Vakorinto Wo Sungula
16 Loko swi ta eka mhaka ya nhlengo wa vakwetsimi,+ mi nga landzela swileriso leswi ndzi swi nyikeke mavandlha ya le Galatiya. 2 Hi siku ro sungula ra vhiki rin’wana ni rin’wana, un’wana ni un’wana wa n’wina u fanele a veka swo karhi etlhelo, hi ku ya hi leswi a nga na swona, leswaku ku nga humesiwi mihlengo loko ndzi fika. 3 Kambe loko ndzi fika kwalaho, ndzi ta rhuma vavanuna lava mi va bumabumelaka eka mapapila ya n’wina+ leswaku va yi yisa eYerusalema nyiko ya n’wina leyi mi yi nyikeleke hi ku swi rhandza. 4 Hambiswiritano, loko swi fanela leswaku na mina ndzi ya kona, ndzi ta famba na vona.
5 Kambe ndzi ta ta eka n’wina loko ndzi hundze hi le Makedoniya hikuva ndzi ta hundza hi kona;+ 6 kumbexana ndzi ta tshama na n’wina, kukondza ku hela vuxika leswaku mi ta ndzi heleketanyana laha ndzi yaka kona. 7 Hikuva a ndzi lavi ku mi vona loko ndzi hundza sweswi ntsena, tanihi leswi ndzi navelaka ku tshama na n’wina nkarhinyana+ loko Yehovha* a swi rhandza. 8 Kambe ndza ha ta tshama eEfesa+ kukondza ku fika Nkhuvo wa Pentekosta, 9 hikuva ndzi nyikiwe njombo leyikulu* yo endla ntirho wa Hosi,+ kambe ku ni vakaneti vo tala.
10 Kutani loko Timotiya+ a fika, n’wi endleni a titwa a tshunxekile loko a ri na n’wina, hikuva u endla ntirho wa Yehovha,*+ ku fana na mina. 11 Hikwalaho, ku nga vi ni loyi a n’wi tekelaka ehansi. N’wi heleketeni hi ku rhula, leswaku a ta ta haleno hikuva hi n’wi rindzile ni vamakwerhu.
12 Makwerhu Apolosi,+ ndzi n’wi kombele leswaku a ta eka n’wina ni vamakwerhu. A nga tiyimiselanga ku ta sweswi, kambe u ta ta loko a kuma nkarhi.
13 Tshamani mi xalamukile,+ yimani mi tiyile eripfumelweni,+ yanani emahlweni mi va ni xivindzi,+ vanani ni matimba.+ 14 Hinkwaswo leswi mi swi endlaka swi endleni hi rirhandzu.+
15 Kutani ndza mi kombela vamakwerhu: Ma swi tiva leswaku vandyangu wa ka Stefanasi i vadyondzisiwa vo sungula eAkaya ni leswaku va tinyiketele ku tirhela vakwetsimi. 16 Onge na n’wina mi nga titsongahata eka vanhu vo tano ni le ka hinkwavo lava khomisanaka na n’wina va tlhela va tirha hi matimba.+ 17 Kambe ndza tsaka hi leswi ku nga na Stefanasi+ na Fortunato na Akayiko, hikuva va sive n’wina leswi mi nga riki kona haleno. 18 Hikuva va hi khutazile hinkwerhu. Hikwalaho, xiximani vavanuna vo tano.
19 Mavandlha ya le Asiya ya mi rungula. Akhwila na Priska swin’we ni vandlha leri hlengeletanaka endlwini ya vona+ va mi rungula hi mbilu hinkwayo eHosini. 20 Vamakwerhu hinkwavo va mi rungula. Xewetanani hi ku tswontswana.*
21 Hi lawa marungula ya mina Pawulo, lama ndzi nga lo ti tsalela wona.
22 Loko munhu a nga yi rhandzi Hosi a a rhukaniwe. Tana, Hosi ya hina! 23 Onge musa lowukulu wa Hosi Yesu wu nga va na n’wina. 24 Onge rirhandzu ra mina ri nga va na n’wina hinkwenu lava nga vadyondzisiwa va Kreste Yesu.