Vakorinto Wa Vumbirhi
12 Ndzi fanele ndzi tibuma hambileswi swi nga pfuniki nchumu. Ndzi ta vulavula hi swivono+ leswi Hosi yi ndzi kombeke swona ni mahungu lawa yi ndzi byeleke wona.+ 2 Ndzi tiva munhu loyi a nga mudyondzisiwa wa Kreste, loyi emalembeni ya 14 lama hundzeke a yisiweke etilweni ra vunharhu, leswaku a a ri ni miri wa nyama kumbe e-e a ndzi swi tivi; swi tiviwa hi Xikwembu. 3 Ndza n’wi tiva munhu yoloye, kambe leswaku a a ri ni miri wa nyama kumbe e-e a ndzi swi tivi; swi tiviwa hi Xikwembu, 4 u yisiwe eparadeyisini kutani a twa marito lama nga vuriwiki ni lawa swi nga pfumeleriwiki leswaku munhu a ma vula. 5 Ndzi ta tibuma hi munhu yoloye kambe a ndzi nge tibumi hi mina n’wini, loko ku nga ri hi ku tsana ka mina. 6 Hikuva niloko ndzi lava ku tibuma ndzi ta va ndzi nga ri xiphukuphuku, hikuva ndzi ta va ndzi vula ntiyiso. Kambe a ndzi swi endli sweswo leswaku ku nga vi ni munhu loyi a ndzi ndhundhuzelaka swinene ku tlula leswi a swi vonaka eka mina kumbe leswi a swi twaka eka mina, 7 hikwalaho ka leswi ndzi kombiweke swilo swo hlamarisa.
Ku endlela leswaku ndzi nga tinyungubyisi ku tlula mpimo, ndzi nyikiwe mutwa enyameni,+ lowu fanaka ni ntsumi ya Sathana, leswaku yi tshamela ku ndzi makala,* leswaku ndzi nga tinyungubyisi ku tlula mpimo. 8 Ndzi kombele Hosi kanharhu leswaku yi susa mutwa lowu eka mina. 9 Kambe yi te: “Musa wa mina lowukulu wu enele eka wena, hikuva matimba ya mina ma endliwa lama hetisekeke eku tsaneni.”+ Kutani, ndzi ta tibuma hi ku tsana ka mina ndzi tsakile, leswaku matimba ya Kreste ma ta va ehenhla ka mina ku fana ni tende. 10 Hikwalaho ndza tsaka loko ndzi tsanile, loko ndzi rhukaniwa, loko ndzi pfumala, loko ndzi xanisiwa ni loko ndzi tikeriwa hikwalaho ka Kreste. Hikuva loko ndzi tsanile, hi kona ndzi nga ni matimba.+
11 Ndzi hundzuke xiphukuphuku. Mi ndzi sindzise leswaku ndzi va tano hikuva a mi ndzi bumabumelanga hi swilo leswinene leswi ndzi swi endleke. Hambileswi ndzi nga riki nchumu, a va ndzi tluli ha nchumu vaapostola va n’wina lava tiendlaka onge i vanene ngopfu.+ 12 Hakunene, ndzi mi kombile swikombiso swa leswaku ndzi muapostola hi ku tiyisela lokukulu+ ni hi ku endla masingita ni swilo swo hlamarisa ni mitirho ya matimba.+ 13 Hikuva, xana mavandlha laman’wana hinkwawo ma mi tlula hi yini, loko ku nga ri leswaku n’wina a ndzi mi rhwexanga ndzhwalo wa ku ndzi hlayisa?+ Ndzi kombela mi ndzi rivalela xihoxo lexi.
14 Vonani! Se i ra vunharhu ndzi lunghekele ku ta eka n’wina naswona a ndzi nge vi ndzhwalo. Hikuva a ndzi lavi swilo swa n’wina+ kambe ndzi lava n’wina; hikuva vana+ a hi vona lava faneleke va hlayisela vatswari va vona xuma, kambe i vatswari lava faneleke ku hlayisela vana va vona. 15 Loko ku ri mina ndzi ta tirhisa hinkwaswo leswi ndzi nga na swona hi ku tsaka lokukulu ni vutomi bya mina hikwalaho ka n’wina.+ Loko ndzi mi rhandza swinene, xana mina ndzi fanele ndzi rhandziwa katsongo? 16 Kambe a ndzi vanga ndzhwalo eka n’wina.+ Nilokoswiritano, mi ri, a ndzi ri ni “vuxisi” naswona ndzi mi “kanganyisile.” 17 Xana ndzi mi dyelerile hi ku tirhisa un’wana wa lava ndzi va rhumeke eka n’wina ke? 18 Ndzi khongotele Tito naswona ndzi n’wi rhumele eka n’wina a ri ni makwerhu un’wana. Xana Tito u mi dyelerile?+ Xana a hi endlanga swilo hi ndlela leyi fanaka ke? Xana a hi fambanga endleleni yin’we ke?
19 Xana nkarhi lowu hinkwawo a mi ehleketa leswaku a hi ringeta ku tiyimelela eka n’wina hikwalaho ka swihehlo leswi? Tanihi valandzeri va Kreste hi vulavula ntiyiso emahlweni ka Xikwembu. Kambe, varhandziwa, hinkwaswo leswi hi swi endlaka hi swi endlela ku aka n’wina. 20 Hikuva ndza chava leswaku hi ndlela yo karhi, loko ndzi fika a ndzi nge mi kumi mi ri hi ndlela leyi ndzi navelaka leswaku mi va ha yona naswona a ndzi nge vi hi ndlela leyi mi navelaka leswaku ndzi va yona, kambe ku nga ha va ni timholovo, mavondzo, ku hlundzuka, ku kanetana, ku rhuketelana, ku hlevana, ku tikukumuxa ni hasahasa. 21 Kumbexana loko ndzi tlhela ndzi ta, swi nga ha endleka Xikwembu xa mina xi ndzi tsongahata emahlweni ka n’wina, naswona ndzi nga ha boheka ku rila hikwalaho ka vanhu vo tala lava tshameke va dyoha kambe va nga hundzukangiki ethyakeni ra vona ni le ku tikhomeni ko biha hi swa masangu* ni manyala* lawa a va ma endla.