Vakorinto Wa Vumbirhi
13 Sweswi i ra vunharhu ndzi ta eka n’wina. “Mhaka yin’wana ni yin’wana yi fanele yi tiya loko ku ri ni vumbhoni bya timbhoni timbirhi kumbe tinharhu.”+ 2 Hambileswi ndzi nga riki kona sweswi, swi fana ni loko ndzi ve na n’wina ra vumbirhi naswona ndzi va tsundzuxa ka ha ri ni nkarhi lava nga dyoha khale ni lavan’wana hinkwavo, leswaku loko ndzo tshuka ndzi ta nakambe, a ndzi nge va tsetseleli. 3 Loko ndzi endla tano ndzi ta va ndzi mi kombisa leswaku Kreste u vulavula hi ku tirhisa mina. Naswona Kreste a nga tsananga exikarhi ka n’wina kambe u kombisa matimba yakwe lamakulu. 4 Hikuva, hakunene u dlayiwile emhandzini hikwalaho ka ku tsana kambe wa hanya hikwalaho ka matimba ya Xikwembu.+ I ntiyiso, na hina hi tsanile swin’we na yena+ kambe hi ta hanya na yena hikwalaho ka matimba ya Xikwembu eka n’wina.+
5 Tshamani mi ri karhi mi tikambela ku vona loko ma ha ri eripfumelweni; tshamani mi ri karhi mi tikombisa leswi mi nga swona.+ Kumbe, xana a mi swi xiyi leswaku Yesu Kreste u ni vun’we na n’wina? Loko swi nga ri tano a mi amukeleki. 6 Ndza tshemba hakunene leswaku mi ta swi xiya leswaku hina ha amukeleka.
7 Kutani hi khongela eka Xikwembu leswaku mi nga endli nchumu lowu hoxeke, ku nga ri swona leswaku hi ta vonaka hi ri lava amukelekaka eka van’wana, kambe leswaku n’wina mi ta endla leswi nga swinene hambiloko van’wana va nga hi amukeli. 8 Hikuva a hi nge endli nchumu lowu lwisanaka ni ntiyiso, kambe ntsena hi nga endla nchumu lowu seketelaka ntiyiso. 9 Hakunene ha tsaka loko hi tsanile kambe n’wina mi ri ni matimba. Naswona leswi hi leswi hi swi khongelelaka, leswaku mi tlhela mi lulamisa mianakanyo ya n’wina. 10 Hi yona mhaka leyi ndzi tsalaka swilo leswi loko ndzi nga ri kona, leswaku loko ndzi ri kona ndzi nga ma tirhisi hi ndlela yo biha matimba lama Hosi yi ndzi nyikeke wona,+ yo aka ku nga ri ku hirimuxa.
11 Xo hetelela, vamakwerhu, yanani emahlweni mi tsaka, mi lulamisa mianakanyo ya n’wina, mi chaveleleka,+ mi va ni miehleketo yin’we,+ mi hanya hi ku rhula;+ kutani Xikwembu xa rirhandzu ni ku rhula+ xi ta va na n’wina. 12 Xewetanani hi ku tswontswana.* 13 Vakwetsimi hinkwavo va mi rungula.
14 Musa lowukulu wa Hosi Yesu Kreste ni rirhandzu ra Xikwembu ni moya lowo kwetsima lowu hi vuyeriwaka eka wona hinkwerhu, a swi ve na n’wina hinkwenu.