ndzhaku. Naswona xirilo xa muti xa ku kombela ku pfuniwa xi fike ematilweni.