Vaavanyisi

18 Emasikwini wolawo a ku nga ri na hosi eIsrayele.+ Naswona emasikwini wolawo nyimba ya va ka Dani+ a yi lava ndhawu* yo tshama eka yona, hikuva a yi nga si yi kuma hi ku helela ndzhaka ya yona exikarhi ka tinyimba ta Israyele.+

2 Hiloko va ka Dani va rhumela vavanuna va ntlhanu lava humaka eka ndyangu wa vona, vavanuna lava nga ni vuswikoti lava humaka eSora ni le Exitawoli,+ leswaku va ya kambela tiko ni ku ri valanga. Kutani va ku eka vona: “Fambani mi ya valanga tiko.” Va fika va etlela endlwini ya Mikiya+ endhawini ya tintshava ya Efrayimi. 3 Loko va ri ekusuhi ni yindlu ya Mikiya, va twa rito* ra jaha ra Mulevhi, kutani va ya eka rona va fika va ri vutisa va ku: “I mani loyi a ku tiseke laha? Xana u endla yini laha? I yini lexi ku endlaka u tshama laha?” 4 Jaha leri ri va byela leswi Mikiya a ri endleleke swona kutani ri ku: “U ndzi thole ku va muprista wakwe.”+ 5 Kutani va ku eka rona: “Hi kombela u hi vutisela eka Xikwembu loko riendzo ra hina ri ta famba kahle.” 6 Muprista loyi a ku eka vona: “Fambani hi ku rhula. Yehovha u na n’wina eka riendzo ra n’wina.”

7 Hiloko vavanuna lava va ntlhanu va famba va ya fika eLayixi.+ Va vona leswaku vanhu va muti wolowo a va nga titsheganga hi vanhu van’wana ku fana ni Vasidoni. A va ri ni ku rhula, a va nga ehleketeleli munhu swo biha+ naswona a ku nga ri na vafumi lava va tshikilelaka. A va tshama ekule swinene ni Vasidoni naswona a va nga tirhisani ni vanhu van’wana.

8 Loko va tlhelela eka vamakwavo eSora ni le Exitawoli,+ va va vutisile va ku: “Mi fambe njhani?” 9 Hiloko va ku: “A hi fambeni hi ya lwa na vona, hikuva hi swi vonile leswaku tiko leri i rinene ngopfu. Mi nga kanakani. Mi nga hlweli fambani mi ya teka tiko. 10 Loko mi fika, mi ta kuma vanhu lava nga ehleketeleliki munhu swo biha+ naswona tiko ra kona i rikulu. Xikwembu xi mi nyike rona naswona a ku pfumaleki nchumu eka rona.”+

11 Kutani vavanuna va 600 lava humaka endyangwini wa Dani lava hlomeleke nyimpi va suka eSora ni le Exitawoli.+ 12 Va ya dzima mixaxa le Kiriyati-yeyarimi+ eYuda. Hi yona mhaka ndhawu yoleyo, leyi nga evupeladyambu bya Kiriyati-yeyarimi, yi vitaniwaka Mahane-dani*+ ku ta fika namuntlha. 13 Va suke kwalaho va ya endhawini ya tintshava ya Efrayimi kutani va fika endlwini ya Mikiya.+

14 Hiloko vavanuna va ntlhanu lava yeke va ya kambela tiko ra Layixi+ va byela vamakwavo va ku: “Xana ma swi tiva leswaku etindlwini leti ku ni efodi, swifaniso swa terafimi,* xifaniso lexi vatliweke ni xifaniso xa nsimbhi?+ Anakanyani hi leswi mi nga ta swi endla.” 15 Kutani va yima kwalaho hiloko vavanuna va ntlhanu va ya endlwini ya jaha ra Mulevhi+ leyi a yi ri ekusuhi ni yindlu ya Mikiya, va ri xeweta. 16 Hi nkarhi wolowo, vavanuna va 600 va nyimba ya Dani+ lava hlomeleke nyimpi a va yime egedeni ya muti. 17 Vavanuna va ntlhanu lava a va ya kambela tiko+ va nghena endzeni va teka xifaniso lexi vatliweke, efodi,+ swifaniso swa terafimi*+ ni xifaniso xa nsimbhi.+ (Muprista+ a a yime egedeni ya muti a ri ni vavanuna va 600 lava hlomeleke nyimpi.) 18 Va nghene endlwini ya Mikiya va teka xifaniso lexi vatliweke, efodi, swifaniso swa terafimi* ni xifaniso xa nsimbhi. Muprista a va vutisa a ku: “Mi endla yini?” 19 Hiloko va ku eka yena: “Miyela, u famba na hina u va mutsundzuxi* ni muprista wa hina. Xana a wu swi voni swi antswa ku va muprista wa nyimba ni wa ndyangu hinkwawo wa Israyele,+ ku tlula ku va muprista wa ndyangu wa munhu un’we?”+ 20 Hiloko muprista a tsaka, kutani a teka efodi, swifaniso swa terafimi* ni xifaniso lexi vatliweke+ a famba na vona.

21 Kutani va suka va famba, va rhangisa vana, swifuwo ni swilo swa vona swa nkoka. 22 Va ka Dani a va fambe mpfhukanyana ku suka endlwini ya Mikiya loko vavanuna lava a va tshama etindlwini leti nga ekusuhi ni yindlu ya Mikiya va hlengeletana va va hlongorisa. 23 Loko va huwelela vanhu va ka Dani, vona va byela Mikiya va ku: “Se swi lo yini? Hikwalaho ka yini u hlengelete vanhu mi hi hlongorisa?” 24 Yena a ku: “Mi teke swikwembu swa mina leswi ndzi nga swi endla naswona mi fambe ni muprista wa mina. A ndza ha salanga na nchumu. Kutani, hikwalaho ka yini mi ndzi vutisa mi ku, ‘Se swi lo yini?’” 25 Va ka Dani va ku eka yena: “U nga hi beli huwa; hikuva vavanuna lava hlundzukeke va nga mi hlasela, kutani va ku dlaya wena ni ndyangu wa wena.” 26 Hiloko vanhu va ka Dani va famba; Mikiya a vona leswaku a a nga ta va hlula, kutani a tlhelela endlwini yakwe.

27 Endzhaku ka loko va teke swikwembu leswi Mikiya a swi endleke ni muprista wa yena, va ya eLayixi,+ emutini wa vanhu vo rhula lava nga ehleketeleliki munhu swo biha.+ Va fika va va dlaya hi banga kutani va hisa muti hi ndzilo. 28 A ku nga ri na munhu loyi a a ta ponisa muti lowu hikuva a wu ri ekule swinene ni le Sidoni naswona a wu nga tirhisani ni vanhu van’wana, a wu ri enkoveni wa Beta-rehobo.+ Hiloko va pfuxa muti wolowo va tshama eka wona. 29 Ku engetela kwalaho, va thye muti wolowo vito ra Dani,+ ku nga vito ra tata wa vona, loyi a a ri n’wana wa Israyele.+ Kambe muti lowu khale a wu vitaniwa Layixi.+ 30 Endzhaku ka sweswo va ka Dani va yimisa xifaniso lexi vatliweke,+ kutani Yonathani+ n’wana wa Gerixomu+ loyi a a ri n’wana wa Muxe ni vana vakwe va va vaprista va vanhu va nyimba ya Dani ku fikela siku leri vaaki va le tikweni rero va yisiweke evuhlongeni ha rona. 31 Va yimisa xifaniso lexi vatliweke lexi endliweke hi Mikiya naswona xi ve kwalaho masiku hinkwawo lawa yindlu ya Xikwembu xa ntiyiso a yi ri eXilo+ ha wona.