Vatesalonika Wo Sungula
3 Hikwalaho, loko swi hi tsandza ku ya emahlweni hi tiyisela, hi vone swi antswa ku sala hi ri hexe eAtena;+ 2 kutani hi rhumele Timotiya,+ makwerhu tlhelo nandza* wa Xikwembu loyi a chumayelaka mahungu lamanene ha Kreste, leswaku a mi tiyisa ni ku mi chavelela hikwalaho ka ripfumelo ra n’wina, 3 leswaku ku nga vi na munhu loyi a chavisiwaka* hi mahlomulo lawa. Hikuva ma swi tiva leswaku a hi nge swi papalati ku xanisiwa hi ndlela yoleyo.*+ 4 Hikuva loko ha ha ri na n’wina, a hi mi byela leswaku hi ta xanisiwa naswona sweswo swi endlekile hilaha mi swi tivaka hakona.+ 5 Hi yona mhaka leyi ndzi rhumeleke Timotiya eka n’wina hileswi a ndzi nga ha swi koti ku rindza leswaku ndzi ta tiva hi ta ku tshembeka ka n’wina,+ hikuva swi nga ha endleka Muringi+ a mi ringile naswona ku tikarhata ka hina ku nga ha va ku nga pfunanga nchumu.
6 Kambe Timotiya wa ha ku fika eka hina a huma eka n’wina+ naswona u hi byele mahungu lamanene hi ta ku tshembeka ni rirhandzu ra n’wina, ni leswaku ma tsaka loko mi hi tsundzuka, naswona mi navela ku hi vona hilaha na hina hi navelaka ku mi vona. 7 Vamakwerhu, emaxangwini ni le mahlomulweni ya hina hi chavelelekile hikwalaho ka n’wina ni ku tshembeka ka n’wina.+ 8 Hikuva hi tlhela hi va ni matimba loko mi yima mi tiyile eHosini. 9 Xana hi nga xi khensa hi yini Xikwembu xa hina hikwalaho ka n’wina, ni ntsako lowukulu lowu hi nga na wona emahlweni ka xona hikwalaho ka n’wina? 10 Vusiku ni nhlikanhi ha khongela hi mbilu hinkwayo leswaku hi ta mi vona ni leswaku hi ta mi pfuna hi leswi mi swi pfumalaka leswaku mi tiyisa ripfumelo ra n’wina.+
11 Onge sweswi Xikwembu tlhelo Tata wa hina ni Hosi ya hina Yesu va nga hi pfulela ndlela leswaku hi ta eka n’wina. 12 Ku tlula kwalaho, onge Hosi yi nga endla leswaku ndlela leyi mi rhandzanaka ha yona ni ndlela leyi mi rhandzaka vanhu hinkwavo ha yona yi kula+ yi tata timbilu ta n’wina hilaha hi mi rhandzaka ha kona, 13 leswaku yi ta tiyisa timbilu ta n’wina, yi mi endla mi pfumala nandzu naswona mi kwetsima emahlweni ka Xikwembu+ tlhelo Tata wa hina hi nkarhi wa ku vuya ka Hosi ya hina Yesu+ ni vakwetsimi vakwe hinkwavo.