Vaavanyisi
15 Hi ku famba ka nkarhi, hi nkarhi wa ntshovelo wa koroni, Samsoni a endzela nsati wakwe a ri ni ximbutana. Kutani a ku: “Ndzi lava ku ya eka nsati wa mina ekamareni.” Kambe tata wa nsati wakwe a nga n’wi pfumelelanga ku nghena. 2 Tata wa nsati wakwe a ku: “A ndzi ehleketa leswaku wa n’wi venga.+ Kutani ndzi n’wi nyike nxangwana* ya wena leswaku a va nsati wa yena.+ Xana ndzisana yakwe a yi sasekanga ku n’wi tlula? Ndzi kombela u teka yona.” 3 Kambe Samsoni a ku: “Sweswi Vafilista a va nge ndzi soli loko ndzi va hlasela.”
4 Kutani Samsoni a ya khoma timhungubye ta 300. Hiloko a yimisa timhungubye ha timbirhimbirhi ti fularhelana, a boha mincila ya tona ivi a veka xisana exikarhi ka mincila ya tona. 5 Kutani a lumeka swisana, a ti rhumela emasin’wini ya Vafilista. A hisa swilo hinkwaswo ku sukela eka tinyandza ta koroni ni koroni leyi nga siki tshoveriwaka, masimu ya madiriva ni ya mirhi ya mitlhwari.
6 Vafilista va vutisa va ku: “I mani loyi a endleke swilo leswi?” Va byeriwa leswi: “I Samsoni mukon’wana wa Mutimna, hikuva u teke nsati wakwe a n’wi nyika nxangwana* ya yena.”+ Hiloko Vafilista va famba va ya hisa nsati loyi ni tata wakwe hi ndzilo.+ 7 Kutani Samsoni a ku eka vona: “Loko mi endla leswi, a ndzi nge tshiki ku tirihisela eka n’wina.”+ 8 Hiloko a dlaya Vafilista vo tala kutani endzhaku ka sweswo a ya tshama ebakweni eribyeni ra Etamu.
9 Endzhaku ka sweswo Vafilista va fika va dzima mixaxa ya vona eYuda, va rhendzeleka eLehi.+ 10 Kutani vavanuna va le Yuda va ku: “Hikwalaho ka yini mi hi hlasela?” Va ku eka vona: “Hi tele ku ta khoma* Samsoni, hi n’wi endla leswi a hi endleke swona.” 11 Hiloko vavanuna va Yuda va 3 000 va ya ebakweni eribyeni ra Etamu, va fika va ku eka Samsoni: “Xana a wu swi tivi leswaku hi fumiwa hi Vafilista?+ Hikwalaho ka yini u hi endle leswi?” Kutani Samsoni a ku eka vona: “Ndzi va endle leswi va ndzi endleke swona.” 12 Kambe va ku eka yena: “Hi tele ku ta ku khoma* hi ku nyiketa eka Vafilista.” Kutani Samsoni a ku eka vona: “Ndzi hlambanyeleni leswaku a mi nge ndzi vavisi.” 13 Va ku eka yena: “A hi nge ku vavisi, kambe hi to ku boha hi ku nyiketa eka vona; a hi nge ku dlayi.”
Hiloko va n’wi boha hi tintambu timbirhi letintshwa, va n’wi humesa eribyeni. 14 Loko a fika eLehi, Vafilista va n’wi hlanganisa va ri karhi va ba huwa. Hiloko moya wa Yehovha wu tirha eka yena,+ tintambu leti a ti ri emavokweni yakwe ti fana ni tiharhani leti vavuriweke hi ndzilo, lerova ti wela ehansi.+ 15 Kutani a kuma rihlaya ra mbhongolo ya xinuna leya ha ku faka; a ri teka a dlaya vavanuna va 1 000 ha rona.+ 16 Hiloko Samsoni a ku:
“Ndzi dlaye valala hi rihlaya ra mbhongolo—ndzi va hlengeleta va va tinhulu!
Ndzi dlaye vavanuna va 1 000 hi rihlaya ra mbhongolo.”+
17 Loko a heta ku vula sweswo, a lahla rihlaya leri a a ri khomile ivi a thya ndhawu yoleyo Ramati-lehi.*+ 18 Kutani a twa torha swinene, hiloko a huwelela eka Yehovha a ku: “Hi wena loyi a endleke leswaku nandza wa wena a hlula. Xana ndzi fanele ndzi fa hi torha, ndzi nyiketiwa eka vanhu lava nga yimbangiki?” 19 Hiloko Xikwembu xi pfula khele eLehi, kutani mati ma sungula ku huma eka rona.+ Loko a nwile a sungula ku tlhela a va ni matimba. Hi yona mhaka a thyeke ndhawu yoleyo Eni-hakore,* leyi ninamuntlha ya ha riki kona eLehi.
20 Samsoni u avanyise Vaisrayele ku ringana malembe ya 20 enkarhini lowu a va fumiwa hi Vafilista.+