Daniyele

3 Hosi Nebukadnetsara a endla xifaniso xa nsuku lexi leheke kwalomu ka 27 wa timitara,* ni ku anama kwalomu ka timitara* tinharhu. A xi veka erivaleni ra Dura exifundzheni xa Babilona. 2 Hiloko Hosi Nebukadnetsara a rhumela rito leswaku ku ya vitaniwa tindhuna, vapfuni va tindhuna, tindhunankulu, vatsundzuxi, vakhomi va mali, vaavanyisi, vamajistarata ni vakongomisi hinkwavo va swifundzha, leswaku va ta eku khanguriweni* ka xifaniso lexi Hosi Nebukadnetsara a xi endleke.

3 Hiloko tindhuna, vapfuni va tindhuna, tindhunankulu, vatsundzuxi, vakhomi va mali, vaavanyisi, vamajistarata ni vakongomisi hinkwavo va swifundzha va hlengeletana loko ku khanguriwa* xifaniso lexi Hosi Nebukadnetsara a xi endleke. Va yima emahlweni ka xifaniso lexi Nebukadnetsara a xi endleke. 4 Hiloko mutivisi wa timhaka ta tiko a huwelela a ku: “Hi lexi xileriso, n’wina vanhu va matiko ni tindzimi to hambanahambana, 5 loko mi twa mpfumawulo wa nanga, mhalamhala, katara, haripa, xitende, nanga leyi nga ni saka ni mixaka hinkwayo ya swichayachayana swa vuyimbeleri, mi fanele mi khinsama mi gandzela xifaniso xa nsuku lexi Hosi Nebukadnetsara a xi endleke. 6 Loyi a nga khinsamiki a xi gandzela, u ta hoxiwa ekheleni ra ndzilo lowu vavulaka hi nkarhi wolowo.”+ 7 Loko vanhu hinkwavo va matiko ni tindzimi va twa mpfumawulo wa nanga, mhalamhala, katara, haripa, xitende ni mixaka hinkwayo ya swichayachayana swa vuyimbeleri, va khinsamile va gandzela xifaniso xa nsuku lexi Hosi Nebukadnetsara a nga xi endla.

8 Hi nkarhi wolowo Vakalidiya van’wana va ya eka hosi va ya mangalela* Vayuda. 9 Hiloko va byela Hosi Nebukadnetsara va ku: “Hanya hilaha ku nga heriki wena hosi. 10 Wena hosi, u humese xileriso xa leswaku mani na mani loyi a twaka mpfumawulo wa nanga, mhalamhala, katara, haripa, xitende ni nanga leyi nga ni saka ni mixaka hinkwayo ya swichayachayana swa vuyimbeleri, u fanele a khinsama, a gandzela xifaniso xa nsuku; 11 nileswaku loyi a nga ta ka a nga khinsami a xi gandzela, u fanele a hoxiwa ekheleni ra ndzilo lowu vavulaka.+ 12 Ku ni Vayuda van’wana lava u va vekeke ku va tindhuna ta xifundzha xa Babilona, ku nga Xadraka, Mixaka na Abedinigo.+ Vavanuna lava a va ku xiximi, wena hosi. A va swi gandzeli swikwembu swa wena, naswona va ala ku gandzela xifaniso xa nsuku lexi u xi endleke.”

13 Hiloko Nebukadnetsara loyi a a hlundzuke ngopfu a lerisa leswaku ku vitaniwa Xadraka, Mixaka na Abedinigo. Kutani vavanuna lava va tisiwa emahlweni ka hosi. 14 Nebukadnetsara a va vutisa a ku: “Xana i ntiyiso leswaku wena Xadraka, Mixaka na Abedinigo, a mi swi gandzeli swikwembu swa mina,+ naswona mi ala ku gandzela xifaniso xa nsuku lexi ndzi xi endleke? 15 Loko mi twa mpfumawulo wa nanga, mhalamhala, katara, haripa, xitende ni nanga leyi nga ni saka ni mixaka hinkwayo ya swichayachayana swa vuyimbeleri, mi ta va mi endla kahle loko mi khinsama mi gandzela xifaniso lexi ndzi xi endleke. Kambe loko mi ala ku xi gandzela, mi ta namba mi hoxiwa ekheleni ra ndzilo lowu vavulaka. Xana xi kona xikwembu lexi nga mi ponisaka emavokweni ya mina?”+

16 Xadraka, Mixaka na Abedinigo va hlamula hosi va ku: “Wena Nebukadnetsara, a swi bohi leswaku hi ku hlamula emhakeni leyi. 17 Loko ho hoxiwa ekheleni ra ndzilo, Xikwembu xa hina lexi hi xi gandzelaka xi ta hi ponisa ekheleni ra ndzilo lowu vavulaka ni le vokweni ra wena hosi.+ 18 Hambiloko xo ka xi nga hi ponisi, swi tive wena hosi, leswaku swikwembu swa wena a hi nge swi gandzeli, ni xifaniso xa nsuku lexi u xi endleke a hi nge xi gandzeli.”+

19 Hiloko Nebukadnetsara a hlundzuka ngopfu, a hlundzukela Xadraka, Mixaka na Abedinigo a nga ha va tsakeli, a lerisa leswaku khele ra ndzilo ri hlanganyetiwa ri hisa ka nkombo ku tlula ku hisa loku tolovelekeke. 20 Kutani a lerisa man’wana ya masocha ya yena lama nga ni matimba leswaku ma boha Xadraka, Mixaka na Abedinigo, ma va hoxa ekheleni ra ndzilo lowu vavulaka.

21 Hiloko vavanuna lava va bohiwa va ambale swiambalo swa vona swa le handle ni swa le ndzeni ni swihuku swa vona ni swiambalo swin’wana swa vona kutani va hoxiwa ekheleni ra ndzilo lowu vavulaka. 22 Hikwalaho ka xileriso xa hosi xa tihanyi ni leswi khele a ri hlanganyetiwe ri hisa ku tlula mpimo, vavanuna lava va khomeke Xadraka, Mixaka na Abedinigo hi vona lava va dlayiweke hi malangavi ya ndzilo. 23 Kambe vavanuna lavanharhu ku nga Xadraka, Mixaka na Abedinigo, va wele endzeni ka khele ra ndzilo lowu vavulaka va bohiwile.

24 Hiloko Hosi Nebukadnetsara a sungula ku chava kutani a suka a yima hi ku hatlisa, a vutisa tindhuna ta yena a ku: “Xana a hi bohanga vavanuna vanharhu hi va hoxa ekheleni ra ndzilo?” Tindhuna takwe ti n’wi hlamula ti ku: “Ina, hosi ya hina.” 25 A ku: “Vonani! Ndzi vona vavanuna va mune lava fambafambaka exikarhi ka ndzilo va nga bohiwanga, kambe a va vavisekanga, lowa vumune u fana ni n’wana wa swikwembu.”

26 Nebukadnetsara a tshinela enyangweni ya khele ra ndzilo lowu vavulaka, kutani a ku: “Xadraka, Mixaka na Abedinigo, n’wina malandza ya Xikwembu Lexi Nge Henhlahenhla,+ humani mi ta haleno!” Hiloko Xadraka, Mixaka na Abedinigo va huma endzilweni. 27 Kutani tindhuna, vapfuni va tindhuna ni tindhunankulu ta hosi lava a va hlengeletanile kwalaho+ va swi xiya leswaku ndzilo a wu va endlanga nchumu vavanuna lava;+ hambi ku ri nsisi ni wun’we wa tinhloko ta vona a wu vavukanga, ni swiambalo swa vona a swi tshwanga, a va nga nuhi ni risema ra ndzilo.

28 Hiloko Nebukadnetsara a ku: “A ku dzunisiwe Xikwembu xa Xadraka, Mixaka na Abedinigo,+ lexi rhumeke ntsumi ya xona leswaku yi ta ponisa malandza ya xona. Ma xi tshembile kutani ma ala ku yingisa rito ra hosi, a ma tiyimisele ku fa ku ri ni ku gandzela xikwembu xin’wana handle ka Xikwembu xa wona.+ 29 Kutani ndzi veka nawu wa leswaku munhu wihi ni wihi, vanhu va matiko ni tindzimi to hambanahambana lava nga ta tshuka va vulavula ku biha hi Xikwembu xa Xadraka, Mixaka na Abedinigo va fanele va phatluleriwa, tiyindlu ta vona ti fanele ti endliwa swihambukelo swa mani na mani;* hikuva a xi kona xikwembu xin’wana lexi xi kotaka ku ponisa ku fana ni lexi.”+

30 Hiloko hosi yi tlakusa Xadraka, Mixaka na Abedinigo hi ku va nyika mitirho yo xiximeka exifundzheni xa Babilona.+