Tikronika To Sungula

20 Eku sunguleni ka lembe,* hi nkarhi lowu tihosi a ti ya enyimpini, Yowabu+ u fambe ni masocha a ya hlasela tiko ra Vaamoni; ni ku tlhela a rhendzela muti wa Rhaba+ kambe Davhida a a sale eYerusalema.+ Yowabu u hlasele Rhaba a wu mbundzumuxa.+ 2 Kutani Davhida a teka harhi leyi a yi ri enhlokweni ya Malikomo a kuma leswaku a yi tika talenta* ya nsuku naswona a yi khavisiwe hi maribye ya risima; kutani yi vekiwa enhlokweni ya Davhida. U tlhele a teka swilo swo tala emutini wolowo.+ 3 A teka vanhu lava a va ri emutini wolowo, a va tirhisa+ ku saha maribye ni ku tirha hi switirho leswi karihaka swa nsimbhi ni swihloka. Davhida u endle tano emitini hinkwayo ya Vaamoni. Eku heteleleni, Davhida ni masocha yakwe va tlhelela eYerusalema.

4 Endzhaku ka sweswo, ku tlhela ku tlhekeka nyimpi ni Vafilista eGezere. Hi nkarhi wolowo Sibekayi+ wa le Huxa u dlaye Sipayi loyi a a ri ntukulu wa Varefayimi+ naswona va hluriwile.

5 Nakambe ku tlhela ku lwiwa ni Vafilista, kutani Elihanani n’wana wa Yayiri a dlaya Lahimi makwavo wa xinuna wa Goliyadi+ wa le Gati, loyi tlhari rakwe a ri ri ni mbhinyi lowu ringanaka ni mhandzi ya muluki wa malapi.+

6 Nakambe ku tlhekeka nyimpi eGati,+ laha a ku ri ni wanuna loyi a a ri xihontlovila,+ a a ri ni tintiho ta tsevu evokweni ha rin’we ni swikunwana swa tsevu enengeni ha wun’we, hinkwaswo a swi ri 24; na yena a a ri ntukulu wa Varefayimi.+ 7 A a tshamela ku tlhontlha+ Vaisrayele. Hiloko Yonathani n’wana wa Ximeya+ buti wa Davhida, a n’wi dlaya.

8 Vanhu lava a va ri vatukulu va Varefayimi+ eGati,+ va dlayiwe hi Davhida ni malandza yakwe.