Ezekiyele
27 Yehovha a tlhela a vulavula na mina a ku: 2 “Wena n’wana wa munhu, yimbelelela Tiri risimu ra xirilo,+ 3 u byela Tiri u ku,
‘Wena loyi a tshamaka ekusuhi ni lwandle,
Wena loyi a xaviselaka vanhu va swihlala swo tala,
Yehovha Hosi Leyi Tlakukeke u ri:
“Wena Tiri u te, ‘Ndzi saseke hi ku helela.’+
4 Tindhawu ta wena ti le xidziveni xa lwandle,
Lava ku akeke va ku endle u saseka hi ku helela.
5 Mapulanga ya wena hinkwawo va ma endle hi mirhi ya yunipa ya le Seniri,+
Va teke mukedari wa le Lebanoni va ku endlela mhandzi yo khoma maseyila.
6 Va ku endlele timhandzi to tluta ha tona hi mirhi leyikulu ya le Baxani,
Nhompfu ya wena a yi endliwe hi murhi wa kipresi yi khavisiwe hi timhondzo ta tindlopfu leti humaka eswihlaleni swa Kitimi.+
7 Seyila ra wena a ri endliwe hi lapi ra mivalavala ra le Egipta,
Mindzhuti leyi nga eka wena a yi endliwe hi harhani ya wasi ni hi voya lebyi pendiweke byi va bya phephulu* leswi humaka eswihlaleni swa Elixa.+
8 Vaaki va le Sidoni ni va le Avhadi+ a va ri vatlutisi va wena.
Wena Tiri, vatlutisi va wena a ku ri vanhu va wena lava nga ni vuswikoti.+
9 Vavanuna* lava nga ni ntokoto ni vuswikoti va le Gebali+ va leme swikepe swa wena leswaku swi nga nghenisi mati.+
Swikepe hinkwaswo swa le lwandle ni vafambisi va swona va te eka wena leswaku mi xaviselana.
10 Vavanuna va le Peresiya, Ludi na Putu+ a va ri exikarhi ka vuthu ra wena, vavanuna va wena va nyimpi.
Va hayeke switlhangu ni magondolo* ya vona ya nyimpi eka wena, va ku tisele ku vangama.
11 Vavanuna va le Avhadi lava nga evuthwini ra wena va yimisiwe va rhendzela makhumbi ya wena,
Vavanuna lava nga ni xivindzi va sirhelele swihondzo swa wena.
Va hayeke switlhangu swa xirhendzevutana emakhumbini ya wena hinkwawo
Va ku endla u saseka hi ku helela.
12 “‘“Taraxixi+ u endle bindzu na wena hikwalaho ka leswi u nga ni rifuwo ro tala.+ Va ku nyike silivhere, nsimbhi, thini ni ntsopfu kutani wena u va nyika nhundzu ya wena.+ 13 Yavhani, Tubala+ na Mixeke,+ va xaviselane swilo na wena, va ku nyike mahlonga+ ni swilo leswi endliweke hi koporo kutani wena u va nyika nhundzu ya wena. 14 Vatukulu va Togarima+ va ku nyike tihanci ni timeyila kutani wena u va nyika nhundzu ya wena. 15 Vanhu va le Dedani+ a va xaviselana na wena; a wu ri ni vaxavisi eswihlaleni swo tala lava a va ku tirhela; va ku nyika timhondzo ta tindlopfu+ ni timhandzi ta ntima ta nkoka ku ri xibalo xa wena. 16 Edomu u endle bindzu na wena hikwalaho ka leswi u nga ni nhundzu yo tala. Va ku nyike maribye ya nkoka lama vuriwaka tukoyisi, voya bya phephulu,* malapi lama khavisiweke ya mivalavala, malapi yo vevuka, tikorala ni maribye ya nkoka yo tshwuka lama vuriwaka tirhubi kutani wena u va nyika nhundzu ya wena.
17 “‘“Yuda ni tiko ra Israyele va xaviselane na wena, va ku nyika koroni ya le Miniti,+ swakudya swa xiyimo xa le henhla, vulombe,+ mafurha ni balsama+ kutani wena u va nyika nhundzu ya wena.+
18 “‘“Damaska+ u endle bindzu na wena hikwalaho ka ku tala ka swilo leswi a wu swi endla ni rifuwo ra wena, u ku nyike vhinyo ya le Helboni ni voya bya le Zahara.* 19 Vhedana na Yavhani va le Uzala va ku nyike nsimbhi, khasiya* ni tinhlanga* kutani wena u va nyika nhundzu ya wena. 20 Dedani+ u ku xavisele malapi lama kapekiwaka ehenhla ka swifuwo leswaku ku tshamiwa eka wona. 21 U thole Vaarabiya ni tindhuna hinkwato ta le Kedari,+ leti a ti xavisa swinyimpfana, makhuna ni timbuti.+ 22 Vaxavisi va le Xeba ni va le Rhama+ a va xaviselana na wena; va ku nyike mixaka hinkwayo ya swinun’hweriso leswinene, maribye ya risima ni nsuku kutani wena u va nyika nhundzu ya wena.+ 23 Harani,+ Kane, Edeni,+ vaxavisi va le Xeba,+ Axuru+ na Kilimada a va xaviselana na wena. 24 Etimakete ta wena a va xavisa swiambalo swo saseka, swiambalo leswi endliweke hi lapi ra wasi, malapi lama khavisiweke ya mivalavala ni mimete ya mivalavala, hinkwaswo swi bohiwe hi tintambhu.
25 Swikepe swa le Taraxixi+ a swi rhwala nhundzu ya wena,
Lerova a wu ri ni rifuwo ro tala ri tlhela ri ku tikela* exikarhi ka lwandle.
26 Lava ku tlutisaka va ku tise emalwandle lama kariheke;
Moya wa le vuxeni wu ku tshovile exikarhi ka lwandle.
27 Rifuwo ra wena, nhundzu ya wena ni vatlutisi va wena,
Lava lemaka swikepe swa wena, lava xavisaka nhundzu ya wena+ ni vavanuna va wena hinkwavo va nyimpi,+
Vanhu hinkwavo lava nga exikarhi ka wena,
Hinkwavo va ta mbombomela exikarhi ka lwandle hi siku leri u nga ta wa ha rona.+
28 Loko vatlutisi va wena va huwelela, matiko lama nga le kusuhi ni lwandle ma ta tsekatseka.
29 Vatlutisi hinkwavo
Va ta xika eswikepeni swa vona va yima ehenhla ka misava.
30 Va ta huwelela va tlhela va ku rilela hi xiviti+
Va ri karhi va tichela ritshuri etinhlokweni ta vona naswona va vumbuluka enkumeni.
31 Va ta tsemeta mpandlha, va ambala swiambalo swo khwaxa;
Va ta ku rilela hi xiviti lexikulu.
32 Loko va ri karhi va rila va ta ku yimbelelela risimu ra xirilo va ku:
‘I mani loyi a fanaka na Tiri, loyi sweswi a miyeleke exikarhi ka lwandle?+
33 Loko nhundzu ya wena yi huma elwandle, u enerise vanhu vo tala.+
Rifuwo ra wena ro tala ni nhundzu ya wena swi fuwise tihosi ta misava.+
34 Sweswi u tshovekile elwandle ematini lama enteke,+
Nhundzu ya wena hinkwayo ni vanhu va wena va mbombomele na wena.+
35 Vaaki hinkwavo va le swihlaleni va ta ku languta va hlamarile,+
Tihosi ta vona ti ta rhurhumela hi ku chava,+ swikandza swa tona swi ta karhateka.
36 Vaxavisi va le matikweni man’wana va ta ku bela noti hikwalaho ka leswi ku humeleleke.
U ta lovisiwa hi xitshuketa hi ndlela yo vava,
A wu nge he vi kona hilaha ku nga heriki.’”’”+