Ezekiyele

39 “Wena n’wana wa munhu, profeta ku lwa na Gogo,+ u ku eka yena, ‘Yehovha Hosi Leyi Tlakukeke u ri: “Ndzi lwa na wena Gogo, ndhunankulu* ya Mixeke na Tubala.+ 2 Ndzi ta ku hundzuluxa, ndzi ku kongomisa, ndzi ku humesa etindhawini ta le kule swinene ta le n’walungwini,+ ndzi ku tisa ehenhla ka tintshava ta Israyele. 3 Ndzi ta ba vurha* bya wena evokweni ra wena ra ximatsi, ndzi wisa miseve ya wena evokweni ra wena ra xinene. 4 U ta wela etintshaveni ta Israyele,+ wena ni masocha ya wena hinkwawo ni vanhu lava nga ta va va ri na wena. Ndzi ta endla leswaku u dyiwa hi swinyenyana swa mixaka hinkwayo leswi dyaka nyama ni hi swiharhi.”’+

5 “‘U ta wela enhoveni,+ hikuva mina ndzi vurile,’ ku vula Yehovha Hosi Leyi Tlakukeke.

6 “‘Ndzi ta rhumela ndzilo eka Magogo ni le ka lava tshamaka eswihlaleni va sirhelelekile,+ kutani va ta swi tiva leswaku hi mina Yehovha. 7 Ndzi ta endla leswaku vito ra mina ro kwetsima ri tiviwa exikarhi ka vanhu va mina ku nga Vaisrayele, a ndzi nge he pfumeli leswaku vito ra mina ro kwetsima ri tlhela ri thyakisiwa; matiko ma ta swi tiva leswaku hi mina Yehovha,+ Mukwetsimi eIsrayele.’+

8 “‘Swilo leswi swa ta naswona swi ta endleka,’ ku vula Yehovha Hosi Leyi Tlakukeke. ‘Leri i siku leri ndzi vulavuleke ha rona. 9 Vaaki va miti ya Israyele va ta huma va ya tshivela ndzilo hi swilo swo lwa ha swona, ku nga switlhangu leswitsongo ni leswikulu, mavurha ni miseve, tinhonga to lwa ha tona ni matlhari. Va ta tshivela ndzilo ha swona+ ku ringana malembe ya nkombo. 10 A va nge he boheki ku rhwala tihunyi enhoveni kumbe ku rhotela tihunyi emakhwatini, hikuva va ta tshivela ndzilo hi swilo swo lwa ha swona.’

“‘Va ta phanga swilo swa lava a va va phangerile, va hlasela lava a va va hlaserile,’ ku vula Yehovha Hosi Leyi Tlakukeke.

11 “‘Hi siku rero ndzi ta nyika Gogo+ xilahlo eIsrayele, enkoveni lowu lava yaka evuxeni bya lwandle va hundzaka eka wona, xi ta siva ndlela ya lava hundzaka. Hi kona laha va nga ta lahla Gogo ni vanhu hinkwavo lava nga na yena kutani ndhawu yoleyo va ta yi vitana Nkova wa Hamoni-Gogo.*+ 12 Vanhu va Israyele va ta heta tin’hweti ta nkombo va ri karhi va va lahla va basisa tiko.+ 13 Vanhu hinkwavo va tiko va ta va lahla, kutani leswi swi ta endla leswaku va va ni ndhuma hi siku leri ndzi tivangamisaka ha rona,’+ ku vula Yehovha Hosi Leyi Tlakukeke.

14 “‘Vavanuna va ta averiwa ku tshama va ri karhi va tsemakanya etikweni ni ku lahla mitsumbu leyi nga ta va yi sele, leswaku va ri basisa. Va ta ya emahlweni va yi lavisisa ku ringana tin’hweti ta nkombo. 15 Loko lava tsemakanyaka etikweni va vona rhambu ra munhu, va ta veka mfungho etlhelo ka rona. Kutani lava averiweke ku lahla va ta ri lahla eNkoveni wa Hamoni-Gogo.+ 16 Nakambe ku ta va ni muti lowu vuriwaka Hamona* kwalaho. Va ta basisa tiko.’+

17 “Wena n’wana wa munhu, Yehovha Hosi Leyi Tlakukeke u ri: ‘Byela swinyenyana hinkwaswo ni swiharhi hinkwaswo u ku, “Hlengeletanani mi ta. Hlengeletanani ematlhelo ka gandzelo ra mina leri ndzi mi lunghiselelaka rona, gandzelo lerikulu etintshaveni ta Israyele.+ Mi ta dya nyama mi tlhela mi nwa ngati.+ 18 Mi ta dya nyama ya tinhenha mi tlhela mi nwa ngati ya tindhuna ta misava, makhuna, tinyimpfu, timbuti ni tinkuzi, swifuwo hinkwaswo leswi noneke swa le Baxani. 19 Eka gandzelo leri ndzi mi lunghiselelaka rona, mi ta dya mafurha yo tala swinene mi tlhela mi nwa ngati ku fikela loko mi dakwa.”’

20 “‘Etafuleni ra mina mi ta dya tihanci ni vachayeri va makalichi, vanhu va matimba ni tinhenha ta mixaka hinkwayo,’+ ku vula Yehovha Hosi Leyi Tlakukeke.

21 “‘Ndzi ta kombisa ku vangama ka mina exikarhi ka matiko, kutani matiko hinkwawo ma ta vona ndlela leyi ndzi avanyiseke ha yona ni matimba lawa ndzi ma kombiseke exikarhi ka wona.+ 22 Ku sukela hi siku rero ku ya emahlweni, vanhu va Israyele va ta swi tiva leswaku hi mina Yehovha Xikwembu xa vona. 23 Matiko ma ta swi tiva leswaku vanhu va Israyele va ye evuhlongeni hikwalaho ka xihoxo xa vona, hikwalaho ka leswi va nga tshembekangiki eka mina.+ Ndzi va tumbetele xikandza xa mina,+ ndzi va nyiketa eka valala va vona+ kutani hinkwavo ka vona va dlayiwe hi banga. 24 Ndzi va khome hi ku ya hilaha va tithyakiseke hakona ni hi ku ya hilaha va dyoheke hakona naswona ndzi va tumbetele xikandza xa mina.’

25 “Hikwalaho Yehovha Hosi Leyi Tlakukeke u ri: ‘Vanhu va Yakobo lava a va ri evuhlongeni ndzi ta va tlherisela etikweni ra vona+ naswona ndzi ta va ni tintswalo eka vanhu hinkwavo va Israyele;+ kutani ndzi ta tirhisa matimba leswaku ndzi yimelela vito ra mina ro kwetsima.+ 26 Endzhaku ka loko va khomisiwe tingana hikwalaho ko va va nga tshembekanga eka mina,+ va ta tshama etikweni ra vona va sirhelelekile va nga chavisiwi hi munhu.+ 27 Loko ndzi va vuyisa exikarhi ka vanhu, ndzi va hlengeleta va huma ematikweni ya valala va vona,+ ndzi ta tlhela ndzi tikwetsimisa exikarhi ka vona emahlweni ka matiko yo tala.’+

28 “‘Va ta swi tiva leswaku hi mina Yehovha Xikwembu xa vona loko ndzi va yisa evuhlongeni exikarhi ka matiko kutani ndzi va hlengeleta va tlhelela etikweni ra vona, ndzi nga siyi munhu.+ 29 A ndzi nge he va tumbeteli xikandza xa mina,+ hikuva ndzi ta chululela moya wa mina eka vanhu va Israyele,’+ ku vula Yehovha Hosi Leyi Tlakukeke.”