Tikronika Ta Vumbirhi
35 Yosiya a endlela Yehovha Paseka+ eYerusalema naswona va tlhave swifuwo swo endla magandzelo ya Paseka+ hi siku ra vu-14 ra n’hweti yo sungula.+ 2 A avela vaprista mitirho leyi va faneleke va yi endla a tlhela a va khutaza ku endla mitirho ya vona endlwini ya Yehovha.+ 3 Kutani a byela Valevhi, vadyondzisi va tiko hinkwaro ra Israyele,+ lava a va kwetsima eka Yehovha a ku: “Vekani Areka yo kwetsima endlwini leyi Solomoni n’wana wa Davhida hosi ya Israyele a yi akeke;+ a ma ha fanelanga mi yi rhwala emakatleni ya n’wina.+ Sweswi tirhelani Yehovha Xikwembu xa n’wina ni vanhu vakwe ku nga Vaisrayele. 4 Lunghekani hi ku ya hi tindhuna ta mindyangu ya n’wina mi va hi mitlawa hi ku landza leswi tsariweke hi Hosi Davhida+ wa Israyele ni leswi tsariweke hi Solomoni n’wana wakwe.+ 5 Yimani endhawini yo kwetsima hi mitlawa ya mindyangu ya vatata wa n’wina, vamakwenu, eka un’wana ni un’wana wa vona ku fanele ku va ni ntlawa wa ndyangu wa tata wa Valevhi. 6 Tlhavani swifuwo swo endla magandzelo ya Paseka+ mi tlhela mi tibasisa, mi pfuna vamakwenu ku endla leswi Yehovha a swi vuleke hi ku tirhisa Muxe.”
7 Yosiya a nyikela eka vanhu mitlhambi ya swinyimpfana swa xinuna ni swiphongo leswitsongo swa 30 000 ni tihomu ta 3 000 leswaku vanhu hinkwavo lava a va ri kona va endla magandzelo ya Paseka hi swona. Hinkwaswo ka swona a swi huma eka hosi.+ 8 Tihosana ta yena na tona ti humesa munyikelo wa ku tirhandzela wa gandzelo ra vanhu, vaprista ni Valevhi. Hilkiya,+ Zakariya na Yehiyele lava nga tindhuna endlwini ya Xikwembu xa ntiyiso, va nyike vaprista swifuwo swa 2 600 swo endla magandzelo ya Paseka ni tihomu ta 300. 9 Konaniya ni vamakwavo, Xemaya na Nethanele ku katsa na Haxabiya, Yeyiyele na Yozabadi lava nga tindhuna ta Valevhi, va nyikele hi swifuwo swa 5 000 swo endla magandzelo ya Paseka ni tihomu ta 500 eka Valevhi.
10 Hiloko va lunghekela ku endla ntirho, kutani vaprista va yima laha va averiweke kona ni Valevhi hi ku ya hi mitlawa ya vona+ hilaha hosi yi leriseke hakona. 11 Va tlhava swifuwo swo endla magandzelo ya Paseka+ ivi vaprista va n’wan’wasela ngati leyi va va nyiketeke yona,+ kasi Valevhi a va ri karhi va yevula swifuwo.+ 12 Endzhaku ka sweswo va veka etlhelo nyama ya magandzelo yo hisiwa leswaku va ta yi nyika vanhu hinkwavo, lava a va aviwe hi ku ya hi tindhuna ta mindyangu ya vona, leswaku va ma nyikela eka Yehovha hilaha swi tsariweke hakona ebukwini ya Muxe; naswona va endle tano ni hi tihomu. 13 Va sweka nyama ya Paseka endzilweni hilaha a swi endliwa hakona;+ va tlhele va sweka ni magandzelo yo kwetsima etimbiteni ni le mapanini endzhaku ka sweswo va ma tisa hi ku hatlisa eka vanhu hinkwavo. 14 Hiloko va lulamisa swakudya swa vona ni swa vaprista, hikuva vaprista, vatukulu va Aroni a va ri ku nyikeleni ka magandzelo yo hisiwa ni mafurha ya swiharhi kukondza ku va vusiku, kutani Valevhi va lulamisa swa vona ni vaprista lava nga vatukulu va Aroni.
15 Vayimbeleri, vana va Asafa,+ a va endla mitirho ya vona hi ku ya hi xileriso xa Davhida,+ Asafa,+ Hemani na Yedutani+ muvoni wa swivono swa hosi; naswona varindzi va tigede a va ri etigedeni to hambanahambana.+ A swi nga bohi leswaku va tshika mitirho ya vona hikuva vamakwavo, lava nga Valevhi a va va lulamisele swakudya swa Paseka. 16 Ntirho hinkwawo lowu endleriwaka Yehovha a wu lunghiseleriwile esikwini rero leswaku ku ta endliwa Paseka+ ni magandzelo yo hisiwa ehenhla ka altari ya Yehovha, hi ku landza xileriso xa Hosi Yosiya.+
17 Vaisrayele lava a va ri kona va endle Paseka hi nkarhi wolowo ni Nkhuvo Wa Swinkwa Leswi Nga Riki Na Comela masiku ya nkombo.+ 18 A ku nga si tshama ku endliwa Paseka yo fana na yona eIsrayele ku sukela enkarhini wa muprofeta Samuwele; naswona a yi vanga kona hosi ya le Israyele leyi nga tshama yi endla Paseka yo fana ni leyi endliweke hi Yosiya,+ vaprista, Valevhi, tiko ra Yuda hinkwaro ni ra Israyele lava a va ri kona ni vanhu va le Yerusalema. 19 Paseka leyi yi endliwe hi lembe ra vu-18 ra ku fuma ka Yosiya.
20 Endzhaku ka swilo leswi hinkwaswo, loko Yosiya a hete ku lunghisa tempele, Hosi Neko+ wa le Egipta a hloma a ya eKarikemixi ekusuhi ni le Yufrata. Hiloko Yosiya a huma a ya hlangana na yena.+ 21 Kutani a rhumela malandza eka yena a ku: “Hikwalaho ka yini u tile leswaku u ta hlangana na mina, wena hosi ya Yuda? A ndzi telanga ku lwa na wena namuntlha kambe ndzi tele ku lwa ni mfumo wun’wana naswona Xikwembu xi vule leswaku ndzi fanele ndzi swi endla hi xihatla. Leswaku u pona, tshika ku lwa na Xikwembu lexi nga na mina leswaku xi nga ku lovisi.” 22 Hambiswiritano, Yosiya a nga tlhelanga kambe u titumbetile+ leswaku a nga n’wi tivi, a nga ma yingisanga marito ya Neko lama a ma huma eka Xikwembu. Kutani a ya, a ya lwa na yena eRivaleni ra Megido.+
23 Hiloko vacopi va copa Hosi Yosiya, kutani a byela malandza yakwe a ku: “Ndzi suseni laha hikuva ndzi vavisekile swinene.” 24 Kutani malandza yakwe ma n’wi xikisa ekalichini, ma n’wi khandziyisa kalichi yakwe ya vumbirhi ya nyimpi ma n’wi tisa eYerusalema. Xisweswo a fa a lahliwa eswilahlweni swa vakokwa+ wakwe, tiko hinkwaro ra Yuda ni ra Yerusalema ma rila Yosiya. 25 Yeremiya+ a sungula ku yimbelelela Yosiya risimu ra xirilo kutani vayimbeleri hinkwavo vaxinuna ni vaxisati+ va ya emahlweni va yimbelela hi Yosiya eka tinsimu ta vona ta xirilo ku ta fikela namuntlha; ku humesiwe xileriso xa leswaku tinsimu teto ti yimbeleriwa eIsrayele naswona ti tsariwe eka tinsimu ta xirilo.
26 Loko ku ri matimu ya Yosiya hinkwawo ni mitirho leyi a yi endleke hi rirhandzu, leswaku a yingisa leswi tsariweke eNawini wa Yehovha 27 ni leswi a swi endleke, ku sukela eku sunguleni ku ya emakumu, swi tsariwile eBukwini ya Tihosi ta Israyele ni ta Yuda.+