Vaavanyisi

19 Emasikwini wolawo loko eIsrayele ku nga ri na hosi,+ Mulevhi loyi a a tshama endhawini ya le kule ya tintshava ya Efrayimi+ u teke nsati lontsongo wa le Betlehema+ eYuda. 2 Kambe nsati wakwe lontsongo a oswa hiloko a famba a ya endlwini ya tata wakwe le Betlehema eYuda. A tshama kwalaho tin’hweti ta mune. 3 Hiloko nuna wakwe a n’wi landza leswaku a ta n’wi xavelela a vuya; u fambe ni nandza wakwe wa xinuna ni timbhongolo timbirhi. Kutani nsati wakwe lontsongo a n’wi nghenisa endlwini ya tata wakwe. Tata wakwe a tsaka loko a n’wi vona. 4 Kutani tata wa nsati wakwe a n’wi kombela leswaku a tshama na yena masiku manharhu; va dya va tlhela va nwa naswona a etlela kwalaho.

5 Loko va pfuka nimpundzu swinene leswaku va famba hi siku ra vumune, tata wa nsati wakwe a byela mukon’wana wakwe a ku: “Rhanga u dya leswaku u ta kuma matimba, hi kona u nga ta famba.” 6 Hiloko va tshama va dya va tlhela va nwa; endzhaku ka sweswo tata wa nsati loyi a byela wanuna loyi a ku: “Ndzi kombela u etlela vusiku bya namuntlha, u tiphina.” 7 Loko wanuna loyi a pfuka leswaku a ta famba, tata wa nsati wakwe a n’wi xavelela leswaku a nga fambi, hiloko a tlhela a etlela.

8 Loko a pfuka nimpundzu swinene hi siku ra vuntlhanu leswaku a famba, tata wa nsati wakwe a ku: “Ndzi kombela u rhanga u dya leswaku u ta kuma matimba.” Va hungasa va ri karhi va dya kukondza ri rhenga. 9 Loko wanuna loyi a lava ku famba ni nsati wakwe lontsongo ni nandza wakwe, tata wa nsati wakwe a ku: “Se ri lava ku pela. Ndzi kombela leswaku mi etlela mi tiphina. Mi ta pfuka mi famba mundzuku nimpundzu.” 10 Kambe, wanuna loyi a nga pfumelanga ku etlela, u khome ndlela a kongoma eYebusi, le Yerusalema.+ U fambe ni timbhongolo timbirhi ni nsati wakwe lontsongo ni nandza wakwe.

11 Loko va ri ekusuhi ni ku fika eYebusi, dyambu se a ri lava ku pela. Hiloko nandza a byela n’wini wakwe a ku: “A hi yimeni emutini lowu wa Vayebusi hi etlela kona.” 12 Kambe n’wini wakwe a ku eka yena: “Hi nga yimi emutini wa vanhu lava nga riki Vaisrayele. Hi ta fika hi yima eGibiya.”+ 13 Hiloko a byela nandza wakwe a ku: “A hi fambe; hi ta etlela eGibiya kumbe eRhama.”+ 14 Hiloko va famba naswona dyambu ri va pelela loko va ri ekusuhi ni ku fika emutini wa Gibiya lowu a ku tshama va ka Benjamini.

15 Hiloko va nghena eGibiya leswaku va etlela kona. Va fika va tshama erivaleni leri nga exikarhi ka muti, kambe a ku na munhu loyi a va amukeleke endlwini yakwe leswaku va etlela kona.+ 16 Hi madyambu wolawo, ku fika mukhalabye loyi a a huma emasin’wini. A a huma endhawini ya tintshava ya Efrayimi+ naswona a a tshama eGibiya; kambe vanhu va muti lowu a ku ri va ka Benjamini.+ 17 Loko a vona wanuna loyi a a ri erivaleni leri nga exikarhi ka muti mukhalabye a n’wi vutisa a ku: “Xana u ya kwihi naswona u huma kwihi?” 18 A n’wi hlamula a ku: “Hi suka le Betlehema eYuda, hi ya endhawini ya le kule ya tintshava ya Efrayimi, laha ndzi humaka kona. A ndzi ye le Betlehema eYuda+ naswona sweswi ndzi ya endlwini ya Yehovha* kambe a ku na munhu loyi a ndzi amukelaka endlwini yakwe. 19 Hi ni byanyi ni furu yo tala ya timbhongolo ta hina,+ kasi mina ni nsati wa mina ni nandza wa mina hi tilongele xinkwa+ ni vhinyo. Swakudya hi na swona kambe a hi na ndhawu yo etlela.” 20 Hambiswiritano, mukhalabye a ku: “Onge u nga va ni ku rhula! Ndzi ta ku nyika leswi u swi pfumalaka. Kambe u nga etleli laha rivaleni.” 21 Kutani a famba na yena endlwini yakwe, a fika a nyika timbhongolo takwe swakudya. Hiloko va hlamba milenge, va dya va tlhela va nwa.

22 Loko va ri karhi va tiphina, vavanuna van’wana vo homboloka va le mutini lowu, va rhendzela yindlu, va himetela rivanti, va byela mukhalabye loyi a nga n’wini wa yindlu va ku: “Humesa wanuna loyi a ngheneke endlwini ya wena leswaku hi ta etlela na yena.”+ 23 Hiloko n’wini wa yindlu a huma a fika a ku: “E-e, vamakwerhu, ndzi kombela mi nga vi ni tihanyi eka wanuna loyi a ndzi endzeleke. Mi nga ma endli manyala wolawo. 24 Hi loyi n’wana wa mina wa nhwanyana loyi a nga si tshamaka a etlela ni wanuna ni nsati lontsongo wa wanuna loyi. Ndzi ta mi humesela vona, mi endla leswi mi swi lavaka hi vona.+ Kambe mi nga ma endli manyala lawa eka wanuna loyi.”

25 Kambe vavanuna lava a va n’wi yingisanga, hiloko wanuna loyi a teka nsati wakwe lontsongo+ a va humesela yena. Va n’wi pfinya vusiku hinkwabyo kukondza ri xa. Hiloko va n’wi tshika a famba loko ri ya eku xeni. 26 Nimpundzu swinene, wansati loyi a fika a wela enyangweni ya yindlu ya mukhalabye laha nuna* wakwe a ri kona naswona a etlela kwalaho kukondza ri xa. 27 Loko nuna* wakwe a pfuka nimixo a pfula mavanti ya yindlu leswaku a ta ya emahlweni ni riendzo rakwe, a vona nsati wakwe lontsongo a etlele enyangweni ya yindlu a khome rivanti. 28 Hiloko a ku eka yena: “Pfuka hi famba.” Kambe a nga n’wi hlamulanga. Kutani wanuna loyi a n’wi teka a n’wi tlhandleka ehenhla ka mbhongolo a muka.

29 Loko a fika ekaya kakwe, a teka mukwana* kutani a tsemelela ntsumbu wa nsati wakwe lontsongo wu va swiphemu swa 12 ivi a rhumela xiphemu xin’we eka nyimba ha yin’we ya Vaisrayele. 30 Hinkwavo lava swi voneke va ku: “A ku si tshama ku endleka kumbe ku voniwa nchumu wo fana ni lowu ku sukela esikwini leri Vaisrayele va humeke ha rona eEgipta ku ta fikela namuntlha. Anakanyisisani hi mhaka leyi, mi kanerisana ha yona+ leswaku hi ta tiva leswi hi faneleke hi swi endla.”