Vaavanyisi

9 Abimeleke+ n’wana wa Yerubali a ya eka vamalume vakwe eXikeme, a fika a vulavula na vona ni ndyangu hinkwawo wa kokwa wakwe wa xinuna,* a ku: 2 “Ndzi kombela mi vutisa varhangeri* hinkwavo va muti wa Xikeme mi ku, ‘I yini lexi antswaka eka n’wina, xana i ku va mi fumiwa hi vana hinkwavo va Yerubali+ va 70 kumbe hi munhu un’we? Tsundzukani leswaku ndzi n’wana wa n’wina.’”

3 Hiloko vamalume vakwe va ya vulavula ni varhangeri hinkwavo va le Xikeme hi mhaka leyi, kutani varhangeri va le Xikeme va hlawula ku fumiwa hi Abimeleke, hikuva a va ku: “I makwerhu.” 4 Kutani va nyika Abimeleke swiphemu swa silivhere swa 70 leswi a swi huma endlwini* ya Bali-beriti,+ hiloko a swi tirhisa ku hakela vavanuna lava a va nga tirhi nchumu, lava nga ni tihanyi leswaku va n’wi heleketa. 5 Endzhaku ka sweswo a ya endlwini ya tata wakwe eOfira+ kutani a fika a dlaya vamakwavo,+ ku nga vana va Yerubali, vavanuna va 70 ehenhla ka ribye rin’we. Kambe ku sala Yohatama n’wana wa Yerubali lontsongo hikuva a a tumberile.

6 Hiloko varhangeri hinkwavo va le Xikeme ni va le Beti-milo va hlengeletana, kutani va endla Abimeleke hosi+ ekusuhi ni murhi lowukulu, ekusuhi ni phuphu ya le Xikeme.

7 Loko Yohatama a twa mhaka leyi, a famba a ya yima ehenhla ka Ntshava ya Gerizimu,+ a fika a huwelela a ku: “Ndzi yingiseni n’wina varhangeri va Xikeme kutani Xikwembu na xona xi ta mi yingisa.

8 “Khale ka khaleni ku tshame ku va ni mirhi leyi fambeke yi ya tihlawulela hosi. Hiloko yi byela murhi wa mutlhwari yi ku, ‘Vana hosi ya hina.’+ 9 Kambe murhi wa mutlhwari wu ku, ‘Xana ndzi fanele ndzi tshika mafurha ya mina lawa ma tirhisiwaka ku vangamisa Xikwembu ni vanhu, kutani marhavi ya mina ma voyamela eka mirhi yin’wana?’ 10 Kutani mirhi yi byela nkuwa yi ku, ‘Tana u ta va hosi ya hina.’ 11 Kambe nkuwa wu ku eka yona, ‘Xana ndzi fanele ndzi tshika ku tsokombela ni ku tswala mihandzu kutani marhavi ya mina ma voyamela eka mirhi yin’wana?’ 12 Endzhaku ka sweswo mirhi yi byela mudiriva yi ku, ‘Tana u ta va hosi ya hina.’ 13 Mudiriva wu ku eka yona, ‘Xana ndzi fanele ndzi tshika vhinyo ya mina leyintshwa leyi tsakisaka Xikwembu ni vanhu, kutani marhavi ya mina ma voyamela eka mirhi yin’wana?’ 14 Eku heteleleni mirhi hinkwayo yi byela ndzhenga yi ku, ‘Tana u ta va hosi ya hina.’+ 15 Kutani ndzhenga wu byela mirhi hinkwayo wu ku, ‘Loko hakunene mi lava leswaku ndzi va hosi ya n’wina, tanani mi ta tumbela endzhutini wa mina. Kambe loko swi nga ri tano, ndzilo a wu hume emarhavini ya mina wu hisa mikedari ya Lebanoni.’

16 “Xana leswi mi vekeke Abimeleke ku va hosi,+ mi swi endle hi timbilu ta n’wina hinkwato naswona xana mi kombise ku tshembeka eka Yerubali ni ndyangu wakwe mi khensa leswi a mi endleleke swona? 17 Tata wa mina u mi lwerile+ a veka vutomi byakwe ekhombyeni leswaku a mi ponisa eka Vamidiyani.+ 18 Kambe namuntlha mi pfukele vandyangu wa tatana kutani mi dlaya vana vakwe, ku nga vavanuna va 70, ehenhla ka ribye rin’we.+ Mi endle Abimeleke n’wana wa nsati wakwe lontsongo loyi a a ri nandza wakwe+ a va hosi ya varhangeri va le Xikeme hileswi a nga makwenu wa n’wina. 19 Loko mi endle hi ku tshembeka eka Yerubali ni ndyangu wakwe namuntlha, tsakani hi leswi mi endleke Abimeleke hosi, na yena a a tsake ha n’wina. 20 Kambe loko swi nga ri tano, onge ndzilo wu nga huma eka Abimeleke wu hisa varhangeri va le Xikeme ni va le Beti-milo+ naswona onge ndzilo wu nga huma eka varhangeri va le Xikeme ni va le Beti-milo wu hisa Abimeleke.”+

21 Hiloko Yohatama+ a baleka a ya eBeyera a ya tshama kona hileswi a a chava Abimeleke makwavo.

22 Abimeleke u fume* malembe manharhu eIsrayele. 23 Hiloko Xikwembu xi endla leswaku ku nga vi na ku rhula* exikarhi ka Abimeleke ni varhangeri va le Xikeme, kutani va sungula ku nga ha tshembeki eka yena. 24 Leswi swi endlekile leswaku tihanyi leti endliweke eka vana va 70 va Yerubali ti ta rihiseriwa. Abimeleke ni varhangeri va le Xikeme a va fanele va riha ngati leyi va yi halateke ya vamakwavo vakwe,+ lava a va dlayeke a pfuniwa hi varhangeri va le Xikeme. 25 Hiloko varhangeri va le Xikeme va veka vavanuna lava nga ta n’wi tumbelela etintshaveni naswona vavanuna volavo a va tekela vanhu lava a va hundza kwalaho swilo swa vona. Abimeleke u hetelele a byeriwe mhaka leyi.

26 Kutani Gali n’wana wa Ebedi ni vamakwavo va pelela eXikeme,+ hiloko varhangeri va le Xikeme va n’wi tshemba. 27 Va ya emasin’wini ya vona ya madiriva va fika va hlengeleta madiriva, va ma pyanya kutani va endla nkhuvo, endzhaku ka sweswo va ya endlwini ya xikwembu xa vona,+ va fika va dya, va nwa ni ku rhukana Abimeleke. 28 Kutani Gali n’wana wa Ebedi a ku: “I mani Abimeleke naswona i mani Xikeme* leswaku hi nga va tirhela? Xana a hi n’wana wa Yerubali+ naswona xana Zebulu a hi ndhuna yakwe? Tirhelani vana va Hamori, tata wa Xikeme! Kambe hikwalaho ka yini hi fanele hi tirhela Abimeleke? 29 Loko a ndzi ri ndhuna ya vanhu lava, a ndzi ta susa Abimeleke.” Hiloko a byela Abimeleke a ku: “Engetela masocha ya wena u ta hi ta lwa.”

30 Loko Zebulu ndhuna ya muti a twa marito ya Gali n’wana wa Ebedi, a hlundzuka swinene. 31 Hiloko a rhuma vanhu exihundleni leswaku va ya eka Abimeleke, va fika va ku: “Gali n’wana wa Ebedi ni vamakwavo va le Xikeme, va hlohlotela vanhu leswaku va lwa na wena. 32 Kutani huma nivusiku, wena ni vavanuna lava nga na wena, mi ya va tumbelela enhoveni. 33 Loko dyambu ri huma nimixo, u fanele u pfuka u ya hlasela muti; kutani loko a huma ni vavanuna lava nga na yena, endla xin’wana ni xin’wana lexi u nga xi kotaka leswaku u n’wi hlula.”

34 Hiloko Abimeleke ni vanhu hinkwavo lava a a ri na vona va pfuka nivusiku va ya tumbelela vaaki va Xikeme, va ri mitlawa ya mune. 35 Hi siku leri landzelaka loko Gali n’wana wa Ebedi a huma a ya yima egedeni ya muti, Abimeleke ni vanhu lava a a ri na vona va huma laha va nga tumbela kona. 36 Loko Gali a vona vanhu lava, a byela Zebulu a ku: “Vona! Ku ni vanhu va ehlaka hi le tintshaveni.” Kambe Zebulu a ku eka yena: “Wena u vona mindzhuti ya tintshava onge hiloko yi ri vanhu.”

37 Endzhaku ka sweswo Gali a ku: “Vona! Ku ni vanhu lava nga le ku teni, va ta hi le xikarhi ka tintshava naswona ntlawa wun’wana wu ta hi ndlela leyi kongomeke murhi lowukulu wa Meyonenimi.” 38 Zebulu a ku eka yena: “Leswi a wu tibuma u ku, ‘I mani Abimeleke leswaku hi n’wi tirhela?’+ Xana vanhu lava a hi vona lava a wu va sandza? Huma u ya lwa na vona.”

39 Hiloko Gali a huma a rhangela varhangeri va Xikeme, a ya lwa na Abimeleke. 40 Abimeleke a n’wi hlongorisa kambe Gali a baleka naswona ku dlayiwe vanhu vo tala endleleni yo nghena emutini.

41 Abimeleke a ya emahlweni a tshama eAruma kutani Zebulu+ a hlongola Gali ni vamakwavo eXikeme. 42 Hi siku leri landzelaka vanhu va huma emutini va ya enhoveni, hiloko Abimeleke a byeriwa mhaka leyi. 43 Kutani a teka vanhu a va ava va va mitlawa yinharhu, va famba va ya tumbela enhoveni. Loko a vona vanhu va ri karhi va huma emutini, a va hlasela a va dlaya. 44 Abimeleke ni mitlawa leyi a a ri na yona va tsutsuma va ya yima egedeni ya muti, kasi mitlawa leyin’wana yimbirhi a yi ri karhi yi hlasela ni ku dlaya vanhu hinkwavo lava a va ri enhoveni. 45 Abimeleke a lwa ni muti wolowo siku rero hinkwaro, a wu teka. A dlaya vanhu lava a va ri eka wona, endzhaku ka sweswo a wu hirimuxa+ a tlhela a wu haxa hi munyu.

46 Loko varhangeri lava a va tshama eka xihondzo xa le Xikeme va twa sweswo, va hatla va famba va ya nghena ekamareni ro tumbela eka rona endlwini* ya Ele-beriti.+ 47 Loko Abimeleke a byeriwa leswaku varhangeri hinkwavo va xihondzo xa Xikeme va hlengeletanile, 48 Abimeleke ni vavanuna lava a va ri na yena va ya eNtshaveni ya Zalmona. Hiloko Abimeleke a teka xihloka a tsema rhavi ra murhi a ri tlhandleka ekatleni, kutani a byela lava a a famba na vona a ku: “Hatlisani mi endla leswi mi voneke ndzi swi endla!” 49 Hiloko vanhu hinkwavo va tsema marhavi kutani va landzela Abimeleke. Kutani va ma khegetela ekamareni ro tumbela eka rona, hiloko va lumeka kamara rero. Vanhu hinkwavo lava a va ri exihondzweni xa Xikeme na vona va file, kwalomu ka vavanuna ni vavasati va 1 000.

50 Endzhaku ka sweswo, Abimeleke a ya eTebese; a fika a lwa ni vaaki va muti wa Tebese a wu teka. 51 A ku ri ni xihondzo xo tiya exikarhi ka muti naswona vavanuna ni vavasati hinkwavo ni varhangeri hinkwavo va muti va balekele kona. Va fika va tipfalela kona kutani va ya elwangwini ra xihondzo. 52 Abimeleke a ya exihondzweni a fika a xi hlasela. A ya enyangweni ya xona leswaku a ta xi hisa hi ndzilo. 53 Kutani wansati un’wana a hoxa ribye ro sila enhlokweni ya Abimeleke, a n’wi faya xipalapala.+ 54 Hiloko a hatla a vitana mutirhi wakwe loyi a n’wi rhwalelaka matlhari, a ku eka yena: “Humesa banga ra wena u ndzi dlaya, leswaku va nga vuli va ku, ‘U dlayiwe hi wansati.’” Kutani mutirhi wakwe a n’wi tlhava, a fa.

55 Loko vavanuna va Israyele va vona leswaku Abimeleke u file, va tlhelela emakaya. 56 Hi ndlela yoleyo Xikwembu xi rihisele vubihi lebyi Abimeleke a byi endleke eka tata wakwe hi ku dlaya vamakwavo vakwe va 70.+ 57 Xikwembu xi rihisele vubihi hinkwabyo lebyi endliweke hi vavanuna va le Xikeme. Kutani va weriwe hi ndzhukano lowu vuriweke hi Yohatama+ n’wana wa Yerubali.+