Ezekiyele

22 Yehovha a tlhela a vulavula na mina a ku: 2 “Loko ku ri wena n’wana wa munhu, xana u swi lunghekerile ku vula vuavanyisi bya* muti+ lowu nga ni nandzu wa ngati ni ku wu tivisa swilo swa wona hinkwaswo leswi nyenyetsaka?+ 3 Vula u ku, ‘Yehovha Hosi Leyi Tlakukeke u ri: “Wena u muti lowu nga ni nandzu wa ngati,+ lowu nkarhi wa wona wu nga le ku teni,+ lowu tiendlelaka swikwembu leswi nyenyetsaka* leswaku wu tinyamisa,+ 4 u ni nandzu hikwalaho ka ngati+ leyi u yi halateke naswona swikwembu wa wena leswi nyenyetsaka swi ku nyamisile.+ U hatlisise makumu ya masiku ya wena naswona makumu ya malembe ya wena ma fikile. Hi yona mhaka leyi ndzi nga ta endla leswaku u va ndzhukano eka vanhu va matiko ni xihlekiso eka matiko hinkwawo.+ 5 Matiko lawa ma nga ekusuhi ni lawa ma nga ekule na wena ma ta ku hlekula,+ wena loyi vito rakwe ri thyakeke naswona u nga ni hasahasa. 6 Waswivo! Ndhuna yin’wana ni yin’wana ya Israyele exikarhi ka wena yi tirhisa vulawuri bya yona leswaku yi halata ngati.+ 7 Vanhu a va va xiximanga vatswari va vona.+ Va kanganyise muluveri naswona va xanise n’wana loyi a nga riki na tatana* ni noni.”’”+

8 “‘U ti langutele ehansi tindhawu ta mina to kwetsima naswona a wu ti xiximanga tisavata ta mina.+ 9 Exikarhi ka wena ku ni valumbeti lava tiyimiseleke ku halata ngati.+ Va dya magandzelo etintshaveni ta wena naswona va ya emahlweni va endla manyala.+ 10 Exikarhi ka wena va etlela ni nsati wa tata wa vona+ naswona va pfinya wansati loyi a nga le nkarhini.*+ 11 Exikarhi ka wena wanuna u etlela ni nsati wa wanuna un’wana,+ un’wana u endla manyala hi ku etlela+ ni n’wingi* wakwe naswona un’wana u pfinya makwavo wakwe wa xisati, ku nga n’wana wa nhwanyana wa tata wakwe.+ 12 Exikarhi ka wena va pfumela ku xaviwa leswaku va halata ngati.+ U lombisa hi xikongomelo xo kuma ntswalo+ naswona u tekela van’wana mali hi nkani.+ U ndzi rivele hilaha ku heleleke,’ ku vula Yehovha Hosi Leyi Tlakukeke.

13 “‘Waswivo! Ndzi phokotela mavoko ndzi nyangatsekile hikwalaho ka mpindzulo wa wena wa vukanganyisi ni hikwalaho ka ngati leyi halatiweke exikarhi ka wena. 14 Xana mbilu ya wena yi ta tiyisela ni mavoko ya wena ma va ni matimba emasikwini lawa ndzi nga ta teka goza ku lwa na wena?+ Mina Yehovha ndzi vurile naswona ndzi ta teka goza. 15 Ndzi ta ku hangalasa exikarhi ka vanhu vamatiko ndzi ku yisa ematikweni man’wana+ naswona ndzi ta herisa ku nyama ka wena.+ 16 A wu nge he xiximiwi emahlweni ka matiko, kutani u ta swi tiva leswaku hi mina Yehovha.’”+

17 Yehovha a tlhela a vulavula na mina a ku: 18 “N’wana wa munhu, Vaisrayele va fana ni thyaka eka mina. Hinkwavo i koporo, thini, nsimbhi ni ntsopfu leswi hoxiweke exitikweni. Va fana ni thyaka leri salaka loko ku n’okisiwa silivhere.+

19 “Hikwalaho Yehovha Hosi Leyi Tlakukeke u ri: ‘Leswi hinkwenu mi fanaka ni thyaka,+ ndza mi hlengeleta eYerusalema. 20 Hilaha silivhere, koporo, nsimbhi, ntsopfu ni thini swi hlengeletiwaka hakona exitikweni leswaku swi hisiwa kutani swi n’oka, na mina ndzi ta mi hlengeleta ndzi hlundzukile ndzi mi pfurhetela ndzi mi n’okisa.+ 21 Ndzi ta mi hlengeleta endhawini yin’we ndzi mi pfurhetela hi ndzilo wa ku hlundzuka ka mina,+ kutani mi ta n’okisiwa emutini wa n’wina.+ 22 Ku fana nileswi silivhere yi n’okisiwaka exitikweni, na n’wina mi ta n’okisiwa emutini wa n’wina; mi ta swi tiva leswaku mina Yehovha ndzi chululele vukarhi bya mina eka n’wina.’”

23 Yehovha a tlhela a vulavula na mina a ku: 24 “N’wana wa munhu n’wi byele u ku, ‘U tiko leri nga ta ka ri nga basisiwi kumbe ku neriwa hi mpfula hi siku ra ku hlundzuka ka mina. 25 Vaprofeta vakwe va kunguhate ku endla swilo swo biha+ ku fana ni nghala leyi vombaka yi handzulela xiharhi.+ Va dlayetela vanhu. Va teka xuma ni swilo swa nkoka. Va endle leswaku ku va ni tinoni to tala eka yena. 26 Vaprista vakwe a va wu yingisanga nawu wa mina,+ va ya emahlweni va thyakisa tindhawu ta mina to kwetsima.+ A va swi hambanisi swilo leswi kwetsimaka ni leswi tolovelekeke,+ va tsandzeka ku byela vanhu swilo leswi baseke ni leswi nga basangiki+ naswona va ala ku hlayisa tisavata ta mina, va ndzi thyakisa. 27 Tihosana leti nga exikarhi ka yena ti fana ni timhisi leti handzulelaka xiharhi; ti halata ngati ni ku dlaya vanhu leswaku ti kuma mpindzulo wa vukanganyisi.+ 28 Vaprofeta va yena va tumbete swiendlo swa vona swo biha ku fana ni khumbi leri phamiweke hi pende yo basa. Va vona swivono leswi nga riki ntiyiso ni ku hlahluva+ mavunwa, kutani va ku: “Yehovha Hosi Leyi Tlakukeke u ri,” kasi Yehovha a nga vulanga nchumu. 29 Vanhu va tiko va endle vukanganyisi va tlhela va tekela vanhu swilo swa vona,+ va xanise xisiwana ni loyi a pfumalaka, va kanganyise muluveri naswona a va nga n’wi khomi kahle.’

30 “‘A ndzi lava munhu exikarhi ka vona loyi a nga ta lunghisa khumbi leri endliweke hi maribye kumbe a yima emahlweni ka mina, laha ku nga ni vangwa leswaku tiko ri nga lovisiwi+ kambe a ndzi kumanga munhu. 31 Kutani ndzi ta chululela vukarhi bya mina eka vona, ndzi va herisa hi ndzilo wa ku hlundzuka ka mina. Ndzi ta va khoma hi ku ya hi leswi va swi endleke,’ ku vula Yehovha Hosi Leyi Tlakukeke.”