Ezekiyele

14 Kutani vakulukumba van’wana va Vaisrayele va ta eka mina va fika va tshama emahlweni ka mina.+ 2 Hiloko Yehovha a vulavula na mina a ku: 3 “N’wana wa munhu, vavanuna lava va tiyimisele ku gandzela swifaniso swa vona leswi nyenyetsaka* naswona va veke xikhunguvanyiso lexi endlaka leswaku vanhu va dyoha. Xana ndzi fanele ndzi va yingisa loko va ndzi lavisisa?+ 4 Sweswi va byele u ku, ‘Yehovha Hosi Leyi Tlakukeke u ri: “Loko Muisrayele a tiyimisela ku gandzela swifaniso swakwe leswi nyenyetsaka naswona a veka xikhunguvanyiso lexi endlaka leswaku vanhu va dyoha, kutani a ya vutisisa eka muprofeta, mina Yehovha ndzi ta n’wi hlamula hi ku ya hi ku tala ka swifaniso swakwe leswi nyenyetsaka. 5 Ndzi ta endla leswaku timbilu ta Vaisrayele hinkwavo ti chava, hikuva va ndzi fularherile naswona va gandzela swifaniso swa vona leswi nyenyetsaka.”’+

6 “Kutani byela Vaisrayele u ku, ‘Yehovha Hosi Leyi Tlakukeke u ri: “Vuyani, mi fularhela swikwembu swa n’wina leswi nyenyetsaka naswona mi tshika mitirho ya n’wina hinkwayo leyi nyangatsaka.+ 7 Hikuva loko Muisrayele kumbe munhu loyi a humaka etikweni rin’wana a ndzi fularhela kutani a tiyimisela ku gandzela swifaniso swakwe leswi nyenyetsaka naswona a veka xikhunguvanyiso lexi endlaka leswaku vanhu va dyoha kutani a ya vutisisa muprofeta wa mina,+ mina Yehovha ndzi ta n’wi hlamula. 8 Munhu yoloye ndzi ta lwa na yena, ndzi endla leswaku a va xikombiso ni xihlekiso naswona ndzi ta n’wi susa exikarhi ka vanhu va mina;+ kutani mi ta swi tiva leswaku hi mina Yehovha.”’

9 “‘Kambe loko muprofeta yoloye o yengiwa lerova a n’wi hlamula, ku ta va ku ri mina Yehovha loyi a yengeke muprofeta yoloye.+ Ndzi ta lwa na yena ndzi n’wi lovisa exikarhi ka vanhu va mina ku nga Vaisrayele. 10 Va ta boheka ku langutana ni vuyelo bya xidyoho xa vona; xidyoho xa loyi a vutisaka xi ta fana ni xa muprofeta, 11 leswaku Vaisrayele va nga ha hambuki eka mina naswona va tshika ku tinyamisa hi swidyoho swa vona hinkwaswo. Va ta va vanhu va mina kutani mina ndzi ta va Xikwembu xa vona,’+ ku vula Yehovha Hosi Leyi Tlakukeke.”

12 Yehovha a tlhela a vulavula na mina a ku: 13 “N’wana wa munhu, loko tiko ro ndzi dyohela hi ku va ri nga tshembeki, ndzi ta lwa na rona naswona ndzi ta endla leswaku ri nga vi na swakudya,+ ndzi ta rhumela ndlala etikweni+ rero ndzi tlhela ndzi dlaya vanhu ni swifuwo leswi nga eka rona.”+ 14 “‘Hambiloko vavanuna lavanharhu ku nga Nowa,+ Daniyele+ na Yobo,+ a va ri kona exikarhi ka rona, a ku ta pona vona ntsena hikwalaho ka leswi va nga lulama,’+ ku vula Yehovha Hosi Leyi Tlakukeke.”

15 “‘Kumbe a hi nge ndzi rhumela swiharhi leswi nga ni khombo swi hundza hi le tikweni swi dlaya vanhu* va kona kutani ri va rhumbi ku nga hundzi munhu eka rona hikwalaho ka swiharhi sweswo.+ 16 Leswi ndzi hanyaka,’ ku vula Yehovha Hosi Leyi Tlakukeke, ‘hambiloko vavanuna lavanharhu a va ri etikweni rero, a va nga ta va ponisa vana va vona va majaha kumbe va vanhwanyana; a ku ta pona vona ntsena naswona tiko hinkwaro a ri ta va rhumbi.’”

17 “‘Kumbe a hi nge ndzi tisa banga etikweni rero,+ kutani ndzi ku: “Banga a ri hundze etikweni,” ri dlaya vanhu ni swifuwo,+ 18 hambiloko vavanuna lava vanharhu a va ri kona etikweni rero, leswi ndzi hanyaka,’ ku vula Yehovha Hosi Leyi Tlakukeke, ‘a va nga ta va ponisa vana va vona va majaha kumbe va vanhwanyana; a ku ta pona vona ntsena.’”

19 “‘Kumbe a hi nge ndzi rhumela ntungu etikweni rero+ naswona ndzi chululela vukarhi bya mina eka rona hi ku dlaya vanhu ni swifuwo, 20 hambiloko Nowa,+ Daniyele+ na Yobo+ a va ri etikweni rero, leswi ndzi hanyaka,’ ku vula Yehovha Hosi Leyi Tlakukeke, ‘a va nga ta va ponisa vana va vona va majaha kumbe va vanhwanyana; a ku ta pona vona ntsena hikwalaho ka ku lulama ka vona.’”+

21 “Yehovha Hosi Leyi Tlakukeke u ri: ‘Swi ta va tano loko ndzi rhumela makhombo ya mune yo va xupula*+ ha wona ku nga banga, ndlala, swiharhi leswi nga ni khombo ni ntungu+ leswaku ndzi dlaya vanhu ni swifuwo eYerusalema.+ 22 Hambiswiritano, vana va majaha ni va vanhwanyana lava saleke va ta pona va tlhela va humesiwa eka wona.+ Va le ku teni eka n’wina naswona loko mi vona tindlela ta vona ni mitirho ya vona, mi ta chaveleleka eka khombo leri ndzi ri tiseke ehenhla ka muti wa Yerusalema, eka hinkwaswo leswi ndzi swi endleke eka wona.’”

23 “‘Va ta mi chavelela loko mi vona tindlela ta vona ni mitirho ya vona naswona mi ta swi tiva leswaku a ndzi ri ni xivangelo loko ndzi endla leswi a ndzi fanele ndzi swi endla eka wona,’+ ku vula Yehovha Hosi Leyi Tlakukeke.”